Read KITAB SUCI ZABUR INJIL 2 KORINTUS 10 Bible Online

2 KORINTUS 10 - KITAB SUCI ZABUR INJIL bible

2 KORINTUS 10

¹Tiang, Paulus, dengan saq teparan ndéq bani lamun berandangan mue kance side, laguq bani lamun jaoq léman side, tiang peringet side demi Almasih saq lemah lembut dait gerasaq.

²Sanget siq tiang tunas ndaq miaq tiang jari bani léq side pade lamun tiang dateng laun. Séngaq tiang beniat gen teges léq dengan-dengan saq paran bahwe tiang pade begawéan siq tujuan duniawi.

³Mule tiang pade masih idup léq dalem dunie, laguq perjuangan tiang pade ndéqne siq dasar tujuan duniawi.

⁴Senjate-senjate saq tiang pade kadu léq dalem perjuangan tiang pade ndéqne senjate dunie niki, laguq senjate-senjate Allah saq bekuase. Siq senjate-senjate nike tiang pade ngancurang bénténg-bénténg.

⁵Tiang pade ngancurang pikiran-pikiran saq nyesatang dait segale macem kesombongan saq nentang penenaoq jari kenal kance Allah. Tiang pade taklukang pikiran dengan-dengan dait miaq ie pade taat tipaq Almasih.

⁶Dait lamun side pade sampun tetu-tetu taat, tiang pade siep jari ngukum selapuq kedurhakean.

⁷Side pade harus sadar berembé keadaan saq setetune. Lamun sopoq dengan tetu-tetu yakin bahwe ie dowén Almasih, ie harus ngingetang diriqne mésaq dait sadar bahwe tiang pade jari dowén Almasih éndah maraq ie.

⁸Tiang ndéq ilaq lamun tiang harus luwéqan bangge-banggeang kekuasean saq sampun teicanin siq Tuhan tipaq tiang pade, séngaq kekuasean nike teicanin jari ngebéng semanget léq side pade, ndéqne jari nyenyédaq.

⁹Tiang ndéq mélé side pade merase bahwe tiang nakut-nakutin side pade kadu surat-surat tiang.

¹⁰Lantaran araq bebase, “Surat-surat Paulus nike teges dait bedowé wibawe, laguq lamun ie mésaq araq léq tengaq-tengaq ite, pribadine lemah dait ucapan-ucapanne ndéq bedowé arti napi-napi!”

¹¹Dengan saq maraq nike seharusne sadar bahwe lamun tiang pade araq léq tengaq-tengaq side pade, perbuatan tiang pade tepat maraq saq tiang pade tulis léq dalem surat-surat tiang pade.

¹²Pasti tiang pade ndéq bani bandingang atao anggep diriq tiang pade sederajat kance dengan-dengan saq nganggep diriqne atas derajatne. Berembé bodone ie pade! Ie pade miaq ukuran mésaq dait nilai diriqne mésaq kadu ukuran nike.

¹³Tiang pade ndéqne maraq nike. Lamun tiang pade bangge-banggeang diriq, tiang pade ndéq keliwat bates. Tiang pade tetep léq dalem bates-bates daérah pegawéan saq sampun tetentuang siq Allah umaq tiang pade. Dait side pade termasuk léq dalem daérah nike.

¹⁴Jari, sewaktu tiang pade jangoq side pade dait jauq Kabar Solah mengenai Almasih tipaq side, tiang pade ndéq sugul léman bates-bates daérah pegawéan tiang pade.

¹⁵Tiang pade ndéq puji diriq léq pegawéan dengan lain saq araq léq luah bates saq tetentuang siq Allah tipaq tiang pade. Sebalikne tiang pade tetep léq dalem bates-bates saq tetentuang siq Allah léq tiang pade dait beharep bahwe side pade sayan percaye léq Almasih, adéq tiang pade bau ngelaksaneang pegawéan saq beléqan léq antare side pade.

¹⁶Siq care nike tiang pade bau beriteang Kabar Solah nike léq negeri-negeri lain siq care ndéq bangge-banggeang diriq léq pegawéan saq sampun telaksaneang léq wilayah pelayanan dengan lain.

¹⁷ Léq dalem Kitab Suci tetulis, “Dengan saq mélé banggeang sopoq hal, seharusne banggeang napi saq sampun telaksaneang siq Tuhan.”

¹⁸Séngaq ndéqne dengan saq puji diriqne saq tahen uji, laguq dengan saq tepuji siq Tuhan.