Read KITAB SUCI ZABUR INJIL 2 KORINTUS 3 Bible Online

2 KORINTUS 3 - KITAB SUCI ZABUR INJIL bible

2 KORINTUS 3

¹Napi hal niki maraqne tiang pade mulai puji diriq tiang pade? Atao napi perlu tiang pade petitoqang surat pujian tipaq side pade, atao léman side pade maraq saq teperluang siq dengan-dengan lain?

²Side mésaq saq jari surat pujian tiang pade, saq tetulis léq dalem atén tiang pade dait saq bau tetaoq dait tebace siq sebilang dengan.

³ Ie pade bau serioq bahwe side pade surat saq tetulis siq Almasih, saq tekirim langan tiang pade. Surat nike ndéqne tetulis kadu mangsi, laguq kadu Roh Allah saq idup; ndéq éndah léq atas batu tulis, laguq léq até manusie.

⁴Tiang pade bebase maraq nike lantaran keyakinan tiang pade léq Allah langan Almasih.

⁵Tiang pade ndéq bedowé sopoq alasan jari nyatayang bahwe tiang pade sanggup ngelaksaneang pegawéan niki, laguq Allah saq ngicanin kemampuan nike tipaq tiang pade.

⁶ Allah saq jariang tiang pade mampu jari pelayan léq sopoq perjanjian saq baru; perjanjian saq beharep léq Roh Allah, ndéqne léq hukum saq tetulis. Séngaq saq tetulis nike jauq kematéan, laguq Roh Allah nike ngicanin idup.

⁷ Sewaktu perjanjian saq jauq kematéan nike tepiaq dait teukir léq batu, cahaye Allah besinar menah tandur léq penjarupan nabi Musa. Cahayene menah gati sehingge bangse Israel ndéqne sanggup serioq penjarupan nabi Musa, timaq cahaye léq penjarupanne nike sampun saru léq waktu nike. Lamun saq jauq kematéan nike tesahang siq kemuliean saq beléq,

⁸pasti perjanjian saq tepiaq siq Roh Allah, tesahang siq kemuliean saq beléqan malik.

⁹Lamun perjanjian saq ngukum manusie maraq nike muliene, pasti gen muliean malik perjanjian saq gen miaq manusie tejariang kenaq léq arepan Allah sehingge hubungan manusie kance Allah jari solah malik.

¹⁰Jari bau teparan bahwe napi saq laéq mulie, sampun ndéq mulie malik lantaran kemuliean saq mangkin niki.

¹¹Lamun saq cume tahen sementare, maraq nike muliene, pasti napi saq kekel nike gen muliean malik.

¹²Séngaq tiang pade bedowé harepan maraq nike, make tiang pade bani ngeraos maraq nike.

¹³ Tiang pade ndéq maraq nabi Musa saq ngilipang penjarupanne kadu kerudung adéq bangse Israel ndéq serioq cahaye Tuhan saq gen telang léman penjarupanne.

¹⁴Pikiran ie pade sampun tetutup. Dait jangke jelo niki éndah pikiran ie pade masih tetutup siq kerudung léq waktu ie pade bace perjanjian saq laéq nike. Kerudung nike cume bau tebukaq lamun dengan araq léq dalem Almasih.

¹⁵Mangkin éndah lamun ie pade bace kitab Musa, kerudung nike masih nutup pikiran ie pade.

¹⁶Laguq lamun sopoq dengan bebalik tipaq Tuhan, kerudung nike teangkat léman muen dengan nike.

¹⁷Tuhan nike Roh, dait léq mbé Roh Allah araq, léq derike éndah araq kemerdékean.

¹⁸Mangkin muente selapuq ndéq tetutup siq kerudung, dait ite nyatayang kemuliean Junjungan Saq Mulie Deside Isa Almasih. Dait lantaran nike ite secare terus-menerus terobah adéq jari maraq Ie; sayan ngonéq ite sayan mulie. Kemuliean nike asalne léman Tuhan, dait Roh nike Tuhan.