Read KITAB SUCI ZABUR INJIL 2 KORINTUS 4 Bible Online

2 KORINTUS 4 - KITAB SUCI ZABUR INJIL bible

2 KORINTUS 4

¹Tiang pade laksaneang pegawéan niki lantaran kemurahan Allah. Keranaq nike tiang pade ndéq telang semanget.

²Tiang pade ndéq kadu care saq nyeboq-nyeboq saq merilaq. Tiang pade ndéq mélé licik begawéan atao palsuang Manik Allah. Sebalikne tiang pade ngelayanin Allah siq até saq murni menurut pekayunan-Ne. Keranaq nike, tiang pade ijinang selapuq dengan nilai diriq tiang pade léq dalem até nurani ie pade léq arepan Allah.

³Lamun Kabar Solah saq tiang pade beriteang nike masih ndéqman tepahamin éndah, make cume dengan-dengan saq kenyeke nuju keancuran doang saq ndéq paham,

⁴nike dengan-dengan saq ndéq percaye, saq pikiranne sampun tebuteang siq penguase jahat jaman mangkin niki, sehingge ie pade ndéq serioq cahaye Kabar Solah mengenai kemuliean Almasih, saq jari gambaran Allah.

⁵Berite saq tiang pade sampéang nike ndéqne berite mengenai tiang mésaq. Berite nike berite mengenai Deside Isa Almasih; bahwe Ie Tuhan; dait tiang pade hambe-hambe side pade lantaran Almasih.

⁶ Allah saq bemanik, “Léman peteng tiwoq cahaye.” Allah nike éndah saq niwoqang cahaye nike léq dalem aténte, adéq terang pikirante jari pahamin kemuliean Allah saq besinar léq penjarupan Almasih.

⁷Laguq harte rohani saq solah nike tiang pade toloq léq dalem gerabah, nike diriq tiang mésaq. Siq care nike nyate bahwe keagungan kuase nike asalne léman Allah dait ndéqne léman tiang pade.

⁸Tiang pade tetindes léq dalem selapuq hal, laguq tiang pade ndéq kejepit. Tiang pade bingung, laguq ndéq jangke putus ase.

⁹Tiang pade teaniaye, laguq tiang pade ndéq teadéqang mésaq-mésaq. Dait timaq tiang pade kereng tetimpak jangke geriq, laguq tiang pade ndéq maté.

¹⁰Ninggal-Ne Almasih masih tetep beridap léq awak tiang pade, adéq kehidupan-Ne éndah jari nyate léq awak tiang pade.

¹¹Sengonéq tiang pade idup, tetep tiang pade teancem siq kematéan lantaran Deside Isa, adéq siq care nike kehidupan Deside Isa éndah bau tenyatayang léq awak tiang pade saq iniq binase niki.

¹²Niki artine bahwe léq dalem diriq tiang pade, araq kematéan saq berusahe nyematéq tiang pade, laguq tiang pade seneng bahwe araq kehidupan saq kenyeke giat léq dalem diriqde.

¹³ Léq dalem Kitab Suci tetulis maraq niki, “Tiang percaye, keranaq nike tiang ngeraos”. Siq semanget percaye saq maraq nike éndah, tiang pade ngeraos séngaq tiang pade percaye.

¹⁴Tiang pade yakin bahwe Allah saq sampun ngidupang malik Deside Isa Almasih, gen ngidupang tiang pade éndah bareng Deside Isa, dait gadingang side pade kance tiang pade ojok arepan-Ne.

¹⁵Selapuqne nike jari kepentingan side. Séngaq sayan luwéq dengan nerimaq rahmat, sayan luwéq éndah do'e syukur saq tesampéang tipaq Allah; siq care nike Allah temulieang.

¹⁶Keranaq nike tiang pade ndéq telang harepan, timaq tiang pade secare lahiriah jari sayan lemah laguq secare rohani tiang pade tejariang baru sebilang jelo.

¹⁷Dait penderitean saq déang niki saq tiang pade alamin sementare, gen ngasilang sopoq kemuliean saq beléq dait kekel. Kemuliean nike beléqan lamun tebanding siq penderitean nike.

¹⁸Séngaq tiang pade ndéq merhatiang hal-hal saq penggitan, laguq hal-hal saq ndéq penggitan. Séngaq saq penggitan cume tahen sementare, laguq saq ndéq penggitan nike kekel selaéq-laéqne.