Read KITAB SUCI ZABUR INJIL 2 KORINTUS 5 Bible Online

2 KORINTUS 5 - KITAB SUCI ZABUR INJIL bible

2 KORINTUS 5

¹Séngaq tiang pade nenaoq bahwe lamun balé -- nike awak -- saq taoq ite ndot léq gumi niki tebungkar, Allah gen nyedieang ite sopoq balé léq sorge, saq tepiaq siq Allah mésaq dait saq tahen selaéq-laéqne.

²Léq dalem balé saq mangkin niki, ite ngeluh séngaq ite melét gati ndot léq dalem balénte saq léq sorge nike.

³Balé nike awakte saq baru.

⁴Sengonéq ite ndot léq dalem balé saq léman dunie niki, ite ngeluh séngaq bandeante berat. Ndéqne lantaran ite melét lepas léman awakte saq léman dunie niki, laguq lantaran ite melét kadu awak saq léman sorge nike, adéq awakte saq iniq maté niki tekuasein siq saq idup.

⁵Malahan Allah mésaq saq nyiepang ite jari hal nike, dait Ie ngicanin Roh-Ne tipaq ite jari jaminan.

⁶Keranaq nike atén tiang pade tetep merase kuat. Tiang pade nenaoq bahwe sengonéq tiang pade masih ndot léq dalem awak tiang pade niki, tiang pade masih jaoq léman Tuhan.

⁷Séngaq tiang pade idup siq dasar percaye tipaq Almasih, ndéqne siq dasar léq napi saq bau teserioq,

⁸keranaq nike atén tiang pade jari kuat. Tiang pade demenan lepas léman awak tiang pade niki, adéq bau ndot ngiring Tuhan.

⁹Keranaq nike tiang pade berusahe pacu-pacu jari nyenengang Ie, timaq sewaktu tiang pade masih araq léq awak tiang pade léq dunie, atao léq luahne.

¹⁰ Séngaq pasti ite selapuq gen tejauq ojok arepan pengadilan Almasih, dait sopoq-sopoq gen mauq balesan sesuai kance perbuatanne léq dunie niki -- perbuatan solah atao jahat.

¹¹Tiang pade nenaoq napi artine takut léq Tuhan; keranaq nike tiang pade berusahe ngeyakinang dengan. Allah wikan léq tiang pade, dait tiang harep side pade éndah kenal tiang pade léq dalem aténde.

¹²Siq care niki tiang pade ndéq tunas adéq side pade muji diriq tiang. Tiang pade cume mélé ngebéng sopoq alasan saq solah léq side adéq jari bangge léq tiang pade, adéq side pade nenaoq berembé side pade harus jawab dengan-dengan saq utameang rue dengan dait ndéq utameang sipatne.

¹³Lamun tiang pade ruene maraq dengan jogang, nike demi kepentingan Allah. Dait lamun tiang pade ruene waras, nike demi kepentingan side.

¹⁴Kasih Almasih saq nguasein tiang pade; dait tiang pade sadar bahwe lamun sopoq dengan sampun ninggal umaq selapuq dengan, make artine bahwe selapuq dengan sampun ninggal.

¹⁵Almasih ninggal jari selapuq dengan, adéq dengan-dengan saq idup, ndéqne idup malik umaq diriqne mésaq, laguq umaq Almasih saq sampun ninggal dait teidupang malik demi kepentingan ie pade.

¹⁶Keranaq nike, tiang pade ndéq malik nilai dengan menurut ukuran manusie. Mule tiang pade sampun nilai Almasih secare manusie, laguq mangkin ndéq maraq nike malik.

¹⁷Jari sai saq araq léq dalem Almasih, ie ciptean baru: Saq laéq sampun ndéq araq malik, setetune saq baru sampun dateng.

¹⁸Selapuqne nike asalne léman Allah. Langan Almasih Allah jariang hubungante jari solah malik kance Ie, terus ite tetugasang adéq dengan-dengan lain éndah bau solah hubunganne kance Allah.

¹⁹Tiang pade beriteang bahwe siq perantarean Almasih, Allah jariang hubungan manusie kance Ie jari solah malik. Hal nike tejariang siq Allah dait Allah nénten nuntut selapuq kesalaqan-kesalaqan saq sampun tepiaq siq manusie tipaq diriq-Ne. Dait tiang pade sampun tetugasang siq Allah jari beriteang kabar nike.

²⁰Jari, tiang pade utusan-utusan Almasih. Allah sampun nyampéang manik-Ne langan tiang pade. Demi peséngan Almasih, sanget siq tiang pade tunas: Pade terimaq paice léman Allah saq bau miaq side pade tedaméang kance Allah!

²¹Almasih nénten bedose, laguq Allah jariang Ie nanggung dosente, adéq ite tejariang kenaq léq arepan-Ne sehingge hubungante kance Allah jari solah malik.