Read KITAB SUCI ZABUR INJIL 2 KORINTUS 6 Bible Online

2 KORINTUS 6 - KITAB SUCI ZABUR INJIL bible

2 KORINTUS 6

¹Lantaran tiang pade bareng-bareng begawéan ngiring Allah, make sanget siq tiang pade tunas ndaq side pade sie-sieang rahmat Allah saq sampun side pade terimaq nike.

² Léq Kitab Suci, Allah bemanik, “Léq waktu Tiang seneng, Tiang sampun dengahang side, dait léq jelo penyelametan, Tiang sampun nulung side.” Mangkin niki waktune Allah seneng, mangkin niki jelo penyelametan nike!

³Tiang pade ndéq mélé pelayanan tiang pade tesalaqang, keranaq nike tiang pade berusahe ndéq ngebéng ndéq ngebéng sopoq dengan juaq jari ngelaksaneang hal nike.

⁴Sebalikne, dalem selapuq hal, tiang pade nyatayang bahwe tiang pade hambe-hambe Allah. Séngaq, segale macem kesulitan sampun tiang pade alamin dait tiang sabar:

⁵ Tiang pade tesiksaq, tebui, tekembul; tiang pade begawéan Jangke lelah, kereng ndéq tindoq dait kereng éndah ndéq bedowé keloran.

⁶Secare tulus, bijaksane, sabar dait murah até, tiang pade nyatayang bahwe tiang pade hambe Allah. Tiang pade éndah beharep sepenoq angen léq pertulungan Roh Allah, dait siq kasih saq ihlas,

⁷dait dalem kebenaran dait kekuasean Allah, tiang pade nyatayang bahwe tiang pade hambe-hambe Allah. Tiang pade beharep léq pekayunan Allah jari senjate tiang pade jari nyerang atao béle diriq.

⁸Tiang pade tehormatin, laguq tehine éndah; tepuji, dait tepitnah éndah. Timaq tiang pade jujur, tiang pade tetuduh ndéq jujur.

⁹Tiang pade ndéq teanggep kesohor, laguq tiang pade tekenal siq selapuq dengan. Tiang pade teparan maté, laguq nyatene tiang pade masih idup. Timaq tiang pade teaniaye, tiang pade ndéq maté.

¹⁰Timaq angen tiang pade tepiaq aséq, laguq tiang pade tetep seneng éndah. Ruene tiang pade miskin, laguq tiang pade sampun miaq luwéq dengan jari sugih. Ruene tiang pade ndéq bedowé napi-napi, laguq setetune tiang pade bedowé selapuq-lapuqne.

¹¹Semeton senamian saq tiang kasihin léq Korintus! Tiang pade sampun terus-terang léq side. Selapuq isi atén tiang pade sampun tiang pade sampéang.

¹²Léq dalem atén tiang pade, araq taoq saq beléq umaq side, laguq kodéq gati taoq umaq tiang pade léq dalem aténde.

¹³Mangkin, alurang tiang ngeraos maraq léq anak-anak tiang mésaq. Pade bukaq aténde umaq tiang pade.

¹⁴Ndaq side bepasangan kance dengan-dengan saq ndéq beriman léq Deside Isa; hal nike ndéqne paut. Ndéqne mungkin hal saq kenaq iniq besopoq kance saq jahat! Napi iniq cahaye besopoq kance peteng?

¹⁵Napi kancen pade antare Almasih dait Belial? Napi kancen pade dengan saq beriman léq Almasih dait dengan saq ndéq beriman léq Almasih?

¹⁶ Napi hubunganne antare gedéng Allah kance berhale? Ite niki gedéng Allah saq idup. Allah mésaq bemanik, “Tiang gen araq léq tengaq-tengaq ie pade, dait idup bareng kance ie pade. Tiang gen jari Allah ie pade, dait ie pade gen jari umat Tiang.

¹⁷ Keranaq nike, bilin dengan-dengan saq ndéq kenal Allah nike, dait kelin diriqde léman ie pade. Ndaq gati berubungan kance saq najis, make Tiang gen nerimaq side.

¹⁸ Tiang gen jari Bapa side, dait side gen jari bije-bije Tiang, maraq nike manik Tuhan Saq Mahekuase.”