Read KITAB SUCI ZABUR INJIL 2 KORINTUS 7 Bible Online

2 KORINTUS 7 - KITAB SUCI ZABUR INJIL bible

2 KORINTUS 7

¹Semeton senamian saq tiang kasihin! Selapuq janji nike tetujuang tipaq ite. Keranaq nike ite harus persiq diriq léman selapuq hal saq najisang awak dait rohte. Ite harus takut léq Allah, adéq ite bau idup husus umaq Ie léq dalem kesempurnean.

²Terimaq tiang pade léq dalem aténde. Tiang pade ndéq gawéq salaq léq sai-sai, dait ndéq uwah araq dengan saq tiang pade rugiang. Tiang pade ndéq uwah boyaq keuntungan léman sai-sai.

³Tiang sampéang maraq nike, ndéqne jari nyalahang side pade. Séngaq, maraq saq sampun tiang sampéang laéq, tiang pade tetu-tetu ngasihin side pade, dait ite batur-batur seidup-sematé.

⁴Tiang yakin sepenoqne léq side pade. Malahan tiang bangge gati léq side! Timaq tiang pade ngalamin luwéq kesulitan, angen tiang sanget tehibur lantaran side pade. Angen tiang tetu-tetu gembire!

⁵ Waktu tiang pade dateng léq Makedonia, tiang pade tetu-tetu ndéq mauq mentelah. Léman mbé-mbé tiang pade mauq kesulitan: Léman pihak saq lain araq pegejuhan, léman dalem atén tiang mésaq araq ketakutan.

⁶Laguq syukur, Allah tetep hibur dengan saq rendah até; Ie hibur atén tiang pade siq kedatengan Titus.

⁷Atén tiang pade tehibur ndéqne cume lantaran Titus dateng, laguq éndah lantaran Titus ngelaporang berembé aténe tehibur siq side pade. Ie bebadaq léq tiang pade bahwe side pade melét gati bedait kance tiang; bahwe side pade nyesel léq perbuatande laéq dait mangkin réde béle tiang. Hal nike miaq tiang sayan seneng malik.

⁸Timaq surat tiang miaq angende jari sedih, tiang ndéq nyesel nulis surat nike. Mule léq waktu tiang serioq bahwe surat tiang nike miaq side pade sedih -- timaq kesedihande nike cume sementare -- tiang jari nyesel éndah sekediq.

⁹Laguq mangkin tiang seneng -- ndéqne lantaran angende jari sedih, laguq lantaran kesedihande nike miaq kelakuande berobah. Mule kesedihande nike pade maraq pekayunan Allah. Jari, tiang pade ndéq miaq side pade jari rugi.

¹⁰Séngaq sedih saq maraq nike ngasilang perobahan até saq datengang keselametan. Dait dengan ndéq gen nyesel léq hal nike. Sebalikne, sedih saq pade maraq keméléq manusie ngasilang kematéan.

¹¹Cobaq side pade perhatiang napi hasilne umaq side, kesedihan saq pade maraq pekayunan Allah! Hasilne, side pade tetu-tetu berusahe gen piaq keadaan jari solah! Side pade jari meriq léq dose, side pade takut, side pade kangen, side pade jari besemanget, side pade réde ngukum saq salaq! Léq dalem selapuq persoalan niki sampun side pade buktiang bahwe side pade ndéq salaq.

¹²Jari, timaq tiang sampun nulis surat nike, tiang nulis ndéqne lantaran dengan saq salaq nike. Ndéqne éndah lantaran dengan saq menderite lantaran kesalaqan nike. Tiang nulis surat nike adéq léq arepan Allah, side pade sadar mésaq berembé beléqne kerédeande tipaq tiang pade.

¹³Keranaq nike angen tiang pade tehibur. Selain tehibur, saq terutame gati tiang pade jari seneng lantaran serioq Titus gembire; aténe tehibur siq semeton senamian.

¹⁴Tiang mule sampun bangge-banggeang side pade léq ie. Syukur, side pade ndéq merilaq tiang. Selapuq saq sampun tiang pade sampéang léq side nike kenaq. Maraq nike éndah napi saq tiang pade bangge-banggeang mengenai side pade léq Titus, ternyate tetu éndah.

¹⁵Mangkin ie sayan ngasihin side pade, séngaq ie inget berembé taatne side selapuq, dait berembé side pade nerimaq ie siq hormat dait patuh.

¹⁶Tiang seneng gati, séngaq side pade bau tepercaye léq dalem selapuq hal.