Read KITAB SUCI ZABUR INJIL 2 KORINTUS 8 Bible Online

2 KORINTUS 8 - KITAB SUCI ZABUR INJIL bible

2 KORINTUS 8

¹ Semeton senamian, tiang pade mélé side pade nenaoq éndah mengenai rahmat Allah tipaq jemaah-jemaah léq Makedonia.

²Ie pade sampun teuji siq kesulitan-kesulitan saq berat. Laguq léq tengaq-tengaq kesulitan-kesulitan nike, ie pade gembire dait murah até dalem hal ngebéng sumbangan jari nulung dengan lain, timaq ie pade miskin gati.

³Tiang bau mastiang bahwe ie pade ngebéng semampu ie pade, malahan lebih. Timaq ndéq araq saq suruq,

⁴sanget siq ie pade tunas léq tiang pade lamun bau ie pade teijinang milu ngebéng sumbangan tipaq dengan-dengan saq tehususang bagi Allah léq Yudea.

⁵Ie pade ngebéng jaoq luwéqan léman saq tiang pade harepang. Penembéq ie pade nyerahang diriq tipaq Tuhan, beterus tipaq tiang pade éndah, pade maraq pekayunan Allah.

⁶Keranaq nike tiang pade sanget nganjurang Titus -- saq baruq mulaiang usahe nike, adéqne ngelanjutang usahe saq solah niki léq antare side pade éndah.

⁷Side pade mule lebihan dalem selapuq-lapuqne: Side pade lebihan dalem hal percaye, dalem hal nyatayang pendapet, dalem hal penenaoq, dalem segale macem usahe, dait dalem hal kasihde tipaq tiang pade. Keranaq nike, side pade éndah lebihan léq dalem usahe saq solah niki.

⁸Tiang ndéq nganjurang nike jari sopoq préntah. Laguq siq nyatayang berembé semangetne dengan lain nulung sepade manusie, tiang éndah melét nenaoq seberembé kasihde.

⁹Séngaq side pade sampun nenaoq rahmat Junjungante Saq Mulie Deside Isa Almasih. Ie sugih, laguq Ie piaq diriq-Ne miskin jari kepentingande, adéq siq kemiskinan-Ne nike, side pade jari sugih.

¹⁰Menurut pendapet tiang, sepatutne side pade nutuqang napi saq sampun side pade piaq taun saq juluan. Séngaq side pade saq penembéq gati mikirang dait mulaiang usahe niki.

¹¹Jari, mangkin side pade harus ngelanjutang menurut kemampuande. Side pade harus besemanget jari nutuqang usahe nike, maraq semangetde laéq miaq rencane nike.

¹²Lamun side pade ihlas ngebéng, make Allah gen nerimaq sumbangande nike siq dasar napi saq araq léq side, ndéqne siq dasar léq napi saq ndéq araq léq side.

¹³Tiang tetu-tetu ndéq bemaksut jari bébasang dengan lain léman tanggung jawab, dait miaq side pade sayan berat. Laguq, lantaran mangkin side pade dalem keadaan cukup, make sampun sepatutne side pade nulung ie pade. Laun lamun side pade kekurangan, dait ie pade dalem keadaan cukup, make ie pade gen nulung side pade. Siq care nike deduaqne pade-pade tetulung.

¹⁵ Léq dalem Kitab Suci tetulis, “Dengan saq ngumpulang luwéq, ndéqne belebihan, dait dengan saq ngumpulang sekediq, ndéqne kekurangan.”

¹⁶Tiang pade tetu-tetu besyukur léq Allah séngaq Ie sampun ngicanin rahmat tipaq Titus adéqne besemanget maraq tiang pade jari nulung side pade!

¹⁷Séngaq Titus ndéqne cume réde léq napi saq tiang pade tunas, laguq ie éndah semanget gati mélé nulung side pade jangke siq keméléqne mésaq ie mutusang lumbar ojok side.

¹⁸Bareng kance ie, tiang pade ngirim éndah sopoq semeton saq tehormatin gati léq selapuq jemaah séngaq pegawéanne nyampéang Kabar Solah léman Allah.

¹⁹Selain nike, dengan nike sampun tepiléq éndah dait tetentuang siq jemaah-jemaah jari bareng kance tiang pade léq dalem kelampan tiang pade. Séngaq tiang pade gen lampaq jari nyampéang sumbangan nike, adéq Tuhan temulieang, dait adéq side pade serioq bahwe tiang pade réde nulung.

²⁰Tiang pade onyaq-onyaq gati adéqne ndaq araq dengan saq nyalahang tiang pade dalem hal nyampéang sumbangan saq beléq niki.

²¹ Tiang pade mélé jujur ndéqne cume léq arepan Tuhan, laguq léq julu manusie éndah.

²²Bareng-bareng kance Titus dait semeton nike, tiang pade ngirim éndah sopoq semeton saq lain. Sampun pire kali tiang pade nguji ie, ternyate ie tetep seneng nulung. Dait mangkin, ie tetu-tetu mélé nulung side pade séngaq ie percaye gati léq side.

²³Mengenai Titus, ie batur tiang, saq begawéan kance tiang jari nulung side pade. Dait mengenai kedue semeton nike, saq lumbar bareng kance ie, ie pade dengan-dengan saq teutus siq jemaah-jemaah dait jari kebanggean umaq Almasih.

²⁴Tiang pade harep side pade nyatayang kasihde léq ie pade, adéq selapuq jemaah nenaoq bahwe side pade ngasihin ie pade dait napi saq tiang pade banggeang mengenai side pade mule tetu.