Read KITAB SUCI ZABUR INJIL 2 KORINTUS 9 Bible Online

2 KORINTUS 9 - KITAB SUCI ZABUR INJIL bible

2 KORINTUS 9

¹Setetune ndéqne perlu malik tiang nulis tipaq side pade mengenai sumbangan saq kenyeke tekirim tipaq dengan-dengan saq tehususang bagi Allah léq Yudea.

²Tiang nenaoq side pade seneng nulung, dait sampun tiang banggeang side pade tipaq dengan-dengan léq Makedonia. Tiang badaq ie pade, bahwe léman taun saq juluan, semeton-semeton léq Akaya sampun siep gen ngebéng sumbangan. Dait semangetde sampun miaq luwéq dengan léman ie pade milu besemanget éndah.

³Mangkin tiang ngutus Titus dait kedue semeton nike tipaq side adéq napi saq tiang pade bangge-banggeang mengenai side pade ndaq cume jari ucapan doang. Jari, side pade harus tetu-tetu siep, séngaq tiang nyampéang léq ie pade bahwe side pade siep léq hal nike.

⁴Tiang kuatir lamun araq dengan-dengan Makedonia saq milu bareng kance tiang léq waktu tiang dateng ojok side. Dait lamun tedait siq ie pade bahwe side ndéqman siep, berembé ilaqne tiang pade laun, lantaran sampun nyampéang bahwe tiang pade percaye gati léq side! Dait side mésaq gen ilaq éndah.

⁵Keranaq nike tiang merase perlu ngutus ie pade tipaq side juluan jari ngurus sumbangan saq side pade janjiqang nike. Hal nike tiang laksaneang, adéq laun lamun tiang dateng, sumbangande nike sampun siep. Siq care nike, nyate bahwe sumbangande nike tebéng secare ihlas, dait ndéqne lantaran paksaqan.

⁶Pade inget! Dengan saq sawur binéq sekediq, gen mauq hasil saq sekediq éndah. Laguq dengan saq sawur binéq luwéq, gen mauq hasil saq luwéq éndah.

⁷Sebilang dengan harus ngebéng menurut keihlasan angenne. Ndaq ie ngebéng setenge angen atao terpakse, séngaq Allah ngasihin dengan saq ngebéng siq até saq sukecite.

⁸Allah bekuase ngicanin side pade rahmat saq belimpah-limpah, adéq side pade tetep bedowé napi saq side pade perluang; malahan side pade gen belebihan jari ngelaksaneang hal saq solah.

⁹ Léq Kitab Suci tetulis mengenai Allah, “Ie bagi-bagiang tipaq dengan miskin; kebenaran-Ne kekel selaéq-laéqne.”

¹⁰ Allah saq nyedieang binéq jari dengan-dengan saq sawur binéq, dait saq nyedieang ite keloran. Ie éndah gen nyedieang dait jariang luwéq napi saq side pade sawur, adéqne hasil kemurahan aténde sayan luwéq éndah.

¹¹Siq care nike side pade gen jari cukup léq selapuq hal, sehingge side pade tetep bau ngebéng siq murah até. Dait sumbangan-sumbangande saq tiang pade bagi-bagiang nike miaq luwéq dengan jari besyukur léq Allah.

¹²Séngaq perbuatan solah saq side pade laksaneang niki ndéqne cume nyukupang kekurangan dengan-dengan saq tehususang bagi Allah doang, laguq éndah miaq luwéq dengan besyukur léq Allah.

¹³Dait lantaran side pade sampun tahen uji léq dalem pelayanan nike, ie pade mulieang Allah séngaq ie pade serioq kesetieande léq Kabar Solah mengenai Almasih saq side pade iring nike. Ie pade éndah mulieang Allah, séngaq side pade murah até jari bagi-bagiang léq ie pade, dait tipaq selapuq dengan lain napi saq araq léq side.

¹⁴Make ie pade gen do'eang side pade siq rase kasih lantaran rahmat Allah saq limpah léq side.

¹⁵Side pade harus besyukur léq Allah lantaran rahmat-Ne saq luar biase nike!