Read KITAB SUCI ZABUR INJIL GALATIA 3 Bible Online

GALATIA 3 - KITAB SUCI ZABUR INJIL bible

GALATIA 3

¹Semeton senamian dengan-dengan Galatia! Side pade tetu-tetu bodo! Sang side pade sampun kene siq pengaruh dengan? Padahal ninggalne Almasih léq kayuq salib sampun tiang jelasang léq side sejelas-jelasne!

²Cobaq badaq tiang saq sopoq niki doang: Napi side pade sampun nerimaq Roh Allah lantaran ngelaksaneang Hukum Taurat, atao lantaran side pade percaye léq pemberitean Kabar Solah léman Allah?

³Kembéq side pade bodo gati? Side pade sampun mulai idup baru siq Roh Allah, segerah mangkin side pade mélé nyempurneang diriqde siq kekuatande mésaq?

⁴Percume doang selapuq saq sampun side pade alamin nike? Segerah selapuq nike sie-sie!

⁵Allah ngicanin Roh-Ne léq side dait ngaraqang keajaipan-keajaipan léq antare side pade. Napi Allah ngelaksaneang nike lantaran side pade ngelaksaneang Hukum Taurat atao lantaran side pade percaye léq pemberitean Kabar Solah léman Allah?

⁶ Pade maraq saq tetulis léq dalem Kitab Suci mengenai Ibrahim, “Ibrahim percaye léq Allah, dait lantaran percayene nike ie tejariang kenaq léq arepan Allah sehingge hubunganne kance Allah jari solah malik.”

⁷ Keranaq nike, side pade harus nenaoq bahwe selapuq dengan saq idup léman iman, ie pade nike keturunan Ibrahim.

⁸ Kitab Suci, saq sampun juluan wikan bahwe Allah gen miaq dengan-dengan saq ndéq Yahudi bau tejariang kenaq léq arepan-Ne sehingge hubungan ie pade kance Allah jari solah malik langan iman, sampun juluan beriteang kabar solah nike tipaq Ibrahim, “Langan side, selapuq suku-suku bangse gen mauq berkah léman Allah.”

⁹Ibrahim beriman, make ie teberkahin. Maraq nike éndah selapuq dengan saq beriman, gen teberkahin bareng kance Ibrahim.

¹⁰ Dengan-dengan saq beharep sepenoq angen léq Hukum Taurat, selapuqne idup léq bawaq kutukan. Séngaq léq dalem Kitab Suci tetulis, “Dengan saq ndéq setie ngelaksaneang selapuq saq tetulis dalem Kitab Hukum Taurat tekutuk siq Allah!”

¹¹ Ndéq araq sopoq dengan juaq saq bau tejariang kenaq léq arepan Allah sehingge hubunganne kance Allah jari solah malik lantaran ngelaksaneang Hukum Taurat. Hal nike sampun tenyatayang léq dalem Kitab Suci, “Dengan saq tejariang kenaq léq arepan Allah sehingge hubunganne kance Allah jari solah malik, ie gen idup siq iman!”

¹² Laguq Hukum Taurat nike ndéqne tedasarang siq iman. Dalem Kitab Suci tetulis bahwe dengan saq ngelaksaneang Hukum Taurat, gen idup lantaran hukum nike.

¹³ Laguq Almasih sampun nebus ite léman kutukan Hukum Taurat. Ie piaq hal nike siq ngalurang diriq-Ne tekutuk lantaran ite. Séngaq léq dalem Kitab Suci tetulis, “Tekutuk dengan saq ninggal tegantung léq kayuq salib.”

¹⁴Almasih ngelaksaneang maraq nike adéq berkah saq tejanjiqang siq Allah tipaq Ibrahim teicanin éndah tipaq dengan bangse-bangse lain. Sehingge langan iman, ite nerimaq Roh saq tejanjiqang siq Allah nike.

¹⁵Semeton senamian! Tiang béng side conto léman pengalaman sebilang jelo. Lamun dengan miaq surat wasiat saq sampun tesahang, make ndéq araq sopoq dengan juaq saq bau batalang atao ngeromboq surat wasiat nike.

¹⁶ Maraq nike éndah halne selapuq janji saq sampun teicanin tipaq Ibrahim dait tipaq keturunanne. Léq Kitab Suci ndéqne tetulis “dait tipaq selapuq keturunan side”, maraqne tipaq luwéq dengan, laguq cume tipaq sopoq dengan, “dait tipaq keturunan side”, nike Almasih.

¹⁷ Saq mélé tiang sampéang léq deriki: Janji Allah sampun tepiaq dait tesahang juluan. Hukum Taurat saq teicanin empat ratus telung dase taun sesampun nike ndéqne bau batalang pengesahanne dait ngapus janji Allah nike.

¹⁸ Séngaq lamun napi saq teicanin siq Allah nike teharepang siq dasar Hukum Taurat, make nike ndéqne malik rahmat saq tejanjiqang. Malahan lantaran Allah sampun bejanji léq Ibrahim, make Allah ngicanin hal nike léq ie.

¹⁹Lamun maraq nike, jari napi Hukum Taurat teicanin? Jawabne bahwe hukum nike teromboqang jari nyatayang pelanggaran manusie. Hukum Taurat nike berlaku jangke dateng sopoq dengan keturunan Ibrahim, saq tesebut léq dalem janji Allah tipaq Ibrahim. Hukum Taurat nike tesampéang siq malaékat-malaékat langan perantarean sopoq manusie.

²⁰Jari, harus araq due pihak, baruq teperluang sopoq perantare. Laguq Allah nénten merluang perantare, séngaq Allah mésaq saq ngelaksaneang.

²¹Napi hal nike artine bahwe Hukum Taurat belawanan kance janji Allah? Pasti ndéqne maraq nike! Séngaq lamun Hukum Taurat teicanin jari sopoq hal saq ngidupang, make manusie bau tejariang kenaq léq arepan Allah sehingge hubunganne kance Allah jari solah malik langan Hukum Taurat.

²²Laguq léq dalem Kitab Suci tetulis bahwe selapuq umat manusie sampun araq léq bawaq kuase dose, adéq janji saq asalne léman iman léq dalem Deside Isa Almasih bau dateng tipaq dengan-dengan saq percaye.

²³Sendéqman iman nike dateng, mule ite araq léq bawaq pengawasan Hukum Taurat. Ite maraq tekurung jangke iman nike tenyatayang.

²⁴Siq care nike, Hukum Taurat nike sampun jari panutan saq jauq ite tipaq Almasih, adéq ite tejariang kenaq léq arepan Allah sehingge hubungante kance Allah jari solah malik lantaran iman.

²⁵Sesampun iman nike dateng, ite ndéqne malik araq léq bawaq pengawasan Hukum Taurat saq jari panutan nike.

²⁶Side pade sampun jari bije-bije dowén Allah siq iman léq dalem Deside Isa Almasih.

²⁷Side pade selapuqne sampun tebaptis siq peséngan Almasih, jari side pade sampun nerimaq léq diriq side pade sipat-sipat Almasih.

²⁸Dalem hal niki ndéq araq malik bédene dengan Yahudi dait dengan Yunani, antare hambe dait dengan bébas, antare mame dait nine. Side selapuqne sopoq léq dalem Deside Isa Almasih.

²⁹ Lamun side pade dowén Almasih, make side pade keturunan Ibrahim. Dait side pade gen nerimaq napi saq tejanjiqang siq Allah.