Read KITAB SUCI ZABUR INJIL GALATIA 4 Bible Online

GALATIA 4 - KITAB SUCI ZABUR INJIL bible

GALATIA 4

¹Laguq perlu tiang tegesang: Sengonéq ahli waris masih kodéq, araq dengan saq ngawasin ie dait ngurus kepentingan-kepentinganne jangke ie cukup umurne, maraq saq sampun tetentuang siq bapaqne. Ie teperlakuang pade maraq sopoq hambe, timaq setetune ie épén dowé selapuq kesugihan nike.

³Maraq nike éndah halne ite: Sengonéq ite ndéqman déwase, ite tejariang panjak siq roh-roh saq nguasein dunie niki.

⁴Laguq léq waktu saq tepat, Allah ngutus Bije-Ne ojok dunie. Ie tebijeang siq sopoq dengan nine dait idup léq bawaq kekuasean Hukum Taurat.

⁵ Siq care nike Ie nebus dengan-dengan saq idup léq bawaq kekuasean Hukum Taurat; adéq ite éndah bedowé hak jari bije-bije dowén Allah.

⁶Keranaq side pade bije-bije dowén Allah, Allah mréntahang Roh Bije-Ne tame ojok dalem aténde dait atén tiang, nike Roh saq bemanik, “Bapa, ya Bapa.”

⁷Jari, side pade ndéqne malik hambe, laguq bije. Dait lantaran side pade bije dowén Allah, make side éndah jari ahli-ahli waris lantaran Allah.

⁸Laéq side pade ndéq kenal Allah, keranaq nike side pade jariang diriqde hambe léman kuase-kuase saq setetune ndéqne Allah.

⁹Laguq mangkin side pade kenal Allah, atao tepatne malik Allah kenal side pade. Nah, kembéq side pade mélé tulak malik tipaq roh-roh dunie saq lemah dait miskin? Kembéq side pade mélé tejariang panjak siq roh-roh nike?

¹⁰Side pade taat léq jelo-jelo saq husus, bulan-bulan saq husus, dait taun-taun saq husus.

¹¹Tiang kuatir, ndaq-ndaq usahe tiang léq side pade jari sie-sie doang.

¹²Semeton senamian! Sanget siq tiang tunas léq side pade adéq side pade jari maraq tiang. Séngaq tiang éndah sampun jari maraq side pade. Side pade ndéq uwah miaq kesalaqan léq tiang.

¹³Side pade pasti masih inget napi saq jari penyebap léq penembéqne tiang beriteang Kabar Solah nike léq side. Nike lantaran tiang sakit.

¹⁴Léq waktu nike side pade ndéq merase kenjering léq tiang, timaq keadaan awak tiang jari cobe beléq umaq side pade. Malahan side pade nerimaq tiang maraq nerimaq malaékat Allah atao maraq nerimaq Deside Isa Almasih mésaq.

¹⁵Side pade bahagie gati waktu nike. Laguq mangkin, léq mbé kebahagiean nike? Tiang nenaoq bahwe léq waktu nike side pade réde congkél penentengde mésaq jari béng tiang, lamun nike bau telaksaneang.

¹⁶Napi mangkin side pade sampun anggep tiang musuh, lantaran tiang nyatayang saq kenaq tipaq side?

¹⁷Dengan-dengan saq lain nike semanget gati boyaq side pade, laguq maksut-maksut ie pade lengé. Ie pade cume mélé kelin side pade léman tiang, adéq side pade besemanget turut ie pade.

¹⁸Mule bagus besemanget léq hal-hal saq solah, asal tetep maraq nike, dait ndaq cume lamun tiang araq bareng kance side pade.

¹⁹Bije-bije tiang saq tiang kasihin! Mangkin tiang niki menderite malik lantaran side pade. Tiang menderite maraq sopoq inaq saq menderite sewaktu nganak. Tiang gen tetep menderite, lamun sipat-sipat Almasih ndéqman tetu-tetu araq léq dalem diriqde!

²⁰Tiang melét gati araq léq tengaq-tengaq side pade mangkin, adéq tiang bau ngeraos kance side siq care saq lain, séngaq tiang ndéq nenaoq malik mélé piaq napi léq side pade!

²¹Semeton-semeton saq mélé idup léq bawaq kekuasean Hukum-hukum Taurat, cobaq dengahang tiang! Tiang gen badaq side napi saq setetune tetulis léq dalem kitab Hukum Taurat.

²² Léq derike tetulis bahwe Ibrahim bedowé due bije: Inaq léman bije saq sopoq nike sopoq hambe, dait inaq léman bije saq lain nike sopoq dengan saq merdéke.

²³Bije léman dengan nine saq jari hambe tebijeang biase lantaran keméléq manusie. Laguq bije léman nine saq merdéke, tebijeang séngaq tejanjiqang siq Allah.

²⁴Niki bau tekadu jari perumpamean. Due dengan nine nike ibarat due perjanjian: Saq sopoq asalne léman Gunung Sinai -- nike Hagar; bije-bijene tebijeang sebagé hambe.

²⁵Jari, Hagar nike Gunung Sinai, léq negeri Arab. Ie jari lambang kote Yerusalem saq araq mangkin, séngaq ie idup sebagé hambe bareng kance bije-bijene.

²⁶Laguq Yerusalem saq léq sorge nike dengan nine saq merdéke, dait ie saq jari inaqte.

²⁷ Séngaq léq dalem Kitab Suci tetulis, “Pade gembire side hai dengan nine saq bangkol, saq ndéq uwah nganak! Pade besukecite dait besurak-surakan hai side saq ndéq uwah idap sakitne nganak! Séngaq dengan nine saq tebilin siq semamene gen mauq bije luwéqan tebanding dengan nine saq idup bareng kance semamene.”

²⁸Semeton senamian! Pade maraq Ishak, side pade bije-bije léman janji Allah.

²⁹ Léq waktu nike bije saq tebijeang menurut keméléq manusie, nganiaye bije saq tebijeang lantaran pekayunan Roh Allah. Maraq nike éndah mangkin.

³⁰Laguq napi saq tetulis léq dalem Kitab Suci? Léq derike tetulis maraq niki: “Sediq hambe nine nike bareng kance bijene, séngaq bije léman hambe nine nike ndéqne gen jari ahli waris bareng kance bije léman dengan nine saq merdéke nike.”

³¹Jari, semeton-semeton, ite niki ndéqne bije-bije léman sopoq hambe nine; ite niki bije-bije léman dengan nine saq merdéke.