Read KITAB SUCI ZABUR INJIL GALATIA 5 Bible Online

GALATIA 5 - KITAB SUCI ZABUR INJIL bible

GALATIA 5

¹Mangkin ite merdéke, séngaq Almasih sampun merdékeang ite! Keranaq nike pertahenang kemerdékean side dait ndaq mélé tejariang hambe malik.

²Pade inget, lamun side pade nyunat diriqde, nike artine Almasih ndéq araq manpaatne léq side. Saq ngucapang niki tiang mésaq, Paulus.

³Karing sekali tiang peringet dengan saq nyunat diriqne, bahwe ie wajib ngelaksaneang selapuq Hukum Taurat!

⁴Side pade, saq melét tejariang kenaq léq arepan Allah sehingge hubungande kance Allah jari solah malik langan Hukum Taurat, sampun tekelin léman Almasih dait sampun araq léq luah rahmat Allah.

⁵Séngaq langan Roh Allah dait siq iman, ite ngantih napi saq kenaq, nike pade maraq napi saq ite harepang.

⁶Séngaq léq dalem Deside Isa Almasih, besunat atao ndéq besunat ndéq araq manpaatne; laguq saq datengang manpaat, iman saq bekarye langan kasih.

⁷Laéq side pade bejuang secare bagus. Sai saq sampun halangin side pade sehingge side pade ndéq taat malik léq kebenaran?

⁸Pasti saq ngelaksaneang nike nénten Allah saq sampun ngemanikang side pade!

⁹ Basen dengan, “Ragi ruti saq sekediq gen miaq mbal selapuq adonan.”

¹⁰Léq dalem Almasih, tiang yakin bahwe side ndéq gen turut pikiran saq lain. Dait tiang yakin bahwe saq nyesatang pikirande, gen tehukum siq Allah.

¹¹Mengenai tiang, semeton senamian, kembéq tiang tetep doang temusuhin lamun tiang masih beriteang bahwe aturan sunat nike perlu? Lamun tiang mule beriteang maraq nike, make napi saq tiang beriteang mengenai salib Almasih ndéq nimbulang masalah.

¹²Bagusan dengan-dengan saq nyesatang pikiran side nike langsung doang sugul léman jemaah!

¹³Side sampun temanikang jari dengan saq merdéke. Laguq ndaq kadu kemerdékeande nike jari tetep ngelaksaneang kehidupan léq dalem dose, sebalikne side pade harus saling kasihin dait saling tulung.

¹⁴ Selapuq Hukum Taurat tesimpulang léq dalem préntah saq sopoq niki, “Side harus ngasihin sepadende manusie, maraq side ngasihin diriqde mésaq.”

¹⁵Laguq lamun side pade saling kakoq dait saling kaken, awas, ndaq jangke side pade saling binaseang.

¹⁶Maksut tiang maraq niki: Menengang Roh Allah mimpin side pade, dait ndaq idup menurut keméléq tabiat manusie.

¹⁷ Séngaq keméléq tabiat manusie belawanan kance pekayunan Roh Allah, dait pekayunan Roh Allah belawanan kance keméléq tabiat manusie. Kedue-duene saling belawanan, sehingge side pade ndéq bau ngelaksaneang napi saq side pade melétang.

¹⁸Laguq lamun Roh Allah mimpin side pade, make side pade ndéq tekuasein siq Hukum Taurat.

¹⁹Keméléq tabiat manusie nyate dalem perbuatan-perbuatan saq cabul, kotor dait ndéq patut;

²⁰dalem penyembahan berhale dait ilmu séhér; saling bemusuhan, besiaq, talon até, becat sili, dait mentingang diriq mésaq, perpecahan dait saling ilon,

²¹serte dengki, bowos-bowosan, péste-péste jangke liwat bates dait saq lain-lainne. Léq selapuqne nike mangkin tiang peringet side pade maraq tiang sampun peringet éndah side pade laéq, bahwe dengan-dengan saq ngelaksaneang hal-hal maraq nike ndéq gen mauq bagian léq dalem Kerajaan Allah.

²²Laguq buaq Roh nike: Kasih, sukecite, damé sejahtere, sabar, murah até, gawéq hal saq solah, kesetiean,

²³lemah lembut, nguasein diriq. Ndéq araq hukum saq nentang hal-hal nike.

²⁴Dengan-dengan saq sampun jari dowén Deside Isa Almasih, dengan-dengan nike sampun nyematéq keméléq tabiat manusiene kance selapuq napsu dait keméléqne.

²⁵Lamun ite idup menurut Roh, alurang idupte éndah tepimpin siq Roh.

²⁶Ndaq ite jari sombong, saling nyakitang angen, dait saling talon até sopoq kance saq lainne.