Read KITAB SUCI ZABUR INJIL GALATIA 6 Bible Online

GALATIA 6 - KITAB SUCI ZABUR INJIL bible

GALATIA 6

¹Semeton senamian! Lamun sopoq dengan tedait gawéq dose, side pade saq idup menurut Roh Allah harus bimbing dengan nike adéqne tulak ojok langan saq kenaq. Laguq side pade harus ngelaksaneang nike secare lemah lembut, dait jagaq ndaq jangke side mésaq tegode éndah.

²Side pade harus saling tulung léq kesusahan dengan, adéq siq care nike side pade taat léq préntah Almasih.

³Lamun sopoq dengan paran diriqne penting, padahal ndéq, dengan nike beduste léq diriqne mésaq.

⁴Sebilang dengan harus meriksaq mésaq napi kelakuanne solah atao ndéq. Lamun solah, ie bau merase bangge siq hal nike. Laguq ndaq ie bandingang kance napi saq telaksaneang siq dengan lain.

⁵Séngaq sopoq-sopoq dengan harus bedowé rase tanggung jawab mésaq.

⁶Dengan saq nerimaq pengajahan mengenai Manik Allah, sepatutne ie bagiang selapuq saq solah saq araq léq ie tipaq dengan saq ngebéng pengajahan nike.

⁷Ndaq sesat. Allah ndéqne bau teanggep réméh! Napi saq tetalet, nike saq tepataq.

⁸Lamun dengan nalet menurut tabiat manusiene, ie gen mataq kematéan léman tabiatne nike. Laguq lamun ie nalet menurut pimpinan Roh Allah, ie gen mataq idup sejati dait kekel léman Roh Allah.

⁹Keranaq nike, ndaq ite jari pendaq ngelaksaneang hal-hal saq solah; séngaq lamun ite ndéq mentelah ngelaksaneang hal-hal nike, make léq sopoq jelo éraq ite gen mauq hasilne.

¹⁰Jari, semasih ite araq kesempatan, ite harus ngelaksaneang saq solah tipaq selapuq dengan, terutame gati tipaq semeton-semetonte saq seiman.

¹¹Perhatiang solah-solah bagian niki saq tiang tulis mésaq kadu hurup saq beléq-beléq.

¹²Dengan-dengan saq mélé ajum diriqne léq hal-hal saq lahiriah, ie pade saq berusahe maksaq side turut aturan sunat. Laguq ie pade laksaneang nike cume adéq ie pade ndéq teaniaye lantaran salib Almasih.

¹³Dengan-dengan saq turut aturan sunat éndah ndéqne ngelaksaneang Hukum Taurat. Laguq ie pade mélé side pade tesunat, adéq ie pade bau banggeang bahwe side pade taat léq aturan nike.

¹⁴Laguq tiang tetu-tetu ndéq mélé banggeang napi juaq, selain Junjungante Saq Mulie Deside Isa Almasih saq sampun ninggal tepakuq léq kayuq salib. Séngaq lantaran Ie sampun ninggal léq kayuq salib, make dunie ndéqne bedowé arti napi-napi malik umaq tiang. Dait tipaq dunie niki, tiang éndah piaq diriq maraqne sampun tepakuq léq kayuq salib.

¹⁵Tesunat atao ndéq tesunat, nike ndéqne penting. Saq penting nike jari ciptean baru.

¹⁶Bagi dengan-dengan saq idup menurut pendapet nike, dait maraq nike éndah Israel saq jari dowén Allah, tiang harep Allah gen ngicanin damé sejahtere dait rahmat-Ne.

¹⁷Selanjutne, ndaq jangke sopoq dengan juaq nyusahang tiang malik, séngaq léq awak tiang araq bukti-bukti bahwe tiang pengiring Deside Isa.

¹⁸Rahmat Junjungante Saq Mulie Deside Isa Almasih, tetep araq bareng kance side pade. Amin.