Read KITAB SUCI ZABUR INJIL EPESUS 1 Bible Online

EPESUS 1 - KITAB SUCI ZABUR INJIL bible

EPESUS 1

¹ Dengan-dengan saq tehususang bagi Allah léq Epesus, saq setie léq Deside Isa Almasih!

²Tiang, Paulus, siq pekayunan Allah jari rasul Deside Isa Almasih, beharep semoge Allah Bapante dait Junjungan Saq Mulie Deside Isa Almasih ngicanin rahmat dait damé sejahtere tipaq side pade.

³Puji syukur tipaq Allah, Bapa Junjungante Saq Mulie Deside Isa Almasih! Ie ngicanin ite berkah siq selapuq berkah rohani léq dalem sorge, séngaq ite araq léq dalem Almasih.

⁴Sendéqman dunie niki tecipteang, Allah sampun miléq ite langan Almasih siq maksut adéq ite jari dowé-Ne saq husus dait ndéq bedowé cacat cele léq arepan-Ne. Lantaran kasih Allah,

⁵make Ie sampun juluan nentuang bahwe langan Deside Isa Almasih, Ie gen ngangkat ite jari bije-bije dowé-Ne sesuai pekayunan-Ne,

⁶adéqne tepuji rahmat-Ne saq mulie, rahmat saq teicanin tipaq ite langan Bije saq asalne léman Ie saq sanget Ie sayang.

⁷ Séngaq léq dalem Almasih dait siq daraq-Ne ite bau tetebus, nike pengampunan dose sesuai rahmat-Ne saq melimpah.

⁸Ie ngelaksaneang nike lantaran Ie sanget ngasihin ite, dait kasih nike limpahang-Ne tipaq ite siq kebijaksanean dait pengertian.

⁹Menurut pekayunan-Ne mésaq, Allah nyatayang rahasie rencane-Ne tipaq ite; Ie sampun netepang bahwe rencane-Ne nike gen teseleséang langan Almasih.

¹⁰Rencane nike adéq selapuq saq léq sorge dait saq léq gumi, tejariang sopoq léq dalem Almasih sebagé kepale. Dait hal nike gen teseleséang siq Allah lamun sampun dateng waktune.

¹¹Tiang nyampéang “léq dalem Almasih”, séngaq léq dalem Ie tiang pade mauq bagian saq tejanjiqang -- tiang pade saq léman penembéq tetentuang jari nerimaq bagian nike sesuai maksut Allah, saq léq dalem selapuqne bekarye menurut keputusan pekayunan-Ne.

¹²Siq care nike, tiang pade saq penembéq beharep léq Almasih, bau memuji Allah lantaran kemuliean-Ne!

¹³Side pade éndah sampun jari dengan-dengan saq tehususang bagi Allah sewaktu side pade dengahang manik kebenaran, nike Kabar Solah saq nyelametang side. Léq dalem Almasih éndah, side pade tesahang siq Roh Suci, saq tejanjiqang nike.

¹⁴Roh nike jari jaminan bahwe ite gen nerimaq napi saq tejanjiqang siq Allah tipaq umat-Ne. Niki ngebéng keyakinan léq ite bahwe Allah gen bébasang umat-Ne. Puji syukur tipaq Allah lantaran keagungan-Ne!

¹⁵Keranaq nike, mulai léman tiang dengah mengenai iman side pade léq Junjungan Saq Mulie Deside Isa Almasih, dait mengenai kasihde léq selapuq dengan-dengan saq tehususang bagi Allah,

¹⁶ndéq tutuq-tutuq tiang besyukur léq Allah mengenai side pade. Tetep tiang sebut arande sewaktu tiang bedo'e.

¹⁷Tiang tunas adéq Allah Junjungante Saq Mulie Deside Isa Almasih, Bapa Saq Mulie, ngicanin Roh hikmat dait wahyu sehingge side pade kenal kance Ie. Roh nike gen jariang side pade bijaksane, dait gen nyatayang Allah tipaq side pade sehingge side pade kenal kance Ie.

¹⁸Tiang tunas adéq Allah jariang até nuraninde becahaye; adéq side pade ngerti napi saq bau side pade harepang léman Allah saq ngemanikang side pade. Adéq side pade nenaoq éndah berembé limpahne berkah-berkah saq solah saq tesedieang siq Allah tipaq dengan-dengan saq tehususang umaq Ie;

¹⁹dait berembé hébatne Allah bekarye siq penoq kuase léq dalem diriqte saq percaye, sesuai kekuatan kuase-Ne,

²⁰ saq Ie laksaneang sewaktu Ie ngidupang Almasih léman ninggal dait ngicanin Ie kedudukan saq paling atas ngiring Allah léq sorge.

²¹Kedudukan Almasih nike jaoq atasan tebanding kance kedudukan selapuq pemréntah, selapuq penguase, selapuq pemimpin, selapuq tuan-tuan, dait sai juaq saq sampun teicanin kedudukan saq atas; saq idup léq jaman niki dait saq gen idup léq jaman saq gen dateng.

²² Selapuqne tetaklukang siq Allah léq bawaq kekuasean Almasih, dait Almasih sampun teicanin tipaq jemaah sebagé kepale léman selapuq saq araq.

²³Jemaah nike rage Almasih, tesempurneang siq Ie saq nyempurneang selapuq-lapuqne.