Read KITAB SUCI ZABUR INJIL EPESUS 2 Bible Online

EPESUS 2 - KITAB SUCI ZABUR INJIL bible

EPESUS 2

¹ Laéq side pade maté secare rohani lantaran pelanggaran-pelanggaran dait dose-dose side pade.

²Léq waktu nike side pade turut kebiasean-kebiasean dunie niki; artine side pade taat léq penguase-penguase saq araq léq awang-awang, nike roh saq mangkin nguasein até dengan-dengan saq durhake.

³Laéq ite selapuq pade éndah kance ie pade; ite idup turut tabiat manusie dait ngelaksaneang napi saq nyenengang awak dait pikirante saq jahat. Léq waktu nike éndah ite jari dengan-dengan saq temurkeang siq Allah, pade maraq dengan-dengan lain.

⁴Laguq Allah saq limpah siq rahmat, lantaran kasih-Ne saq beléq, saq Ie limpahang tipaq ite,

⁵sehingge léq waktu ite masih maté secare rohani lantaran pelanggaran-pelanggarante, Ie ngidupang ite malik bareng-bareng kance Almasih. Jari, cume lantaran rahmat Allah, side pade teselametang siq Allah.

⁶Dait léq dalem Deside Isa Almasih, Allah ngidupang ite malik bareng kance Deside Isa, adéq ite mréntah ngiring Ie léq sorge.

⁷Allah ngelaksaneang nike adéq léq jaman saq gen dateng, manusie bau serioq berembé beléq rahmat-Ne saq tenyatayang tipaq ite langan kesolahan-Ne langan perantarean Deside Isa Almasih.

⁸Séngaq lantaran rahmat Allah side pade teselametang langan iman; nike ndéqne hasil usahende, laguq teicanin siq Allah,

⁹nike ndéqne hasil pegawéande: Sampunang araq dengan saq nyombongang diriqne.

¹⁰Séngaq ite niki ciptean Allah, dait langan Deside Isa Almasih, Allah miaq ite adéq ite ngelaksaneang hal-hal saq solah saq sampun Ie siepang umaq ite.

¹¹Semeton senamian saq ndéq dengan Yahudi! Pade inget keadaande léq waktu saq laéq: Side pade tesebut “dengan ndéq besunat”, siq dengan Yahudi saq ngaku diriqne tesunat (maksutne saq sampun mauq tande saq tepiaq siq manusie léq awak ie pade).

¹²Léq waktu nike side pade idup jaoq léman Almasih, side pade dengan pendateng saq ndéq termasuk umat piléqan Allah, Israel. Side pade ndéq termasuk léq dalem iketan perjanjian saq tepiaq siq Allah kance umat-Ne. Side pade idup léq dunie niki ndéqne bedowé harepan dait ndéqne bedowé Allah.

¹³Laguq mangkin, lantaran side pade sampun léq dalem Deside Isa Almasih, side pade saq laéq jaoq, sampun terapetang siq ninggalne Almasih.

¹⁴Séngaq Almasih nike damé sejahterente, saq sampun pesopoq kedue pihak dait saq sampun ngerobohang tembok saq misahang, nike permusuhan.

¹⁵ Séngaq siq ninggal-Ne sebagé manusie Ie sampun batalang Hukum Taurat kance selapuq préntah dait ketentuanne, jari nyipteang keduene tejariang sopoq manusie baru léq dalem diriq-Ne, dait siq care nike ngaraqang damé sejahtere.

¹⁶ Siq ninggal-Ne léq kayuq salib, Almasih daméang keduene kance Allah, sehingge ndéq araq malik permusuhan.

¹⁷ Keranaq nike Almasih rauh dait beriteang damé sejahtere tipaq side; léq side pade dengan bangse-bangse lain saq laéq jaoq léman Allah, dait tipaq dengan Yahudi saq rapet kance Allah.

¹⁸Siq perantarean Almasih, ite selapuq -- dengan Yahudi atao dengan bangse-bangse lain -- léq dalem sopoq Roh, bau parek tipaq Bapa.

¹⁹Keranaq nike, side pade ndéq malik termasuk dengan pendateng atao dengan luah. Mangkin side pade bareng-bareng jari dengan-dengan saq tehususang bagi Allah. Side pade anggote-anggote keluarge Allah.

²⁰Side pade éndah tepenganjeng léq atas dasar saq tetoloq siq rasul-rasul dait nabi-nabi, dait Deside Isa Almasih saq jari batu utame.

²¹Ie saq nyusun selapuq bangunan nike jari Gedéng Allah saq suci.

²²Léq dalem Almasih, side pade kenyeke tepenganjeng éndah bareng kance dengan-dengan lain jari taoq Allah meneng langan Roh-Ne.