Read KITAB SUCI ZABUR INJIL EPESUS 3 Bible Online

EPESUS 3 - KITAB SUCI ZABUR INJIL bible

EPESUS 3

¹Keranaq nike tiang, Paulus, tebui lantaran Deside Isa Almasih jari kepentingan side pade dengan bangse-bangse lain.

²Pasti side pade sampun dengah mengenai tugas saq tepercayeang léq tiang jari nyampéang rahmat Allah tipaq side pade.

³Allah nyatayang rahasie rencane-Ne léq tiang langan wahyu. (Mengenai hal niki sendéqmanne sampun tiang tulis secare singket,

⁴ dait lamun side pade bace, side pade gen paham rahasie mengenai Almasih, maraq saq tiang pahamin.)

⁵Laéq rahasie nike ndéq uwah tesampéang tipaq manusie, laguq mangkin Roh Allah sampun nyatayang tipaq rasul-rasul dait nabi-nabi-Ne.

⁶Rahasie nike maraq niki: Langan Kabar Solah nike, dengan saq ndéq Yahudi milu jari ahli-ahli waris dait anggote léman sopoq awak, dait milu nerimaq napi saq tejanjiqang siq Allah langan Deside Isa Almasih.

⁷Tiang niki hambe léman Kabar Solah nike, sesuai rahmat saq teicanin siq Allah. Tiang nerimaq rahmat nike menurut karye kuase Allah.

⁸Léq antare selapuq dengan-dengan saq tehususang bagi Allah, tiang saq paling hine. Laguq Allah ngicanin tiang rahmat niki: Tugas jari beriteang Kabar Solah tipaq dengan-dengan saq ndéq Yahudi mengenai kesugihan Almasih saq ndéq iniq bis nike;

⁹dait éndah adéq langan tiang selapuq dengan nenaoq berembé Allah, pencipte alam semeste niki, ngelaksaneang rencane-Ne saq léman laéq gati terahasieang tipaq dunie.

¹⁰Maksut Allah nike adéq mangkin, langan jemaah, tesampéang macem-macem hikmat Allah tipaq pemréntah-pemréntah dait penguase-penguase léq sorge.

¹¹Allah ngelaksaneang nike pade maraq rencane-Ne saq kekel, saq Ie laksaneang siq perantarean Deside Isa Almasih, Junjungante Saq Mulie.

¹²Léq dalem Almasih ite jari bani parek tipaq Allah siq penoq keyakinan langan imante tipaq Ie.

¹³Keranaq nike, saq tiang tunas: Ndaq putus ase serioq penderitean tiang lantaran side pade, séngaq selapuqne nike kemulieande.

¹⁴Keranaq nike tiang sujut léq arepan Bapa.

¹⁵Léman Ie sebilang keluarge léq sorge dait léq gumi nerimaq aranne.

¹⁶Tiang bedo'e adéq Allah menurut kemuliean-Ne saq melimpah neguqang batinde siq Roh-Ne.

¹⁷Sehingge siq iman side pade, Almasih meneng léq dalem aténde, dait side berakah kuat maraq lolo kayuq serte tedasarang léq dalem kasih.

¹⁸Tiang bedo'e semoge bareng-bareng kance selapuq dengan saq tehususang bagi Allah, side pade bau paham mengenai berembé galuh dait bélone serte atasne dait dalemne kasih Almasih,

¹⁹saq menurut akal manusie ndéqne bau tepahamin sedalem-dalemne. Tiang bedo'e adéq side pade kenal kasih Almasih nike, sehingge side pade tepenoqin dalem selapuq kesempurnean Allah.

²⁰Bagi Allah, saq sanggup ngelaksaneang jaoq luwéqan léman napi saq ite do'eang atao pikirang, sesuai kuase-Ne saq bekarye léq dalem ite,

²¹bagi Ie kemuliean léq dalem jemaah dait léq dalem Deside Isa Almasih turun temurun jangke selaéq-laéqne! Amin.