Read KITAB SUCI ZABUR INJIL EPESUS 5 Bible Online

EPESUS 5 - KITAB SUCI ZABUR INJIL bible

EPESUS 5

¹Keranaq nike side pade harus turut teladan Allah, séngaq side pade bije-bije saq tekasihin siq Allah.

² Idupde harus tekuasein siq kasih, maraq Almasih éndah ngasihin ite. Ie ngurbanang diriq-Ne umaq ite, jari sopoq persembahan saq sengéh dait kurban saq nyenengang Allah.

³Laguq perbuatan-perbuatan saq cabul dait saq ndéq patut, atao serakah, ndaq gati teraosang léq tengaq-tengaq side pade -- mule maraq nike sepatutne dengan-dengan saq tehususang bagi Allah.

⁴Ndéqne patut éndah side ngucapang raos saq kotor saq ndéq araq manpaatne dait saq ndéq pantes. Sebalikne side pade harus ngucapang syukur tipaq Allah.

⁵Pade perhatiang solah-solah: Dengan saq gawéq perbuatan saq cabul, atao ndéq patut, atao serakah (kelakuan maraq nike pade doang maraq nyembah berhale), dengan nike ndéqne mauq bagian léq dalem Kerajaan Almasih dait Allah.

⁶Ndaq side pade tetipu siq raosan-raosan saq kosong. Séngaq hal-hal niki saq datengang murke Allah tipaq dengan-dengan durhake.

⁷Jari, ndaq gati berubungan kance dengan-dengan maraq nike.

⁸Laéq side mésaq araq léq dalem peteng. Mangkin side pade sampun jari terang léq dalem Tuhan. Keranaq nike side pade harus idup sebagé bije-bije terang.

⁹Séngaq terang cume ngasilang kesolahan dait keadilan dait kebenaran.

¹⁰Pade berusahe jari nguji napi saq nyenengang Tuhan.

¹¹Ndaq gawéq perbuatan-perbuatan saq ndéq araq manpaatne saq tegawéq siq dengan-dengan saq idup léq dalem peteng. Sebalikne, side pade harus nyatayang kesalaqan-kesalaqanne. (

¹²Séngaq hal-hal saq ie pade laksaneang nyeboq-nyeboq nike, jari teraosang doang sampun merilaq gati.)

¹³Selapuq hal saq teperhatiang léq dalem menah, gen pedas penggitan.

¹⁴Séngaq selapuq saq penggitan nike terang. Keranaq nike tesampéang maraq niki, “Pade ures, hai side saq tindoq, dait idup léman ninggal! Almasih gen becahaye léq atasde.”

¹⁵Keranaq nike, pade perhatiang solah-solah berembé side idup. Ndaq idup maraq dengan-dengan bodo; pade idup maraq dengan-dengan saq bijaksane.

¹⁶ Manpaatang solah-solah selapuq kesempatan saq araq léq side, séngaq jaman niki jaman saq jahat.

¹⁷Ndaq bodo, laguq selidik napi saq tekayunang siq Tuhan.

¹⁸Ndaq side pade bowos siq anggur, séngaq nike gen nyédaq side pade. Sebalikne side pade harus tekuasein siq Roh Allah.

¹⁹ Léq waktu side pade ngeraos, kadu ucapan-ucapan saq araq léq dalem Zabur, nyanyiang pujian bagi Allah dait lagu rohani. Side pade harus memuji Tuhan siq sepenoq angen.

²⁰Sebilang waktu dait léq hal napi juaq side harus besyukur léq Allah Bapa, siq peséngan Deside Isa Almasih, Junjungante Saq Mulie.

²¹Jari hormatin Almasih, side harus saling hormatin sopoq kance saq lain.

²² Hai senine, tunduk léq semamende, maraq tipaq Tuhan.

²³Séngaq semame nike jari kepale léq seninene, pade maraq Almasih éndah jari kepale léq jemaah dait Ie éndah saq nyelametang jemaah saq jari rage-Ne.

²⁴Pade maraq jemaah éndah tunduk léq Almasih, maraq nike éndah léq dalem selapuq hal, senine harus tunduk léq semame.

²⁵ Hai semame, kasihin seninende, pade maraq Almasih ngasihin jemaah dait ngurbanang diriq-Ne umaq jemaah nike.

²⁶Almasih ngelaksaneang nike jari nyuciang jemaah, sesampun Ie persiq siq baptisan dait manik-Ne.

²⁷Siq care nike Almasih miaq jemaah nike bau nganjeng secare agung dait murni léq arepan-Ne, ndéq araq bedowé cacat atao cele.

²⁸Maraq nike éndah semame harus ngasihin seninene maraq ie ngasihin awakne mésaq. Dengan saq ngasihin seninene artine ie ngasihin diriqne mésaq. (

²⁹Ndéq uwah araq dengan saq meriq léq awakne mésaq. Sebalikne, ie peliharaq dait jagaq, maraq Almasih éndah peliharaq jemaah-Ne.

³⁰Ite nenaoq hal nike, séngaq ite anggote-anggote rage Almasih.)

³¹ Léq dalem Kitab Suci tetulis, “Keranaq nike sopoq dengan mame gen bilin inaq amaqne dait besopoq kance seninene, dait deduaqne gen jari sopoq.”

³²Ayat nike bedowé maqne saq dalem. Dait tiang hubungang hal nike antare Almasih kance jemaah.

³³Laguq ayat nike araq éndah hubunganne kance side pade. Sebilang semame harus ngasihin seninene maraq ie ngasihin diriqne mésaq dait sebilang senine harus berusahe hormat léq semamene.