Read KITAB SUCI ZABUR INJIL EPESUS 6 Bible Online

EPESUS 6 - KITAB SUCI ZABUR INJIL bible

EPESUS 6

¹ Kanak-kanak saq jari pengiring Almasih, harus taat léq dengan toaqde séngaq hal nike saq patut telaksaneang.

² “Pade hormatin amaqde dait inaqde”. Nike préntah Allah saq penembéq saq berisi janji,

³“Adéq side bahagie dait bélo umurde léq gumi.”

⁴ Semeton senamian saq jari amaq! Ndaq perlakuang bije-bijende semélé angende sehingge ie pade jari sili. Sebalikne, didik ie pade léq dalem pengajahan dait naséhat Tuhan.

⁵ Semeton senamian saq jari hambe! Pade turut préntah tuande saq léq dunie niki. Laksaneang hal nike siq rase hormat dait patuh serte pacu-pacu, pade maraq side pade laksaneang tipaq Almasih.

⁶Ndaq side bekelakuan maraq nike cume léq waktu side teawasin, cume jari teajum siq manusie. Laguq side pade harus laksaneang sebagé hambe Almasih saq kenyeke turut pekayunan Allah sepenoq angen.

⁷Pegawéan saq side pade laksaneang sebagé hambe nike, harus side pade laksaneang siq até saq gembire maraq Tuhan saq side pade layanin, dait ndéqne manusie.

⁸Pade inget bahwe sebilang dengan, timaq hambe atao dengan merdéke, lamun ie ngelaksaneang hal-hal saq solah, ie gen nerimaq balesan léman Tuhan.

⁹ Semeton senamian saq jari tuan! Side pade harus bekelakuan maraq nike éndah léq hambe-hambende. Ndaq malik kadu anceman-anceman. Inget bahwe side pade dait hambe-hambende nike pade-pade bedowé sopoq Tuan, nike Tuhan saq léq sorge. Ie nénten béde-bédeang dengan.

¹⁰Ahirne, side harus jari kuat siq kekuatan saq side pade mauq léman kuase Tuhan, séngaq side pade araq léq dalem Tuhan.

¹¹Pade kadu selapuq perlengkapan perang saq teicanin siq Allah, adéq side pade bau tahen ngelawan siasat-siasat Belis saq licik nike.

¹²Séngaq ite bejuang ndéqne ngelawan manusie, laguq ngelawan selapuq kekuatan sétan-sétan saq nguasein jaman saq jahat niki. Ite ngelawan roh-roh jahat saq araq léq awang-awang.

¹³Keranaq nike, mangkin, pade kadu selapuq perlengkapan perang Allah, adéq léq jelo saq jahat, side pade sanggup ngelawan serangan-serangan musuh. Dait adéq sesampun side pade bejuang jangke tutuq, side pade masih gagah perkase.

¹⁴ Side pade harus tetep bejage-jage. Pade kadu kesetieande léq Allah jari sabuk, dait ketulusan jari kelambi besinde.

¹⁵ Kerédeande jari beriteang Kabar Solah damé sejahtere jari sepatunde.

¹⁶Sebilang waktu kadu percayende tipaq Tuhan jari senjate penangkis, siq care nike side pade bau kalahang selapuq anak panaq berapi léman si jahat.

¹⁷ Pade bait keselametan jari songkoq waje, dait Manik Allah jari kléwang léman Roh Allah.

¹⁸Laksaneang selapuqne nike sambil bedo'e jari tunas pertulungan léman Allah. Léq sebilang kesempatan, pade bedo'e léq dalem Roh dait side pade harus tetep bejage-jage léq dalem do'ende nike siq petunasan saq ndéq araq tutuqne umaq selapuq dengan-dengan saq tehususang bagi Allah.

¹⁹Dait do'eang tiang éndah, adéq léq waktu tiang ngeraos, Allah ngicanin tiang ucapan-ucapan saq tepat. Dait adéq tiang bani jari nyampéang rahasie Kabar Solah nike.

²⁰Lantaran Kabar Solah léman Allah nike, tiang jari sopoq utusan, dait mangkin araq léq dalem bui. Pade bedo'e adéq tiang bani ngeraos mengenai Kabar Solah nike, berembé tiang harus ngeraos.

²¹ Tikikus, semetonte dait pelayan saq setie dalem karye Tuhan, gen badaq side selapuq hal mengenai tiang, adéq side pade nenaoq keadaan tiang dait pegawéan tiang.

²²Keranaq nike tiang ngutus ie tipaq side, jari badaq side selapuq keadaan tiang pade, adéq ie beléqang angende.

²³Damé sejahtere dait kasih dait iman léman Allah, Bapa dait léman Junjungan Saq Mulie Deside Isa Almasih araq bareng kance semeton senamian.

²⁴Rahmat Allah araq bareng kance selapuq dengan saq ngasihin Junjungante Saq Mulie Deside Isa Almasih siq kasih saq kekel.