Read KITAB SUCI ZABUR INJIL PILIPI 1 Bible Online

PILIPI 1 - KITAB SUCI ZABUR INJIL bible

PILIPI 1

¹ Selapuq dengan-dengan saq tehususang bagi Allah saq araq léq Pilipi, dait saq sampun léq dalem Deside Isa Almasih. Dait semeton-semeton pengawas dait pelayan jemaah! Tiang, Paulus, kance Timotius, hambe-hambe Deside Isa Almasih, beharep semoge

²rahmat dait sejahtere léman Allah, Bapante, dait Junjungan Saq Mulie Deside Isa Almasih araq bareng kance side pade.

³Tiang ngucap syukur tipaq Allah, sebilang tiang inget léq side pade.

⁴Dait sebilang tiang do'eang side selapuq, Tiang bedo'e siq sukecite.

⁵Tiang besyukur tipaq Allah séngaq side pade sampun nulung tiang nyampéang Kabar Solah léman Allah mulai léman jelo penembéq jangke mangkin niki.

⁶Séngaq léq dalem atén tiang, tiang yakin bahwe Allah, saq sampun mulai karye saq solah léq dalem diriqde gen nutuqang éndah jangke kerauhan Deside Isa Almasih.

⁷Mule patut tiang bedowé perasaan maraq nike léq side pade, séngaq selapuqde tetep araq léq angen tiang. Dait side pade éndah sampun bareng kance tiang nerimaq rahmat saq sampun teicanin siq Allah tipaq tiang sewaktu tiang masih léq bui dait sewaktu tiang béle dait pertahenang Kabar Solah nike.

⁸Séngaq Allah nike saksi tiang bahwe tiang tetu-tetu kangen léq side siq rase kasih léman Deside Isa Almasih.

⁹Niki do'e tiang umaq side pade: Semoge kasih side pade sayan luwéq léq dalem penenaoq saq kenaq dait léq dalem selapuq pengertian.

¹⁰Sehingge side pade tao piléq napi saq paling solah. Siq care nike, jangke kerauhan Almasih side pade jari suci dait ndéq bedowé cacat cele,

¹¹penoq siq kebajikan, saq cume bau tehasilang siq Deside Isa Almasih, jari kemuliean dait pujian bagi Allah.

¹²Tiang mélé side pade nenaoq bahwe hal-hal saq sampun telaksane léq tiang, malahan jari penyebap luwéqan malik dengan dengah dait percaye léq Kabar Solah nike.

¹³ Akibatne, selapuq pengawal istane dait selapuq dengan lain nenaoq bahwe tiang tebui lantaran tiang jari pelayan Almasih.

¹⁴Dait keadaan tiang saq tebui niki sampun miaq luwéq semeton-semeton seiman léq kote niki jari sayan yakin léq dalem Tuhan, sehingge ie pade sayan bani, ndéqne takut-takut malik ngabarang Manik Allah.

¹⁵Mule araq pire dengan léq antare ie pade saq beriteang Almasih lantaran talon até dait mélé betungkasan, laguq saq lainne beriteang Almasih séngaq bedowé maksut saq solah.

¹⁶Ie pade saq beriteang siq maksut saq solah ngelaksaneang hal nike lantaran kasih, séngaq ie pade nenaoq bahwe tiang araq léq dalem bui jari béle Kabar Solah léman Allah nike.

¹⁷Laguq dengan saq lain beriteang Almasih siq maksut saq ndéq ihlas; ie pade beriteang jari kepentinganne mésaq. Siq care nike ie pade beharep bau miaq tiang jari sayan susah léq dalem bui.

¹⁸Laguq ndéqne kembé-kembé! Séngaq napi juaq maksutne, jujur atao palsu, saq penting Almasih teberiteang éndah; tiang jari seneng. Dait tiang gen tetep merase maraq nike,

¹⁹séngaq tiang nenaoq bahwe siq do'e-do'ende dait siq bantuan léman Roh Deside Isa Almasih, tiang gen tebébasang.

²⁰Séngaq saq tiang melétang gati dait saq tiang harepang nike, adéq léq dalem selapuq hal tiang ndéq teperilaq. Sebalikne tiang beharep adéq sebilang waktu, terutame gati mangkin, tiang bani sehingge siq selapuq awak dait roh tiang -- timaq tiang idup atao maté -- Almasih temulieang.

²¹Séngaq bagi tiang idup nike umaq Almasih dait maté nike keuntungan.

²²Laguq lamun tiang idup léq dunie niki, tiang harus begawéan dait beramal. Jari mbé saq harus tiang piléq, mindah tiang.

²³Tiang teantuq léman due pihak. Tiang melét gati bilin dunie niki, terus lalo dait araq bareng kance Almasih, séngaq nike jaoq solahan;

²⁴laguq, jari kepentingan side, solahan lamun tiang masih ndot léq dunie.

²⁵Tiang yakin léq hal nike. Keranaq nike tiang nenaoq tiang gen tetep ndot bareng kance side pade, adéq side pade sayan maju dait besukecite léq dalem iman.

²⁶Keranaq nike, laun lamun tiang tulak ojok side, kebanggean side pade léq dalem Deside Isa Almasih gen sayan luwéqan malik lantaran tiang.

²⁷Cume, padeang idupde kance Kabar Solah mengenai Almasih, adéq lamun tiang dateng, tiang bau serioq, atao lamun tiang ndéq dateng, tiang bau dengah bahwe side pade tetep araq léq dalem sopoq roh dait siq sopoq angen bejuang bareng-bareng léq dalem iman saq asalne léman Kabar Solah léman Allah nike.

²⁸Side pade harus tetep bani: Ndaq side pade takut léq musuh-musuhde. Bagi ie pade, selapuqne nike tande kebinasean, laguq umaq side pade nike tande keselametan saq asalne léman Allah.

²⁹Séngaq Allah sampun ngicanin paice tipaq side pade ndéqne cume jari percaye léq Almasih, laguq jari menderite éndah bagi Almasih.

³⁰ Mangkin side pade milu éndah kance tiang dalem perjuangan saq pade maraq saq laéq side serioq léq tiang, dait saq mangkin side dengah mengenai tiang.