Read KITAB SUCI ZABUR INJIL PILIPI 2 Bible Online

PILIPI 2 - KITAB SUCI ZABUR INJIL bible

PILIPI 2

¹Jari, lantaran léq dalem Almasih araq naséhat, araq penghiburan kasih, araq persahabatan léq dalem Roh Suci, araq rase saling kasihin dait belas kasihan,

²sempurneang sukecite tiang siq hal-hal niki: Side pade harus sopoq angen dait sopoq pikiran, léq dalem sopoq kasih, sopoq jiwe, sopoq tujuan.

³Ndaq ngelaksaneang napi juaq lantaran jari kepentingan mésaq, atao jari nyombongang diriq. Sebalikne, side pade sopoq-sopoq harus rendah até anggep dengan lain solahan tebanding diriqde mésaq.

⁴Sebilang dengan ndaq cume merhatiang kepentinganne mésaq, laguq kepentingan dengan lain éndah.

⁵Side pade harus bedowé pikiran maraq Deside Isa Almasih:

⁶Séngaq timaq Ie bedowé sipat ilahi, laguq Ie nénten nganggep bahwe keadaan-Ne saq ilahi nike harus tepertahenang.

⁷Sebalikne, Ie lepas selapuqne terus jari pade maraq sopoq hambe. Ie jari pade maraq manusie. Dait léq dalem keadaan sebagé manusie,

⁸Ie ngerendahang diriq-Ne dait taat jangke ninggal -- malahan jangke ninggal léq kayuq salib.

⁹Keranaq nike Ie tetinggiang gati siq Allah dait Ie teicanin peséngan saq atasan léman selapuq peséngan.

¹⁰ Adéq léq dalem peséngan Deside Isa Almasih, selapuq mahluk saq léq sorge, dait saq léq gumi, dait saq léq bawaq gumi, gen sujut léq arepan-Ne.

¹¹Dait selapuq biwih gen ngaku, “Deside Isa Almasih nike Junjungan Saq Mulie,” bagi kemuliean Allah, Bapante.

¹²Semeton senamian saq tiang kasihin, side pade tetep taat, keranaq nike jari dengan saq sampun teselametang, side pade harus ngamalang hal-hal saq kenaq, siq rase hormat dait patuh léq Allah, ndéqne cume maraq sewaktu tiang araq léq tengaq-tengaq side pade, laguq lebihan malik mangkin, sewaktu tiang jaoq léman side pade,

¹³séngaq Allah mésaq saq bekarye léq dalem diriqde jari miaq side pade réde dait sanggup ngelaksaneang menurut maksut Allah saq solah.

¹⁴Laksaneang napi juaq siq care ndaq ngerumun dait betungkasan.

¹⁵ Adéq side pade ndéq araq cacat cele dait murni, sebagé bije-bije dowén Allah saq idup tulus dait kenaq léq tengaq-tengaq dengan-dengan jahat dait bedose, sehingge léq antare ie pade, side pade becahaye maraq bintang-bintang léq dalem dunie.

¹⁶Léq waktu nike éndah, side pade harus nyatayang tipaq ie pade Manik Allah saq ngicanin idup. Adéq siq care nike, tiang bau jari bangge sewaktu éraq Deside Isa Almasih rauh malik, séngaq ternyate tiang ndéq sie-sie lelah berusahe.

¹⁷Laguq timaq daraq tiang harus tetumpahang éndah jari kurban bagi Allah dait pengabdian demi imande, tiang cemoh dait tiang besukecite kance side pade selapuq.

¹⁸Maraq nike éndah side pade harus merase seneng dait milu gembire bareng tiang.

¹⁹Léq dalem Junjungan Saq Mulie Deside Isa Almasih, tiang beharep bau aruan ngutus Timotius tipaq side, adéq atén tiang jari tenang séngaq tiang nenaoq hal mengenai side.

²⁰Séngaq dengan saq araq kance tiang, ndéq araq sopoq dengan juaq saq sopoq angen dait sopoq pikiran maraq tiang kance ie dait saq tetu-tetu merhatiang kepentingan side.

²¹Séngaq selapuq saq lainne cume ngurus kepentingan diriqne mésaq doang, ndéqne kepentingan Deside Isa Almasih.

²²Side nenaoq bahwe kesetieanne sampun teuji. Ie sampun begawéan bareng kance tiang jari nyampéang Kabar Solah léman Allah. Tiang pade kance due maraq anak kance amaq.

²³Keranaq nike jelap sesampun tiang nenaoq berembé jarine pelekare tiang laun, tiang gen ngutus ie ojok side.

²⁴Laguq tiang percaye léq dalem Tuhan, bahwe tiang mésaq ndéqne pire ngonéq malik gen dateng éndah jangoq side pade.

²⁵Mengenai semetonte Epaproditus, saq side pade utus jari nulung tiang, tiang anggep perlu suruq ie tulak ojok side. Ie sampun bareng kance tiang léq dalem pegawéan dait perjuangan tiang.

²⁶Séngaq ie sampun kangen gati léq side selapuqne, dait ie ndéq tenang séngaq side pade sampun mauq berite bahwe ie sakit.

²⁷Mule tetu ie sakit jangke gen ninggal. Laguq Allah periak léq ie; dait ndéqne cume ie doang, laguq tiang éndah, adéq tiang ndaq jari sayan sedih malik.

²⁸Keranaq nike sayan beléq éndah angen tiang gen suruq ie tulak ojok side, adéq side pade seneng malik lamun side pade bedait kance ie, dait kuatir tiang jari sayan kurang.

²⁹Jari, terimaq ie siq sukecite léq dalem Tuhan. Hormatin selapuq dengan saq maraq ie.

³⁰Séngaq ie jangke gen ninggal demi pengabdianne tipaq Almasih dait nyawene tetaroqang jari genepang napi saq kurang léq dalem usahe side pade nulung tiang.