Read KITAB SUCI ZABUR INJIL PILIPI 3 Bible Online

PILIPI 3 - KITAB SUCI ZABUR INJIL bible

PILIPI 3

¹Ahirne, semeton-semeton tiang, side pade harus besukecite léq dalem Tuhan. Tiang ndéq merase berat jari nulis malik napi saq sampun tiang tulis tipaq side sendéqmanne; séngaq hal nike solah jari keselametande.

²Onyaq-onyaq léq dengan-dengan saq gawéq hal-hal saq jahat, dengan-dengan saq pantes tesebut acong. Ie pade paksaq adéq dengan-dengan tesunat.

³Séngaq ite niki dengan-dengan saq sampun nerimaq sunat saq sejati, saq beribadah siq Roh Allah, dait jari bangge léq dalem Deside Isa Almasih dait ndéq percaye léq hal-hal saq lahiriah.

⁴Setetune tiang bau doang beharep sepenoq angen léq hal-hal saq lahiriah nike. Séngaq lamun araq dengan saq merase ie bedowé alasan jari beharep sepenoq angen léq hal-hal saq lahiriah, tiang lebihan malik.

⁵ Tiang tesunat sewaktu beumur baluq jelo. Tiang tebijeang jari dengan Israel, léman suku bangse Benyamin; tiang dengan Ibrani tulén. Dalem hal ketaatan léq Hukum-hukum Taurat, tiang niki anggote golongan Parisi.

⁶ Malahan tiang semanget gati sehingge tiang nganiaye jemaah. Lamun tenilai menurut Hukum Taurat, tiang dengan saq solah saq ndéq bedowé cacat cele.

⁷Laguq lantaran Almasih, make selapuqne saq laéq tiang anggep untung, mangkin selapuqne nike tiang anggep rugi.

⁸Ndéqne hal-hal nike doang; laguq malahan selapuq hal tiang anggep hal-hal saq ngerugiang doang. Saq tiang épéang mangkin niki lebih mulie: Kenal kance Deside Isa Almasih, Junjungan tiang Saq Mulie. Lantaran Almasih, make tiang sampun lepas selapuqne. Tiang anggep selapuqne nike maraq dedoro doang, adéq tiang mauq Almasih,

⁹dait araq léq dalem Ie ndéqne siq kebenaran tiang mésaq lantaran taat léq Hukum Taurat, laguq siq kebenaran lantaran percaye léq Almasih, nike kebenaran saq teicanin siq Allah, siq dasar percaye léq Deside Isa Almasih.

¹⁰Sopoq-sopoqne saq tiang melétang nike adéq tiang kenal kance Almasih dait ngalamin kuase saq ngidupang Ie léman ninggal. Tiang melét milu menderite bareng kance Ie dait jari pade maraq Ie dalem hal ninggal-Ne.

¹¹Adéq léq penutuqne tiang mésaq gen teidupang malik léman tengaq-tengaq dengan ninggal.

¹²Tiang ndéq paran bahwe tiang sampun berhasil atao sampun jari sempurne, laguq tiang tetep berusahe, sang tiang iniq mauq, séngaq tiang éndah sampun tebau siq Deside Isa Almasih.

¹³Semeton senamian, tiang ndéq merase bahwe tiang sampun berhasil ngerebut hadiah nike. Laguq araq sopoq hal saq tiang laksaneang, tiang ngelupaqang napi saq araq léq mudin tiang, dait berusahe keras adéq tiang mauq napi saq araq léq julun tiang.

¹⁴Dait pelai terus tipaq tujuan adéq mauq hadiah, dait tiang temanikang siq Allah léman sorge langan Deside Isa jari mauq hadiah nike.

¹⁵Ite selapuq saq sampun déwase secare rohani, harus bedowé pikiran maraq nike. Laguq lamun léq antare side araq saq lain pendapetne, make Allah gen jelasang éndah hal nike léq side.

¹⁶Laguq ite harus idup menurut napi saq sampun ite turut jangke mangkin niki.

¹⁷ Semeton senamian! Silaq turut teladan tiang. Pade perhatiang selapuq dengan saq idup menurut teladan saq sampun tiang pade béng léq side.

¹⁸Séngaq tiang sampun rimpes gati badaq side, dait mangkin tiang ulang malik sambil tiang nangis, bahwe araq luwéq dengan saq idup jari musuh salib Almasih.

¹⁹Idup dengan-dengan maraq nike gen tutuq léq keancuran, séngaq Tuhan ie pade, tianne mésaq. Hal-hal saq merilaq, malahan nike saq ie pade banggeang; séngaq ie pade cume mikirang hal-hal saq araq léq dunie niki doang.

²⁰Laguq ite niki warge sorge, dait léman derike éndah ite ngantos, Junjungan Saq Mulie Deside Isa Almasih sebagé Juruselamet.

²¹Awakte saq lemah niki gen terobah siq Almasih jari maraq rage-Ne mésaq saq mulie. Ie bau ngelaksaneang nike lantaran Ie bedowé kuase jari ngalahang selapuq-lapuqne.