Read KITAB SUCI ZABUR INJIL PILIPI 4 Bible Online

PILIPI 4 - KITAB SUCI ZABUR INJIL bible

PILIPI 4

¹Keranaq nike, semeton-semeton tiang saq tiang kasihin dait saq tiang kangen, saq jari sukecite dait mahkote tiang, side pade harus tetep teguq léq dalem Tuhan!

²Tiang tunas tipaq Euodia dait Sintike adéq ie pade sopoq angen dait sopoq pikiran léq dalem Tuhan.

³Tipaq batur tiang saq setie, tiang tunas adéq side tulung semeton-semeton nike. Deduaqne sampun lelah begawéan bareng kance tiang jari beriteang Kabar Solah léman Allah; pade maraq Klémen dait selapuq dengan lainne saq begawéan bareng kance tiang. Aran-aran ie pade araq tetulis léq dalem Kitab Kehidupan.

⁴Semoge side pade tetep besukecite léq dalem Tuhan. Karing sekali tiang ucapang: Pade besukecite!

⁵Kelakuande saq solah harus teserioq siq selapuq dengan: Séngaq ndéqne ngonéq malik Tuhan gen rauh.

⁶Ndaq side pade kuatir léq napi juaq. Laguq nyatayang tipaq Allah selapuq hal saq side melétang dalem do'e dait petunasan siq ucapan syukur.

⁷Damé sejahtere léman Allah saq ndéqne tepahamin siq pikiran manusie, gen meliharaq até dait pikirande léq dalem Deside Isa Almasih.

⁸Ahirne, semeton senamian, pikirang selapuq saq kenaq, selapuq saq mulie, selapuq saq adil, selapuq saq suci, selapuq saq solah, selapuq saq maiq tedengah, selapuq saq tesebut kebajikan dait patut tepuji, pikirang selapuqne nike.

⁹Laksaneang napi saq side pade perajahin, terimaq, dengah dait serioq léman tiang. Allah sumber damé sejahtere, gen araq bareng kance side pade.

¹⁰Tiang sanget besukecite léq dalem Tuhan, séngaq sesampun bégaq ngonéq, baruq mangkin niki pikiran dait perasaan side pade araq malik tipaq tiang. Perhatian side mule tetep araq, laguq side pade ndéq araq kesempatan.

¹¹Hal niki tiang sampéang ndéqne lantaran tiang kekurangan, séngaq tiang sampun berajah cukupang diriq tiang siq napi saq araq.

¹²Tiang sampun ngalamin idup kekurangan, dait éndah idup saq belebihan. Tiang sampun nenaoq rahasiene ngadepin keadaan napi juaq; timaq nike keadaan makmur atao keadaan miskin, keadaan méwah atao saq kekurangan.

¹³Segale macem keadaan bau tiang hadepin siq kekuatan saq teicanin siq Almasih tipaq tiang.

¹⁴Laguq napi saq side pade laksaneang nike mule solah, bahwe side pade sampun nulung tiang léq waktu tiang susah.

¹⁵ Side pade dengan Pilipi! Side mésaq nenaoq bahwe laéq sewaktu tiang bilin Makedonia, sewaktu Kabar Solah nike tiang beriteang penembéqne, side pade sopoq-sopoqne jemaah saq nulung tiang; side pade sopoq-sopoqne saq milu merase untung dait rugi idup bareng tiang.

¹⁶ Sewaktu tiang léq Tesalonika dait merluang bantuan, lebih léman sekali side pade sampun ngirim bantuan tipaq tiang.

¹⁷Nike ndéqne berarti tiang cume mélé nerimaq bantuan. Saq tiang melétang adéq tiang mauq serioq hasil-hasil saq ngeromboq keuntungande.

¹⁸ Tiang sampun nerimaq selapuqne -- malahan jangke limpah! Selapuq bantuan saq side pade kirim tipaq tiang, sampun tiang terimaq léman Epaproditus. Bantuan-bantuan léman side pade nike maraq sopoq persembahan saq sengéh, sopoq kurban saq nyenengang Allah dait teterimaq siq Allah.

¹⁹Allah tiang gen cukupang selapuq keperluande menurut kesugihan dait kemuliean-Ne léq dalem Deside Isa Almasih.

²⁰Temulieang Allah Bapante selaéq-laéqne! Amin.

²¹Sampéang salam tiang tipaq selapuq dengan saq tehususang bagi Allah léq dalem Deside Isa Almasih. Dait terimaq éndah salam léman semeton-semeton saq araq bareng kance tiang léq deriki.

²²Selapuq dengan saq tehususang bagi Allah léq kote niki, terutame ie pade saq araq léq istane Kaisar, ngirim salam tipaq side pade.

²³Rahmat léman Junjungan Saq Mulie Deside Isa Almasih araq bareng roh side.