Read KITAB SUCI ZABUR INJIL KOLOSE 1 Bible Online

KOLOSE 1 - KITAB SUCI ZABUR INJIL bible

KOLOSE 1

¹Semeton senamian, dengan-dengan saq tehususang bagi Allah léq Kolose, saq percaye léq dalem Deside Isa Almasih! Tiang, Paulus, saq teangkat jari rasul Deside Isa Almasih, -- siq pekayunan Allah --, bareng-bareng kance semetonte Timotius. Rahmat dait damé sejahtere léman Allah, araq bareng kance side pade.

³Tiang pade sampun dengah mengenai iman side pade léq dalem Deside Isa Almasih dait mengenai kasih side pade léq selapuq dengan-dengan saq tehususang bagi Allah. Keranaq nike sewaktu tiang pade do'eang side pade, tiang pade tetep ngucap syukur tipaq Allah, Bapa Junjungante Saq Mulie Deside Isa Almasih.

⁵Keranaq pengharepan, saq tesedieang umaq side pade léq sorge. Mengenai pengharepan nike sampun juluan side pade dengah léq dalem manik kebenaran, nike Kabar Solah léman Allah.

⁶Kabar Solah léman Allah nike nyebar léq seantéro dunie dait terus-menerus datengang berkah, pade maraq saq sampun telaksane léq antare side pade mulai léman side pade dengah dait ngerti mengenai rahmat Allah saq setetune.

⁷Hal nike tesampéang tipaq side siq Epapras, batur saq tiang pade kasihin. Epapras nike pelayan Almasih saq setie begawéan jari kepentingante.

⁸Léman ie tiang pade dengah mengenai kasih side pade saq asalne léman Roh Allah.

⁹Keranaq nike tiang pade tetep bedo'e adéq side pade nerimaq selapuq hikmat dait pengertian saq kenaq, sehingge side pade nenaoq pekayunan Allah secare sempurne.

¹⁰Siq care nike side pade bau idup menurut pekayunan Allah, dait tetep nyenengang Allah, sehingge léq dalem selapuq hal, side pade bau ngasilang hal-hal saq solah. Dait penenaoq side pade mengenai Allah éndah gen sayan beromboq.

¹¹Semoge siq kuase léman Allah saq mulie, side pade teteguqang sehingge side pade sanggup menderite léq selapuq hal secare tekun dait sabar

¹²dait besyukur léq Bapa. Séngaq Bapa nike saq miaq side pade patut nerimaq napi saq tesedieang siq Allah umaq dengan-dengan saq tehususang bagi Allah léq dalem Kerajaan Terang.

¹³Ie sampun bébasang ite léman penguase saq nguasein peteng dait ngalihang ite ojok dalem Kerajaan Bije-Ne saq Ie kasihin.

¹⁴ Siq Bije-Ne nike ite tetebus; artine dose-dosente sampun teampunin.

¹⁵Almasih nike gambar Allah saq nénten penggitan, saq sengake, lebih utame léman selapuq saq tecipteang.

¹⁶Séngaq langan Ie Allah cipteang selapuq hal saq araq léq sorge dait saq araq léq gumi, selapuq hal saq penggitan dait saq ndéq penggitan, lantong selapuq roh saq bekuase dait saq mréntah. Selapuq hal tecipteang siq Almasih dait lantaran Almasih.

¹⁷Sendéqman selapuqne araq, Almasih sampun juluan araq. Dait lantaran Ie éndah make selapuqne araq léq taoqne mésaq-mésaq.

¹⁸ Jemaah nike ibarat ragene, dait Almasih jari sirahne. Ie saq sengake, saq teidupang selaéq-laéqne léq antare dengan ninggal, sehingge Ie jari saq paling utame léman selapuqne.

¹⁹Allah mésaq saq kayun adéq selapuq keilahian Allah saq sempurne, araq éndah secare lengkap léq dalem diriq Bije saq asalne léman Ie.

²⁰ Dait langan Bije nike éndah Allah mutusang jari miaq selapuqne jari solah malik kance Ie -- selapuq saq araq léq gumi dait saq araq léq sorge. Hal nike telaksaneang siq Allah langan Bije-Ne ninggal léq kayuq salib.

²¹Laéq idup side pade jaoq léman Allah dait ngemusuhin Allah léq dalem até dait pikiran maraq saq nyate léman perbuatan side pade saq jahat.

²²Laguq mangkin, siq ninggal Bije-Ne, Allah jariang hubungan side pade kance Ie jari solah malik. Siq care nike side pade bau tejauq ojok arepan Allah dalem keadaan suci, murni dait ndéq bedowé cacat cele.

²³Laguq side pade harus tetep setie percaye dait teguq léq keyakinande nike. Ndaq jangke side pade ngelepas harepan saq sampun teicanin tipaq side pade sewaktu side pade nerimaq Kabar Solah léman Allah. Kabar nike sampun teberiteang tipaq sebilang dengan léq seantéro dunie. Dait lantaran hal nike juaq tiang, Paulus sampun jari pelayan.

²⁴Mangkin tiang seneng menderite jari kepentingande. Séngaq siq penderitean lahiriah tiang, tiang genepang napi saq harus tederite siq Almasih bagi jemaah-Ne, nike rage-Ne.

²⁵Tiang temanikang siq Allah jari pelayan jemaah-Ne demi kepentingande, adéq tiang nyampéang Manik Allah selapuqne tipaq side;

²⁶nike rahasie saq sampun berabad-abad ngonéqne terahasieang siq Allah léq selapuq dengan, laguq mangkin tenyatayang siq Allah tipaq umat-Ne.

²⁷Tipaq umat-Ne nike Allah kayun nyatayang berembé bagusne dait agungne rahasie nike umaq selapuq bangse. Rahasie nike: Almasih araq léq dalem diriqde. Nike artine bahwe side pade bedowé pengharepan jari mauq kemuliean.

²⁸Almasih nike saq tiang pade beriteang tipaq selapuq dengan. Tiang pade béng naséhat dait ngajah ie pade selapuq siq kebijaksanean. Tujuan tiang pade adéq sebilang dengan bau tejauq tipaq Allah jari dengan-dengan saq sampun déwase léq dalem Almasih.

²⁹Adéqne bau telaksane hal nike, tiang pacu-pacu begawéan. Tiang berusahe siq selapuq kekuatan saq teicanin siq Allah léq tiang, dait saq bekarye léq dalem diriq tiang siq penoq kuase.