Read KITAB SUCI ZABUR INJIL 1 TESALONIKA 2 Bible Online

1 TESALONIKA 2 - KITAB SUCI ZABUR INJIL bible

1 TESALONIKA 2

¹Semeton senamian! Side mésaq nenaoq bahwe kedatengan tiang pade ojok taoqde ndéqne sie-sie.

² Side pade nenaoq bahwe sendéqman tiang pade dateng ojok side léq Tesalonika, tiang pade sampun teaniaye dait tehine léq Pilipi. Laguq siq pertulungan Allah, tiang pade jari bani beriteang tipaq side pade Kabar Solah saq asalne léman Allah léq dalem perjuangan saq berat.

³Séngaq naséhat tiang pade ndéqne berasal léman kesesatan; dait ndéqne éndah siq maksut saq ndéq murni atao jari nipu.

⁴Tetu-tetu ndéqne maraq nike! Tiang pade ndéq ngeraos jari nyenengang angen dengan, laguq jari nyenengang Allah, saq nguji atén tiang pade. Séngaq tiang pade teanggep patut siq Allah jari nyampéang Kabar Solah nike.

⁵Side mésaq nenaoq bahwe tiang pade ndéq uwah ngeraos saq manis-manis atao ngakalang side pade jari seboq maksut-maksut serakah. Allah jari saksine!

⁶Tiang pade ndéq éndah berusahe adéq teajum siq dengan -- timaq léman side pade atao dengan lain. Setetune sebagé rasul Almasih, tiang pade bau doang nuntut napi juaq léman side pade.

⁷Laguq tiang pade secare lemah lembut sewaktu tiang araq léq tengaq-tengaq side pade, maraq sopoq inaq saq peliharaq bije-bijene.

⁸Lantaran kasih sayang tiang pade, tiang pade réde ngebéng side ndéqne cume Kabar Solah saq léman Allah nike, laguq idup tiang pade éndah. Séngaq tiang pade tetu-tetu ngasihin side pade!

⁹Pasti side pade masih inget berembé kerasne tiang pade berusahe dait bejuang. Kenjelo kekelem tiang pade begawéan adéq tiang pade ndéq nyusahang sai juaq léman side pade sewaktu tiang pade nyebarang Kabar Solah saq léman Allah nike tipaq side.

¹⁰Tiang pade idup soléh, adil dait ndéq araq cacat cele tipaq side pade saq sampun percaye léq Almasih. Side pade jari saksi-saksi tiang pade, maraq nike éndah Allah.

¹¹Side pade nenaoq bahwe tiang pade perlakuang side pade sopoq-sopoq maraq sopoq amaq saq perlakuang bije-bijene.

¹²Tiang pade ngebéng semanget tipaq side dait sanget siq tiang pade tunas adéq side pade idup menurut pekayunan Allah, saq sampun ngemanikang side pade tame ojok dalem kerajaan dait kemuliean-Ne.

¹³Araq malik sopoq hal lain saq miaq tiang pade tetep besyukur léq Allah. Séngaq waktu tiang pade nyampéang berite léman Allah tipaq side, side pade dengah dait nerimaq Manik Allah nike ndéqne sebagé berite léman manusie, laguq sebagé berite saq tetu-tetu léman Allah, saq kenyeke bekarye léq dalem diriqde saq percaye léq Almasih.

¹⁴ Semeton senamian, hal saq side pade alamin sampun éndah tealamin siq jemaah-jemaah Allah léq Yudea saq jari dowén Deside Isa Almasih. Side pade ngalamin penderitean léman bangsende mésaq, pade maraq saq tealamin siq jemaah-jemaah Allah léq Yudea nike léman dengan-dengan Yahudi.

¹⁵ Dengan-dengan nike saq nyematéq Junjungan Saq Mulie Deside Isa dait nabi-nabi, dait nganiaye tiang pade. Napi saq nyenengang Allah ndéq ie pade peduli dait selapuq manusie ie pade musuhin.

¹⁶Malahan ie pade berusahe ngalangin tiang pade jari beriteang Manik Allah tipaq dengan bangse-bangse lain adéq ie pade mauq keselametan. Siq care nike ie pade terus sayan ngeromboq dose-dose ie pade jangke genep jumlahne. Dait mangkin ie pade tetimpe siq murke Allah.

¹⁷Laguq semeton senamian, sementare waktu tiang jaoq léman side pade -- jaoq léq mate laguq rapet léq angen -- tiang pade sayan kangen kance side dait tetu-tetu berusahe jari jangoq side pade!

¹⁸Tiang pade beniat lumbar jangoq side pade; dait tiang sampun berusahe, laguq Belis ngalangin tiang pade.

¹⁹Setetune side pade harepan dait sukecite tiang pade. Séngaq éraq lamun Junjungante Saq Mulie Deside Isa rauh, dait ite parek léq arepan-Ne, make side pade saq gen jari kebanggean tiang pade.

²⁰Mule side pade niki saq jari kemuliean dait sukecite tiang pade.