Read KITAB SUCI ZABUR INJIL 1 TESALONIKA 3 Bible Online

1 TESALONIKA 3 - KITAB SUCI ZABUR INJIL bible

1 TESALONIKA 3

¹ Ahirne rase kangen tiang pade ndéqne bau tetahen malik. Keranaq nike tiang pade mutusang araqan tiang pade ndot mésaq léq Atena,

²terus tiang pade ngutus semetonte Timotius. Timotius nike pelayan Allah saq begawéan bareng kance tiang pade jari beriteang Kabar Solah mengenai Almasih. Tiang pade ngutus Timotius tipaq side, adéq ie neguqang até side pade dait ngebéng naséhat mengenai iman side pade.

³Siq care nike ndéq araq sopoq dengan juaq léman side pade saq bimbang imanne lantaran penderitean-penderiteante niki. Side mésaq nenaoq bahwe penderitean-penderitean nike sampun jari rencane Allah léq ite.

⁴Sewaktu tiang pade masih araq bareng kance side pade, sampun tiang pade badaq side bahwe ite gen menderite. Dait mule hal nike tetu-tetu sampun telaksane; side pade éndah sampun nenaoq hal nike.

⁵Keranaq nike tiang ngutus Timotius, séngaq tiang melét gati nenaoq berembé imande. Tiang kuatir Belis berhasil gode side pade sehingge selapuq usahe tiang pade jari sie-sie.

⁶ Mangkin Timotius sampun tulak dait sampun nyampéang berite gembire léq tiang pade mengenai iman dait kasih side pade. Ie badaq tiang pade bahwe side pade tetep inget tiang pade léq angende. Dait side pade melét bedait kance tiang pade, pade maraq tiang pade éndah melét bedait kance side pade.

⁷Keranaq nike, semeton senamian, léq dalem selapuq kesusahan dait penderitean tiang pade, tiang pade merase tehibur siq berite mengenai side pade dait siq iman side pade,

⁸sehingge mangkin tiang pade idup malik, asal side pade tetep araq léq dalem Tuhan.

⁹Berembé beléq ucapan syukur tiang pade léq Allah siq selapuq sukecite saq tiang pade alamin léq arepan-Ne lantaran side pade.

¹⁰Kenjelo kekelem tiang pade pacu-pacu bedo'e, adéq tiang pade bau bedait langsung kance side pade, jari cukupang napi saq kurang léq iman side pade.

¹¹Semoge Allah Bapante mésaq, dait Junjungante Saq Mulie Deside Isa ngicanin tiang pade langan jari bedait kance side pade.

¹²Semoge Tuhan ngeromboqang dait pebeléq kasih side pade sopoq kance saq lainne dait tipaq selapuq dengan, pade maraq tiang pade éndah ngasihin side.

¹³Siq care nike Tuhan gen neguqang aténde, sehingge side pade suci dait ndéq bedowé cacat cele léq arepan Allah Bapante, léq waktu Junjungan Saq Mulie Deside Isa rauh teiring siq selapuq dengan saq jari dowé-Ne.