Read KITAB SUCI ZABUR INJIL 1 TESALONIKA 4 Bible Online

1 TESALONIKA 4 - KITAB SUCI ZABUR INJIL bible

1 TESALONIKA 4

¹Ahirne semeton senamian, tiang pade tunas léq side pade dait ngebéng side pade naséhat léq dalem Deside Isa Almasih: Side sampun dengah léman tiang pade berembé side pade harus idup adéq nyenengang pekayunan Allah. Hal nike mule side pade sampun turut, laguq solahan sayan pacu-pacu malik side pade ngelaksaneang.

²Séngaq side pade sampun nenaoq petunjuk-petunjuk saq sampun tiang pade sampéang léq side siq kuase Junjungan Saq Mulie Deside Isa.

³Maraq niki pekayunan Allah, side pade harus jari suci, jaoqang diriqde léman perbuatan saq cabul.

⁴Sebilang dengan mame léq antare side pade harus nenaoq berembé idup kance seninene mésaq dait idup suci dait mulie.

⁵Ndaq idup turut hawe napsu, maraq saq tegawéq siq dengan saq ndéq kenal Allah.

⁶Dalem hal maraq nike, ndaq araq sopoq dengan juaq miaq kesalaqan tipaq semetonne, atao nipu ie. Laéq sampun tiang pade peringet side pade secare keras, bahwe Tuhan gen ngukum dengan-dengan saq miaq kesalaqan-kesalaqan maraq nike.

⁷Allah ngemanikang ite, ndéqne jari gawéq napi saq najis, laguq napi saq suci.

⁸Dengan saq nolaq pengajahan niki, ndéqne nolaq manusie, laguq nolaq Allah saq ngicanin Roh-Ne saq suci tipaq side.

⁹Ndéqne perlu malik tiang pade nulis tipaq side mengenai kasih léq semeton-semeton, séngaq side mésaq sampun berajah saling kasih léman Allah.

¹⁰Dait hal niki sampun side pade nyatayang tipaq selapuq semeton seiman léq selapuq wilayah Makedonia. Laguq, naséhat tiang pade léq semeton senamian, adéq side pade sayan pacu-pacu malik ngelaksaneang hal nike.

¹¹Pade berusahe idup tenang dait ndaq turut campur urusan dengan lain. Side pade harus begawéan boyaq napkah mésaq, pade maraq pesen tiang pade laéq léq side.

¹²Lamun side pade idup maraq nike, side pade ndéq beharep léq sai-sai, dait dengan-dengan lain gen hormat léq side pade.

¹³Semeton senamian, tiang pade melét adéq side pade nenaoq saq setetune mengenai dengan-dengan saq sampun ninggal; adéq side pade ndéq bedukecite maraq dengan-dengan lain saq ndéq bedowé pengharepan.

¹⁴Séngaq lamun ite percaye bahwe Deside Isa sampun ninggal dait idup malik, make ite percaye éndah bahwe Allah gen ngidupang malik dengan saq sampun ninggal léq dalem Deside Isa, dait ngumpulang ie pade bareng-bareng kance Ie.

¹⁵ Mengenai hal nike, niki manik Tuhan saq tiang pade mélé sampéang léq side: Léq waktu Junjungan Saq Mulie Deside Isa rauh, ite saq masih idup ndéq gen senjuluq dengan-dengan saq sampun ninggal.

¹⁶Éraq sewaktu araq tande, léq waktu datu malaékat gen bekuih siq suare saq beléq dait terompét Allah tepuniqang, make Junjungan Saq Mulie Deside Isa mésaq gen turun léman sorge, dait ie pade saq sampun ninggal léq dalem Almasih gen juluan teidupang.

¹⁷Sesampun nike, ite saq masih idup waktu nike gen bareng-bareng teangkat kance ie pade ojok awang-awang jari bedait kance Tuhan léq derike. Terus ite gen ndot kance Tuhan selaéq-laéqne.

¹⁸Keranaq nike, side pade harus saling hibur siq ucapan-ucapan niki.