Read KITAB SUCI ZABUR INJIL 1 TESALONIKA 5 Bible Online

1 TESALONIKA 5 - KITAB SUCI ZABUR INJIL bible

1 TESALONIKA 5

¹Semeton senamian, tiang pade ndéq perlu nulis tipaq side piran waktune saq tepat hal-hal nike gen telaksane.

² Séngaq side mésaq nenaoq secare jelas bahwe jelo kerauhan Tuhan nike gen dateng maraq maling léq kekelem.

³Lamun dengan bebase, “Selapuqne aman dait tentrem,” make waktu nike selung-selung ie pade gen tetimpe siq kebinasean, dait ndéq araq sopoq dengan juaq saq bau luput. Hal nike gen telaksane selung-selung maraq dengan nine saq kenyeke sakit gen nganak.

⁴Laguq side pade ndéqne dengan saq idup léq dalem peteng, sehingge jelo nike miaq side pade tinjot maraq tedatengin maling.

⁵Side pade selapuq bije-bije terang; side pade golongan dengan saq idup léq dalem terang léq waktu tengari. Ite ndéqne dengan saq idup léq dalem peteng, atao golongan dengan saq araq léq kelem saq peteng.

⁶Keranaq nike ndaq ite tindoq maraq dengan-dengan lain. Ite harus bejage-jage dait sadar.

⁷Léq kekelem dengan tindoq, dait léq kekelem éndah dengan jari bowos.

⁸ Laguq ite niki golongan dengan-dengan saq idup léq menah kenjelo; keranaq nike ite harus sadar, kadu kelambi besi, nike kasih dait iman sebagé pelindung, dait kadu ketopong, nike pengharepan keselametan.

⁹Allah nénten nentuang ite jari tehukum, laguq jari teselametang langan Junjungante Saq Mulie Deside Isa Almasih.

¹⁰Ie ninggal umaq ite adéq léq waktu Ie rauh éraq -- napi ite masih idup, atao ite sampun ninggal -- ite bau idup bareng kance Ie.

¹¹Keranaq nike, side pade harus tetep saling naséhatin dait saling neguqang, pade maraq saq kenyeke side pade laksaneang mangkin niki.

¹²Semeton senamian, sanget siq tiang pade tunas adéq side pade hargein dengan-dengan saq lelah begawéan léq tengaq-tengaqde; ie pade saq sampun tepiléq siq Tuhan jari mimpin dait peringet side pade.

¹³Pacu-pacu hormatin ie pade siq kasih lantaran inget napi saq ie pade laksaneang. Pade tetep idup léq dalem damé sopoq kance saq lain.

¹⁴Semeton senamian, tiang pade éndah ngebéng naséhat, peringet ie pade saq idup ndéq tertib; hibur dengan saq kuatir angenne; pade tulung dengan saq lemah dait sabar léq selapuq dengan.

¹⁵Jagaq adéq ndaq araq saq bales kejahatan siq kejahatan. Tetep berusahe jari laksaneang saq solah, sopoq kance saq lain dait tipaq selapuq dengan.

¹⁶Pade tetep besukecite.

¹⁷Dait pade tetep bedo'e.

¹⁸Besyukur léq dalem selapuq hal, séngaq nike saq tekayunang siq Allah léman side pade sebagé dengan saq idup léq dalem Deside Isa Almasih.

¹⁹Ndaq pedaqang Roh,

²⁰dait ndaq ngeréméhang nubuat-nubuat.

²¹Uji selapuq hal dait tegel napi saq solah.

²²Jaoqang diriqde léman segale macem kejahatan.

²³Semoge Allah damé sejahtere nyuciang side selapuqne dait semoge roh, jiwe dait awakde tepeliharaq secare sempurne dait ndéq bedowé cacat cele léq waktu kerauhan Deside Isa Almasih, Junjungante Saq Mulie.

²⁴Ie saq ngemanikang side nike setie, Ie éndah saq gen genepang hal nike.

²⁵Semeton senamian, do'eang tiang pade!

²⁶Sampéang salam tiang pade tipaq selapuq semeton siq penoq kasih.

²⁷Siq kuase Tuhan, sanget siq tiang tunas adéq side baceang surat niki léq selapuq semeton saq seiman.

²⁸Rahmat Deside Isa Almasih, Junjungante Saq Mulie, araq bareng kance side pade.