Read KITAB SUCI ZABUR INJIL 2 TESALONIKA 2 Bible Online

2 TESALONIKA 2 - KITAB SUCI ZABUR INJIL bible

2 TESALONIKA 2

¹ Mengenai kerauhan Junjungante Saq Mulie Deside Isa Almasih, dait mengenai ite saq gen tekumpulang jari ndot bareng kance Ie, niki saq sanget siq tiang pade tunas léman side pade:

²Ndaq becat-becat bingung dait osah lantaran araq berite bahwe jelo Tuhan sampun rauh. Sang berite nike asalne léman roh, raos dengan, atao surat saq maraqne léman tiang pade.

³Ndaq alurang dengan miaq side pade jari sesat siq care napi juaq. Séngaq sendéqman Jelo nike dateng, juluan harus telaksane maraq niki: Luwéq dengan murtat, dait manusie durhake saq harus tebinaseang gen metitoqang diriqne.

⁴ Siq sombongne ie gen ngelawan dait atasang diriqne léman selapuq saq tesembah atao selapuq déwe saq teanggep Allah siq manusie. Malahan ie gen tokol léq dalem Gedéng Allah, dait nyatayang diriqne sebagé Allah.

⁵Napi side ndéq inget bahwe tiang sampun kereng badaq selapuqne nike sewaktu tiang masih araq bareng kance side pade?

⁶Dait mangkin side pade nenaoq napi saq nahen ie, sehingge ie baruq gen nyatayang diriq léq waktu saq sampun tetentuang tipaq ie.

⁷Séngaq secare rahasie kedurhakean sampun mulai bekarye, laguq mangkin masih araq saq nahen. Laguq éraq lamun saq nahen ie nike sampun tesingkirang,

⁸ léq waktu nike si pendurhake baruq gen nyatayang diriqne, laguq Junjungan Saq Mulie Deside Isa gen nyematéq ie siq napas-Ne dait gen ngemusnahang ie, lamun Ie rauh malik.

⁹ Kedatengan si pendurhake nike pegawéan Belis, dait gen tebarengin macem-macem kuase, tande dait muqjizat saq palsu.

¹⁰Ie gen kadu segale macem tipu muslihat saq jahat jari nyesatang dengan-dengan saq gen binase. Ie pade gen binase séngaq ie pade ndéq nerimaq kebenaran dait ndéq ngasihin kebenaran saq bau nyelametang ie pade.

¹¹Dait lantaran hal nike Allah datengang tipaq ie pade sopoq kuase saq nyesatang, sehingge ie pade percaye léq hal-hal saq duste,

¹²adéq tehukum selapuq dengan saq ndéq percaye tipaq kebenaran dait saq seneng léq kejahatan.

¹³Semeton senamian saq tekasihin siq Tuhan! Tiang pade harus tetep ngucapang syukur tipaq Allah mengenai side pade. Séngaq léman penembéqne Allah sampun piléq side pade jari teselametang langan penyucian saq telaksaneang siq Roh dait langan iman léq dalem kebenaran.

¹⁴Jari hal nike Allah ngemanikang side pade langan Kabar Solah saq tiang pade beriteang tipaq side pade, adéq side pade milu ngeraseang kemuliean Junjungante Saq Mulie Deside Isa Almasih.

¹⁵Keranaq nike, semeton senamian, side harus kuat dait kukuh dait tetep percaye léq pengajahan-pengajahan saq sampun tiang pade sampéang tipaq side, secare langsung atao kadu tulisan.

¹⁶Semoge Ie, Junjungante Saq Mulie Deside Isa Almasih, dait Allah, Bapante, saq léq dalem rahmat-Ne sampun ngasihin ite dait sampun ngicanin penghiburan saq kekel dait pengharepan saq solah tipaq ite,

¹⁷ngibur dait neguqang aténde léq dalem pegawéan dait ucapan saq solah.