Read KITAB SUCI ZABUR INJIL 1 TIMOTIUS 1 Bible Online

1 TIMOTIUS 1 - KITAB SUCI ZABUR INJIL bible

1 TIMOTIUS 1

¹ Timotius, bije tiang saq sah léq dalem iman! Surat niki léman tiang, Paulus, rasul Deside Isa Almasih siq préntah Allah, Juruselamette dait siq préntah Deside Isa Almasih, saq jari harepante. Allah Bapa dait Deside Isa Almasih Junjungante Saq Mulie ngicanin side berkah, rahmat dait damé sejahtere.

³Tiang melét adéq side tetep ndot léq Epesus maraq saq sampun tiang tegesang léq side sewaktu tiang lalo ojok Makedonia. Séngaq, léq Epesus araq pire dengan saq nyebarang pengajahan saq ndéq kenaq, dait side harus balaq ie pade.

⁴Badaq ie pade adéqne ndaq malik ngerépotang diriq siq dongéng-dongéng dait cerite-cerite asal-usul saq ndéq araq tutuqne. Selapuqne nike cume nimbulang masalah doang, dait ndéqne jauq dengan idup tertib léq dalem iman léq arepan Allah.

⁵Tujuan naséhat tiang nike adéq dengan bau ngasihin siq até saq suci, dait até nurani saq murni serte léman iman saq tulus ihlas.

⁶Araq separo dengan saq sampun ndéq idup maraq nike malik, dait sesat siq ucapan-ucapan saq ndéq araq manpaatne.

⁷Ie pade mélé jari guru Hukum Taurat, nike hukum saq tetulis léq dalem Kitab Suci Taurat, padahal ie mésaq ndéqne paham mengenai hal-hal saq ie pade ucapang atao hal-hal saq utame saq secare yakin ie pade sampéang.

⁸Ite nenaoq bahwe Hukum Taurat nike bagus, lamun tekadu maraq berembé sepatutne.

⁹Harus teinget bahwe Hukum Taurat ndéqne tepiaq jari dengan-dengan saq kenaq, laguq jari dengan-dengan durhake, dengan-dengan saq ndéq adil, dengan saq ndéq kenal Tuhan, jari dengan saq bedose, dengan-dengan saq mentingang dunie, dengan-dengan saq ndéq bedowé agame, dait jari dengan saq nyematéq amaq atao inaqne, jari selapuq tukang nyematéq,

¹⁰jari dengan-dengan saq cabul, saq gawéq perbuatan saq cabul kance sepade jenisne, penculik, penduste, dengan saq besumpah palsu, dait selapuq hal-hal lain saq betentangan kance pengajahan saq kenaq,

¹¹saq tedasarang léman Kabar Solah saq mulie léman Allah Saq Tepuji, saq penyebaranne tepercayeang léq tiang.

¹²Tiang besyukur léq Deside Isa Almasih Junjungante Saq Mulie. Ie sampun ngicanin tiang kekuatan jari pelayan-Ne, dait saq nganggep tiang patut ngelaksaneang pelayanan nike,

¹³ timaq laéq tiang pitnah dait nganiaye dait menghine Ie. Laguq Allah periak léq tiang, séngaq léq waktu nike tiang ndéqman percaye, jari tiang ndéq taoq napi saq tiang laksaneang.

¹⁴Dait malahan rahmat secare melimpah teicanin tipaq tiang siq iman dait kasih léq dalem Deside Isa Almasih.

¹⁵Setetune kenaq ucapan niki -- keranaq nike harus teterimaq dait tepercaye sepenoqne --: “Deside Isa Almasih rauh ojok dunie niki jari nyelametang dengan bedose.” Dait tiang dengan saq paling bedose.

¹⁶Laguq lantaran hal nike malahan Allah periak léq tiang, adéq Deside Isa Almasih bau nyatayang selapuq kesabaran-Ne tipaq tiang, dengan saq paling bedose niki. Dait niki jari sopoq conto tipaq selapuq dengan saq éraq gen percaye léq Ie dait mauq idup saq kekel.

¹⁷Allah, Raje selapuq jaman, patut tehormatin dait tepuji selaéq-laéqne, séngaq Ie saq kekel, saq ndéq penggitan dait saq Esa! Amin.

¹⁸Timotius, bije tiang! Tugas niki tiang percayeang tipaq side sesuai kance napi saq sampun tenubuatang mengenai diriqde, adéq teteguqang siq nubuat nike side bejuang léq dalem perjuangan saq solah siq iman dait até nurani saq murni.

¹⁹Pire dengan sampun nolaq até nuranine saq murni nike, dait lantaran nike iman ie pade jari mandek,

²⁰léq antarene Himenus dait Aleksander, saq sampun tiang serahang tipaq Belis adéq ie pade berajah engkah menghine.