Read KITAB SUCI ZABUR INJIL 1 TIMOTIUS 2 Bible Online

1 TIMOTIUS 2 - KITAB SUCI ZABUR INJIL bible

1 TIMOTIUS 2

¹Pertame-tame, sanget siq tiang tunas adéq petunasan, do'e serte ucapan syukur tesampéang tipaq Allah umaq selapuq dengan;

²umaq raje-raje dait umaq selapuq dengan saq bekuase. Tunas adéq ite bau idup tenang dait tentrem dalem selapuq kesoléhan dait kehormatan.

³Nike saq solah dait saq nyenengang Allah, Juruselamette.

⁴Allah kayun adéq selapuq dengan teselametang dait mauq penenaoq mengenai kebenaran.

⁵Séngaq, cume araq sopoq Allah, dait cume sopoq perantare antare Allah kance manusie, nike manusie Deside Isa Almasih.

⁶Ie sopoq manusie saq sampun nyerahang diriq-Ne jari nebus selapuq dengan: Kesaksian nike tenyatayang léq waktu saq tepat.

⁷ Dait lantaran nike tiang sampun tetentuang jari dengan saq nyampéang berite dait jari rasul serte guru umaq dengan-dengan saq ndéq Yahudi léq dalem iman dait kebenaran. Napi saq tiang sampéang niki setetune kenaq, tiang ndéq beduste.

⁸Tiang mélé adéq léq sebilang taoq, dengan mame bedo'e dait nengadahang kedue imene saq suci, ndéq tebarengin rase gedek atao betungkasan.

⁹ Maraq nike éndah dengan-dengan nine, harus ngerias diriqne secare sederhane dait kadu kelambi saq pantes. Ndaq ngengadu potongan bulu saq macem-macem ruene, atao periasan-periasan emas atao mutiare, atao kelambi saq mahel-mahel.

¹⁰Sebalikne, dengan-dengan nine harus ngerias diriqne siq perbuatan-perbuatan saq solah, pade maraq saq telaksaneang siq dengan nine saq beribadah.

¹¹Dengan nine harus tedoq dait patuh sewaktu nerimaq pengajahan.

¹²Tiang ndéq ngijinang lamun dengan nine ngajah atao mréntah dengan mame; ie pade harus tedoq.

¹³ Séngaq saq penembéq tecipteang nike Adam dait sesampun nike baruq Hawa.

¹⁴ Dait ndéqne Adam saq tetipu, laguq Hawa, sehingge ngelanggar préntah Allah.

¹⁵Timaqne maraq nike, dengan nine gen teselametang lantaran nganak, asal ie tekun léq dalem iman, kasih dait kesucian dait idup sederhane.