Read KITAB SUCI ZABUR INJIL 1 TIMOTIUS 4 Bible Online

1 TIMOTIUS 4 - KITAB SUCI ZABUR INJIL bible

1 TIMOTIUS 4

¹Roh Allah secare teges nyatayang bahwe léq waktu-waktu saq gen dateng, separo dengan gen murtat, terus turut roh-roh penyesat dait pengajahan-pengajahan sétan,

²saq tesampéang langan dengan-dengan saq girang beduste saq até nuranine sampun jari maraq batu.

³Ie pade ngajah dengan adéqne ndéq merariq dait ndéq ngelorang keloran saq tertentu. Padahal keloran nike tecipteang siq Allah adéqne tekelorang siq ucapan syukur siq dengan-dengan saq sampun percaye tipaq Almasih dait sampun nenaoq kebenaran.

⁴Selapuq saq tecipteang siq Allah nike solah, dait ndéq araq sopoq juaq saq harus teanggep haram lamun sampun teterimaq siq rase syukur tipaq Allah.

⁵Séngaq Manik Allah dait do'e miaq keloran nike jari halal.

⁶Lamun side ngingetang semeton-semetonte mengenai selapuqne nike, side gen jari pelayan Deside Isa Almasih saq solah. Dait side tetep tedidik léq hal-hal mengenai iman dait selapuq pengajahan saq solah saq sampun side turut sengonéq niki.

⁷Jaoqang cerite-cerite tahyul dait dongéng-dongéng leluhur. Latih diriqde jari kehidupan saq beribadah.

⁸Latihan jasmani sekediq doang manpaatne, laguq ibadah nike bemanpaat dalem selapuq hal, séngaq berisi janji, jari idup saq mangkin niki dait jari idup saq gen dateng.

⁹Hal nike kenaq dait patut teterimaq dait tepercaye sepenoqne.

¹⁰Keranaq nike ite bejuang dait pacu-pacu begawéan, séngaq ite beharep sepenoqne léq Allah saq idup; Ie Juruselamet selapuq dengan, terutame gati dengan-dengan saq percaye.

¹¹Beriteang dait ajahang selapuqne nike.

¹²Ndaq alurang sopoq dengan juaq ngeréméhang side lantaran side masih bajang. Sebalikne, side harus jari teladan tipaq dengan-dengan percaye léq dalem ucapande, léq dalem tingkah laku side, léq dalem kasihde, léq dalem kesetieande dait léq dalem kesuciande.

¹³Jangke tiang dateng laun, side harus tekun baceang Kitab Suci dait ngebéng semanget dait ngajah ie pade.

¹⁴Ndaq side lupaq ngengadu paice léman Roh Allah saq teicanin tipaq side siq nubuat sewaktu pemimpin-pemimpin jemaah noloq imene léq atas ulunde.

¹⁵Laksaneang selapuqne nike pacu-pacu adéq kemajuande teserioq siq selapuq dengan.

¹⁶Perhatiang pacu-pacu diriqde dait perhatiang éndah pengajahan side. Side harus tetep setie ngelaksaneang selapuqne nike, séngaq siq care nike side gen nyelametang diriqde mésaq dait dengan-dengan saq dengahang side.