Read KITAB SUCI ZABUR INJIL 1 TIMOTIUS 5 Bible Online

1 TIMOTIUS 5 - KITAB SUCI ZABUR INJIL bible

1 TIMOTIUS 5

¹Ndaq side rengas léq dengan saq toaqan léman side, laguq béng ie naséhat maraq amaqde mésaq. Peringet dengan-dengan saq kodéqan maraq semetonde mésaq, dait dengan-dengan nine saq toaq maraq inaqde mésaq.

²Dengan-dengan nine saq bajangan harus side perlakuang maraq adiqde mésaq, siq angen saq tulus.

³Pade hormatin bebalu-bebalu saq tetu-tetu idup mésaq.

⁴Laguq lamun sopoq bebalu bedowé bije atao bai, ie pade saq penembéq harus tebéng pengertian bahwe ie pade wajib merhatiang keluarge ie pade, dait bales budi dengan toaq dait papuq ie pade. Séngaq hal nike saq nyenengang Allah.

⁵Bebalu saq tetu-tetu idup mésaq, dait ndéqne bedowé sai-sai saq meliharaq ie, cume beharep léq Allah. Kenjelo kekelem ie tekun bedo'e nunas tulung léq Allah.

⁶Laguq bebalu saq demen idup beseneng-seneng, sampun maté timaq ie masih idup.

⁷Sampéang petunjuk-petunjuk niki tipaq ie pade, adéq ie pade idup ndéq bedowé cacat cele.

⁸Laguq lamun araq dengan saq ndéq meliharaq semeton jarine, lebih-lebih keluargene mésaq, dengan nike murtat; ie lengéan léman dengan saq ndéq beriman.

⁹Cume bebalu saq bedowé syarat-syarat niki saq bau tame dalem daptar bebalu-bebalu: Umurne harus ndéqne kurang léman enem dase taun, saq cume sekali merariq,

¹⁰terbukti jari dengan nine saq ngelaksaneang hal-hal saq solah, meliharaq bije-bijene jangke beléq secare bagus, béng dengan nyodoq léq baléne, ngelayanin dengan-dengan saq percaye, nulung dengan-dengan saq susah, dait pacu-pacu ngelaksaneang segale macem pegawéan saq solah.

¹¹Ndaq tamaq ojok dalem daptar nike bebalu-bebalu saq masih bajang. Séngaq lamun napsu birahine masih kuat, ie pade mélé merariq malik, dait bilin Almasih.

¹²Make ie pade salaq séngaq nilas janji saq teicanin tipaq ie dait datengang hukuman léq diriqne mésaq.

¹³Selain nike ie pade girang mayus dait sugul tame ojok balé dengan. Dait saq lengéan malik, ie pade berajah pitnah aran dengan lain dait turut campur léq urusan dengan lain, dait ngeraosang hal-hal saq ndéq patut teraosang.

¹⁴Keranaq nike tiang mélé adéq bebalu-bebalu saq masih bajang merariq malik, bedowé bije, dait ngurus keluargene, adéq musuh-musuhte ndéq mauq kesempatan jari ngelengé-lengéang arante.

¹⁵Séngaq araq bebalu-bebalu saq sampun sesat turut Belis.

¹⁶Laguq lamun sopoq dengan nine saq percaye léq Almasih bedowé semeton jari saq sampun jari bebalu, ie harus nulung bebalu-bebalu nike; ndaq alurang jemaah saq nanggung ie pade. Siq care nike jemaah bau nulung bebalu-bebalu saq tetu-tetu ndéq bedowé semeton jari.

¹⁷Pemimpin jemaah saq ngelaksaneang tugasne secare solah, patut tebéng penghargean due kali lipet, terutame gati ie pade saq rajin hotbah dait ngajahang.

¹⁸ Séngaq léq dalem Kitab Suci tetulis, “Sampi saq kenyeke begawéan ngicaq-icaq gandum jari nyugulang tolang gandum ndaq tetungkem biwihne”, dait maraq nike éndah, “Dengan saq begawéan berhak nerimaq upaqne”.

¹⁹ Ndaq percaye tuduhan tipaq sopoq pemimpin jemaah, kecuali lamun tebuktiang siq due saksi atao lebih.

²⁰Dengan saq gawéq dose, harus teperinget léq julun selapuq jemaah, adéq saq lain jari takut.

²¹Léq arepan Allah, Deside Isa Almasih, serte malaékat-malaékat saq Ie piléq, sanget siq tiang tunas adéq side turut petunjuk-petunjuk niki ndaq bedowé rase curige léq sai juaq, dait ndaq bepihak léq sai-sai.

²²Ndaq side becat gati toloq imende léq atas sopoq dengan jari ngesahang pengangkatanne sebagé pelayan Tuhan. Lamun dengan lain bedose, ndaq milu terlibat léq dalem dose nike. Jagaq diriqde adéq tetep suci.

²³Ndaq malik nginem aiq doang; laguq inem éndah anggur sekediq adéq solah idap tiande, séngaq side girang sakit-sakitan.

²⁴Dose separo dengan sendéqman teadilin sampun penggitan secare jelas. Laguq dose dengan lain baruq tetaoq sesampun teadilin.

²⁵Maraq nike éndah perbuatan-perbuatan solah langsung penggitan. Dait timaqne ndéq mudaq penggitan, ndéqne bau terus teseboq.