Read KITAB SUCI ZABUR INJIL 1 TIMOTIUS 6 Bible Online

1 TIMOTIUS 6 - KITAB SUCI ZABUR INJIL bible

1 TIMOTIUS 6

¹Selapuq dengan saq jari hambe, harus nganggep majikan ie pade patut tehormatin sepenoqne, adéq dengan ndéq bau ngelengéang peséngan Allah dait pengajahante.

²Hambe-hambe saq majikanne dengan saq percaye léq Almasih, ndéqne kanggo ngeréméhang majikanne séngaq ie pade bareng-bareng percaye léq Almasih. Malahan ie pade seharusne ngelayanin majikan ie pade solahan malik, séngaq majikan saq telayanin secare solah nike pade-pade dengan percaye dait pade-pade tekasihin siq Allah. Ajahang niki dait béng naséhat mengenai selapuqne niki.

³Sai-sai saq ngajahang pengajahan saq lain dait ndéqne setuju kance pengajahan saq kenaq léman Junjungante Saq Mulie Deside Isa Almasih, dait kance pengajahan saq sesuai kance ibadahte,

⁴nike dengan saq sombong, dait ndéqne taoq napi-napi! Penyakitne demen bedebat dait betungkasan mengenai istilah-istilah sehingge nimbulang talon até, ndéq akor, pitnah, curige saq ndéq solah,

⁵dait béde pendapet saq ndéq araq tutuqne léq antare dengan-dengan saq ndéq waras pikiranne dait jaoq léman kebenaran. Ie pade paran bau jari sugih léman ibadah.

⁶Mule ibadah nike lamun tebarengin siq rase cukup ngebéng keuntungan saq beléq.

⁷Séngaq ndéq araq napi juaq saq ite jauq ojok dalem dunie niki, dait ndéq araq éndah saq bau ite jauq sugul!

⁸Jari, lamun araq keloran dait kelambi, nike sampun cukup.

⁹Laguq dengan-dengan saq mélé jari sugih, tegode dait tejeret siq segale macem keméléq saq bodo dait saq nyédaq. Keméléq-keméléq nike miaq dengan jari ancur dait celake.

¹⁰Séngaq cinte léq képéng nike sumber macem-macem kejahatan. Araq separo dengan saq sesat léman imanne dait nyiksaq diriqne siq macem-macem dukecite lantaran paléq képéng.

¹¹Laguq side niki dowén Allah, jari side harus jaoqang selapuqne nike. Pade usaheang keadilan, ibadah, kesetiean, kasih, kesabaran, dait até saq lemah lembut.

¹²Pade bejuang dalem peperangan iman saq kenaq dait boyaq jangke mauq idup saq kekel. Séngaq jari hal nike Allah ngemanikang side, sewaktu side ngakuq léq julun dengan luwéq bahwe side percaye léq Almasih.

¹³ Dait mangkin, léq arepan Allah saq ngicanin idup tipaq selapuqne, dait léq arepan Deside Isa Almasih saq sampun nyampéang kesaksian saq kenaq léq arepan Pontius Pilatus, tiang tunas hal niki léq side:

¹⁴Pade taat léq selapuq préntah nike, ndaq jangke araq cacat dait cele jangke Junjungante Saq Mulie Deside Isa Almasih nyatayang diriq-Ne.

¹⁵Kerauhan-Ne gen tetentuang léq waktu saq tepat siq Allah mésaq. Ie sopoq-sopoqne Penguase tunggal; Ie agung, Raje léq atas selapuq raje, dait Tuan léq atas selapuq tuan.

¹⁶Ie doang saq ndéq bau tekuasein siq kematéan; Ie idup léq dalem cahaye saq ndéq bau terapetin siq sai juaq. Ndéq araq sopoq manusie saq sampun serioq Ie, atao bau serioq Ie. Umaq Ie hormat dait kuase selaéq-laéqne! Amin.

¹⁷Tipaq dengan-dengan saq sugih léq dunie niki, side harus béng naséhat adéqne ndaq sombong dait ndaq beharep léq barang-barang saq ndéq kekel -- misalne kesugihan. Ie pade harus beharep léq Allah saq ngicanin selapuq hal tipaq ite secare belimpah-limpah adéq ite nikmatin.

¹⁸Peringet adéq ie pade ngelaksaneang saq solah, jari sugih dalem kebajikan, demen besedekah.

¹⁹Siq care nike ie pade ngumpulang harte saq bau jari dasar saq solah léq waktu saq gen dateng. Dait siq hal nike ie pade gen mauq idup saq kekel, nike idup saq sejati.

²⁰Jagaq solah-solah napi saq sampun tepercayeang léq side, Timotius! Jaoqang diriqde léman raosan-raosan saq ndéq araq manpaatne dait saq ndéq suci dait raosan-raosan mengenai hal-hal saq tesebut penenaoq padahal ndéq.

²¹Séngaq araq dengan-dengan saq ngajahang penenaoq nike dait siq care nike sampun nyimpang léman iman. Rahmat Allah araq bareng kance side pade!