Read KITAB SUCI ZABUR INJIL 2 TIMOTIUS 1 Bible Online

2 TIMOTIUS 1 - KITAB SUCI ZABUR INJIL bible

2 TIMOTIUS 1

¹Timotius, bije tiang saq tiang kasihin! Surat niki léman tiang, Paulus, rasul Deside Isa Almasih saq tepiléq siq Allah jari nyampéang janji mengenai idup léq dalem Deside Isa Almasih.

² Allah Bapa dait Deside Isa Almasih Junjungante Saq Mulie ngicanin side berkah, rahmat dait damé sejahtere.

³Tiang besyukur léq Allah saq tiang layanin siq angen saq tulus, maraq saq telaksaneang siq pare leluhur tiang laéq. Tiang tetep besyukur léq Allah sebilang tiang inget side léq dalem do'e, timaq kenjelo atao kekelem.

⁴Tiang inget léq kesedihan aténde. Keranaq nike tiang melét gati serioq side malik adéq tiang bau tetu-tetu jari gembire.

⁵ Tiang inget léq imande saq tulus ihlas, pade maraq iman niniqde saq nine Lois dait Eunike inaqde. Dait tiang yakin bahwe iman nike éndah idup léq dalem diriqde.

⁶Keranaq nike, tiang ingetang side adéq side terus idupang paice saq teicanin siq Allah tipaq side sewaktu tiang noloq ime tiang léq atasde.

⁷Séngaq Roh saq Allah icanin tipaq ite, ndéqne Roh saq miaq ite jari penakut. Sebalikne Roh Allah nike miaq ite jari kuat, penoq siq kasih dait tao nahen diriq.

⁸Keranaq nike, ndaq ilaq besaksi mengenai Tuhante, dait ndaq éndah ilaq mengenai tiang, saq tebui lantaran Ie. Sebalikne siq kekuatan léman Allah, side milu menderite lantaran Kabar Solah nike.

⁹Allah nyelametang ite dait ngemanikang ite siq care saq suci. Ie ngelaksaneang hal nike nénten tedasarang siq napi saq sampun ite laksaneang, laguq tedasarang siq rencane-Ne mésaq dait rahmat-Ne. Allah ngicanin ite rahmat-Ne langan Deside Isa Almasih sendéqman dunie niki tecipteang.

¹⁰Dait mangkin, Allah nyatayang rahmat-Ne nike tipaq ite siq kerauhan Juruselamette, Deside Isa Almasih. Deside Isa ngalahang kuase kematéan dait datengang idup saq kekel langan Kabar Solah nike.

¹¹ Jari Kabar Solah niki tiang sampun tetentuang sebagé dengan saq beriteang kabar nike, sebagé rasul dait sebagé guru.

¹²Lantaran selapuqne nike tiang nerimaq penderitean niki, laguq tiang tetep ndéq ilaq, séngaq tiang nenaoq gati sai saq tiang percaye. Tiang yakin bahwe napi saq sampun Ie percayeang léq tiang, Ie éndah sanggup jagaq jangke Jelo Tuhan.

¹³Turut pacu-pacu pengajahan saq kenaq saq sampun tiang sampéang tipaq side. Dait side harus tetep percaye léq iman dait kasih léq dalem Deside Isa Almasih.

¹⁴Siq bantuan léman Roh Allah saq idup léq dalem ite, side harus jagaq napi saq solah saq sampun tepercayeang tipaq side.

¹⁵Side nenaoq bahwe selapuq dengan léq daérah Asia Kodéq sampun bilin tiang, lantong Pigelus dait Hermogenes.

¹⁶Laguq keluarge Onesiporus sampun pire kali miaq angen tiang seneng. Semoge Tuhan kayun nyatayang rahmat-Ne tipaq ie pade. Timaq tiang léq dalem bui, Onesiporus ndéqne ilaq léq keadaan tiang nike.

¹⁷Sewaktu tiang dateng léq Roma, ie tetep berusahe boyaq tiang jangke ie bedait kance tiang.

¹⁸Dait side nenaoq bahwe léq Epesus, ie luwéq gati nulung tiang. Semoge Tuhan nyatayang rahmat-Ne tipaq ie léq jelo Almasih rauh malik.