Read KITAB SUCI ZABUR INJIL 2 TIMOTIUS 2 Bible Online

2 TIMOTIUS 2 - KITAB SUCI ZABUR INJIL bible

2 TIMOTIUS 2

¹Timotius, bije tiang! Side harus jari kuat siq rahmat léq dalem Deside Isa Almasih.

²Napi saq sampun side dengah léman tiang léq julu luwéq saksi percayeang hal nike tipaq dengan-dengan saq bau tepercaye dait éndah saq ceket ngajah dengan lain.

³Side harus milu menderite sebagé prajurit Deside Isa Almasih saq solah.

⁴Sopoq prajurit saq kenyeke bejuang, ndéqne gen piaq diriqne répot siq urusan-urusanne mésaq, séngaq ie mélé nyenengang komendanne.

⁵Sopoq dengan saq jari pemaén olah rage ndéqne gen jari juare léq dalem sopoq pertandingan, lamun ie ndéq taat léq aturan-aturan.

⁶Petani saq sampun lelah begawéan, ie saq paling penembéq berhak mauq hasil tetaletanne.

⁷Pikirang napi saq tiang sampéang nike, séngaq Tuhan gen ngicanin side kesanggupan jari ngerti selapuqne.

⁸Ingetang niki: Kabar Solah saq tiang beriteang, nike kabar mengenai Deside Isa Almasih, keturunan Daud; nike Almasih saq sampun idup malik léman ninggal.

⁹Lantaran tiang nyampéang Kabar Solah nike, tiang jari menderite; malahan jangke teranté maraq sopoq penjahat. Laguq Manik Allah ndéqne bau teranté.

¹⁰Keranaq nike tiang sabar nanggung selapuqne nike demi kepentingan dengan-dengan saq sampun tepiléq siq Allah, adéq ie pade éndah mauq keselametan saq teicanin langan Deside Isa Almasih, dait saq tebarengin siq kemuliean saq kekel.

¹¹Mule kenaq ucapan niki, “Lamun ite sampun ninggal ngiring Ie, ite éndah gen idup ngiring Ie.

¹² Lamun ite tetep tekun, ite éndah gen mréntah ngiring Ie. Lamun ite nilas Ie, Ie éndah gen tilas ite.

¹³Lamun ite ndéq setie, Ie tetep setie, séngaq Ie ndéq gen bau nilas diriq-Ne mésaq.”

¹⁴Side harus ingetang dengan-dengan mengenai selapuqne niki. Naséhat ie pade léq arepan Allah, adéqne ndaq begejuh mengenai istilah-istilah. Nike ndéq araq manpaatne, malahan cume piaq kaco dengan-dengan saq dengah.

¹⁵Side harus berusahe pacu-pacu adéqne teakuq siq Allah jari dengan saq patut begawéan léq Ie. Pade berusahe adéq side ndéq ilaq léq pegawéande, laguq kenaq-kenaq entan ngajahang mengenai kebenaran.

¹⁶Jaoqin raosan-raosan saq ndéq araq manpaatne dait saq ndéq suci. Raosan-raosan saq maraq nike cume miaq dengan sayan jahat.

¹⁷Ucapan-ucapan dengan-dengan nike becat gati ngelontoq maraq penyakit kangker saq ganas. Léq antare ie pade termasuk Himenus dait Piletus.

¹⁸Ie pade sampun nyimpang léman kebenaran, dait miaq iman separo dengan jari kaco. Basen ie pade bahwe idup malik léman kematéan sampun telaksane.

¹⁹ Laguq dasar kuat saq tepiaq siq Allah ndéqne bau tegerik. Léq atasne tetulis maraq niki, “Tuhan kenal kance dengan-dengan saq jari dowé-Ne”, dait, “Dengan-dengan saq nyebut peséngan Tuhan, ie harus jaoqang diriqne léman kejahatan.”

²⁰Léq dalem balé saq beléq araq macem-macem perabotanne. Araq saq tepiaq léman perak atao emas, laguq araq éndah saq léman kayuq atao tanaq. Araq saq tekadu jari maksut saq mulie, dait araq éndah saq tekadu jari maksut saq kurang mulie.

²¹Dengan saq persiq diriqne léman selapuq saq jahat, dengan nike gen tekadu jari maksut saq mulie. Ie jari dowé saq husus dait bemanpaat umaq majikanne. Ie tesiepang jari tekadu umaq sebilang pegawéan saq solah.

²²Keranaq nike, jaoqin hawe napsu dengan bajang, usaheang keadilan, kesetiean, kasih dait kedaméan bareng-bareng kance ie pade saq beharep tipaq Tuhan siq até saq suci.

²³Ndaq milu bedebat kance dengan bodo saq ndéq nenaoq napi-napi. Side nenaoq bahwe selapuqne nike cume nimbulang pegejuhan.

²⁴Dengan saq begawéan tipaq Tuhan ndéqne patut besiaq; ie harus tao bebatur kance selapuq dengan, dait bau ngajah dengan secare solah dait sabar.

²⁵Ie harus secare lemah lembut ngajah dengan-dengan saq girang ngelawan; mudah-mudahan Allah ngicanin kesempatan léq dengan-dengan nike adéqne betobat léman dose-dose ie pade dait nenaoq kebenaran.

²⁶Siq care nike ie pade jari sadar malik, dait lepas léman kuase Belis saq sampun jeret ie pade dait maksaq ie pade turut keméléqne.