Read KITAB SUCI ZABUR INJIL 2 TIMOTIUS 3 Bible Online

2 TIMOTIUS 3 - KITAB SUCI ZABUR INJIL bible

2 TIMOTIUS 3

¹Pade inget niki: Léq jelo-jelo penutuq gen araq luwéq kesusahan.

²Manusie gen mentingang diriqne mésaq, ie ngutameang képéng, sombong dait beléqan raos saq ndéq araq manpaatne. Ie pade demen pitnah dengan, ngelawan dengan toaqne, ndéqne tao betampi asih, dait meriq léq agame.

³Ie pade ndéq bedowé kasih léq sepade manusie, ndéqne demen bedamé, ie pade girang ngelengé-lengéang aran dengan lain, demen kadu kekerasan, ie pade kejem dait ndéqne demen léq hal saq solah.

⁴Ie pade girang behianat, angkuh dait ndéqne girang bepikir bélo. Ie pade demenan léq kesenengan dunie ketimbang turut pekayunan Allah.

⁵Timaq secare lahiriah, ie pade taat ngelaksaneang ibadah, laguq ndéqne nerimaq kekuatan léman agame nike. Ndaq rapet kance dengan-dengan saq maraq nike.

⁶Araq léq antare ie pade saq sampun tame tedoq-tedoq ojok balé-balé, terus gode dengan-dengan nine saq lemah saq bedowé luwéq gati dose dait tekuasein siq macem-macem keméléq.

⁷Dengan-dengan nine nike tetep melét teajah, laguq ndéq uwah taoq mengenai kebenaran.

⁸ Pade maraq Yanes dait Yambres saq laéq ngelawan Musa, maraq nike éndah dengan-dengan nike ngelawan kebenaran. Pikiran ie pade séde, dait iman ie pade ndéq tahen uji.

⁹Laguq ie pade ndéq gen sayan maju, séngaq kebodoan ie pade gen tetaoq siq selapuq dengan, maraq saq tealamin éndah siq Yanes dait Yambres.

¹⁰Laguq side sampun turut pengajahan-pengajahan tiang, kelakuan tiang, tujuan idup tiang, iman tiang, kesabaran tiang, kasih tiang dait ketabahan tiang.

¹¹ Side sampun serioq tiang teaniaye dait tiang menderite. Side nenaoq selapuq saq telaksane tipaq tiang léq Antiokia, léq Ikonium, dait léq Listra; dait side nenaoq selapuq penderitean saq tiang alamin! Laguq Tuhan nyelametang tiang léman selapuqne nike.

¹²Mule selapuq dengan saq mélé idup beribadah dait idup léq dalem Deside Isa Almasih gen teaniaye,

¹³laguq dengan-dengan saq jahat dait dengan-dengan penipu gen sayan jahat. Ie pade nyesatang dengan lain, padahal ie mésaq tepiaq sesat éndah.

¹⁴Laguq side, Timotius, side harus tetep idup léq dalem kebenaran saq sampun teajahang tipaq side dait saq side percaye sepenoqne, dait inget sai saq ngajah side.

¹⁵Harus side inget bahwe léman side masih kodéq side sampun kenal Kitab Suci saq bau ngicanin side pengertian jari mauq keselametan langan iman léq Deside Isa Almasih.

¹⁶Selapuq saq tetulis léq dalem Kitab Suci, teilham siq Allah dait bemanpaat jari ngajah, jari nyatayang kesalaqan, pesolah kelakuan, dait jari didik dengan léq dalem kebenaran.

¹⁷Sehingge sebilang dengan saq jari dowén Allah telengkapin jari ngelaksaneang sebilang pegawéan saq solah.