Read KITAB SUCI ZABUR INJIL 2 TIMOTIUS 4 Bible Online

2 TIMOTIUS 4 - KITAB SUCI ZABUR INJIL bible

2 TIMOTIUS 4

¹Léq arepan Allah dait Deside Isa Almasih saq gen hakimin selapuq dengan saq idup dait saq sampun ninggal; dait demi kerauhan-Ne serte kerajaan-Ne, tiang bepesen tipaq side:

²Side harus nyampéang Manik Allah, timaq waktune solah atao ndéq, nyatayang napi saq salaq, peringet dait béng naséhat dait ajah secare sabar.

³Séngaq gen dateng waktune dengan ndéqne mélé malik nerimaq pengajahan saq kenaq. Sebalikne, ie pade gen turut keméléqne mésaq, dait ngumpulang luwéq guru adéqne ngajahang hal-hal saq solah tedengah léq kentok ie pade.

⁴Ie pade sulen kentokne jari dengah kebenaran, laguq gen dengahang cerite-cerite dongéng.

⁵Timaq maraq nike, side harus nguasein diriqde léq dalem keadaan napi juaq. Pade tabah léq dalem penderitean, laksaneang tugasde sebagé dengan saq nyampéang Kabar Solah nike dait tutuqang solah-solah kewajibande jari pelayan Allah.

⁶Mengenai diriq tiang, sampun dateng waktune tiang gen maté jari kurban tipaq Allah. Karing seberaq tiang gen bilin dunie niki.

⁷Tiang sampun seleséang pertandingan sebagus-bagusne, dait mangkin tiang sampun araq léq garis penutuq. Tiang tetep meliharaq iman.

⁸Dait mangkin tiang sampun tesedieang mahkote kebenaran saq gen teicanin tipaq tiang siq Tuhan, Hakim saq adil nike, léq jelo-Ne, nike ndéqne cume léq tiang, laguq éndah tipaq selapuq dengan saq melét gati ngantos kerauhan Tuhan.

⁹Pade berusahe becat dateng ojok tiang,

¹⁰ séngaq Demas sampun bilin tiang lantaran ie mentingang dunie niki. Ie sampun lumbar ojok Tesalonika. Krekes sampun lumbar ojok Galatia, dait Titus ojok Dalmatia.

¹¹ Cume Lukas saq araq kance tiang. Tutut Markus dait ténaq ie milu bareng side, séngaq ie bau nulung tiang léq dalem pelayanan tiang.

¹² Titikus sampun tiang suruq lumbar ojok Epesus.

¹³ Lamun side dateng, jauq éndah jubah saq tiang adéqang léq Troas léq balé Karpus. Jauq éndah kitab-kitab tiang, terutame selapuq gulungan saq tepiaq léman léndong.

¹⁴ Aleksander, saq jari tukang tembage nike sampun ngelaksaneang hal-hal saq jahat gati léq tiang. Tuhan gen bales ie menurut perbuatanne.

¹⁵Side mésaq harus onyaq-onyaq léq ie, séngaq ie tetu-tetu nentang pengajahan saq ite jauq.

¹⁶Sewaktu penembéq tiang ngajuang pembélean tiang, ndéq araq sopoq dengan juaq saq dampingin tiang; selapuqne bilin tiang. Mudah-mudahan ndéqne ie pade saq nanggung hal nike!

¹⁷Laguq Tuhan araq bareng kance tiang. Ie ngicanin kekuatan sehingge tiang sanggup beriteang selapuq Kabar Solah nike, adéq tedengah siq selapuq dengan saq ndéq Yahudi. Dait tiang tebébasang léman biwih singe.

¹⁸Mule Tuhan gen bébasang tiang léman selapuq niat dengan saq jahat, dait Ie gen gadingang tiang selamet jangke tame ojok Kerajaan-Ne léq sorge. Bagi Tuhan kemuliean selaéq-laéqne! Amin.

¹⁹ Salam tiang tipaq Priskila dait Akwila dait tipaq keluarge Onesiporus.

²⁰ Erastus ndot léq Korintus, dait Tropimus sampun tiang bilin sewaktu ie masih sakit léq Miletus.

²¹Pade berusahe pacu-pacu jari dateng sendéqman musim telih. Ebulus, Pudes, Linus dait Klaudia ngirim salam tipaq side; maraq nike éndah selapuq semeton saq seiman lainne.

²²Tuhan tetep araq bareng rohde. Rahmat-Ne araq bareng kance side.