Read KITAB SUCI ZABUR INJIL TITUS 1 Bible Online

TITUS 1 - KITAB SUCI ZABUR INJIL bible

TITUS 1

¹Titus, bije tiang! Tiang, Paulus, nulis surat niki sebagé hambe Allah dait rasul Deside Isa Almasih. Tiang tepiléq dait teutus jari meliharaq iman dengan-dengan saq sampun tepiléq siq Allah, dait jari meliharaq penenaoq mengenai kebenaran saq nyate léq ibadahte.

²Pengajahan nike tedasarang léq pengharepan bahwe ite gen nerimaq idup sejati dait kekel. Allah sampun janjiqang idup nike sendéqman awal jaman -- dait Allah ndéqne mungkin beduste.

³Léq waktu saq sampun Ie tentuang, Allah nyatayang janji-Ne nike léq dalem manik-Ne. Manik nike sampun tepercayeang léq tiang, dait tiang nyampéang manik nike sesuai kance préntah Allah, Juruselamet ite.

⁴ Titus, bije tiang saq sah léq dalem imante saq pade. Rahmat dait damé sejahtere léman Allah Bapa dait Deside Isa Almasih, Juruselamette araq bareng kance side.

⁵Tiang bilin side léq Kreta adéq side bau ngurus hal-hal saq masih perlu teatur. Dait adéq side ngangkat pemimpin-pemimpin jemaah léq sebilang kote, maraq saq sampun tiang pesen léq side:

⁶ Dengan saq jari pemimpin jemaah harus dengan saq ndéq bedowé cacat cele; ie harus bedowé cume sopoq senine; bije-bijene harus idup léq dalem iman dait ndéqne tekenal jari kanak tele dait saq ndéq bau teatur.

⁷Pengawas jemaah nike dengan saq ngurus karye Allah, ie ndéqne kanggo bedowé cacat cele. Ie ndéq kanggo sombong atao becat sili, atao girang bowos, atao girang besiaq atao serakah.

⁸Laguq ie harus demen béng dengan nyodoq léq baléne, demen léq hal-hal saq solah, bijaksane, adil, soléh dait tao nahen diriq.

⁹Ie harus bedowé keyakinan saq teguq léq pengajahan saq kenaq, maraq saq sampun teajahang léq ie. Siq care nike ie sanggup ngebéng naséhat léq dengan tedasarang ajahan nike, dait ngeyakinang dengan-dengan saq nentang ie.

¹⁰Séngaq araq luwéq dengan saq ndéq mélé teatur, terutame léq antare ie pade saq ngelaksaneang hukum sunat. Ie pade nyesatang dengan lain siq raos saq ndéq araq manpaatne.

¹¹Dengan-dengan saq maraq nike harus tetungkem biwihne, séngaq ie pade miaq kaco luwéq keluarge siq pengajahan-pengajahan saq ndéq-ndéq. Ie pade ngelaksaneang nike cume lantaran mélé boyaq keuntungan saq ndéq patut!

¹²Laéq ie pade sampun bedowé sopoq nabi, saq asalne léman Kreta éndah, bebase, “Dengan-dengan Kreta girang beduste, dait maraq binatang buas saq serakah dait mayus.”

¹³Napi saq teucapang siq nabi nike mule kenaq. Keranaq nike side harus peringet ie pade secare teges; adéq ie pade jari séhat léq dalem iman

¹⁴dait ndéqne malik percaye léq dongéng-dongéng Yahudi, atao aturan-aturan saq tepiaq siq dengan-dengan saq ndéq mélé nerimaq kebenaran.

¹⁵Selapuq-lapuqne suci umaq dengan-dengan saq suci. Laguq umaq dengan-dengan saq kotor pikiranne dait saq ndéq beriman, ndéq araq napi juaq saq suci, séngaq pikiran dait até nurani ie pade sampun kotor!

¹⁶Ie pade bebase bahwe ie pade kenal kance Allah, laguq siq perbuatan ie pade, ie pade nilas Ie. Ie pade bejat, durhake dait ndéqne sanggup ngelaksaneang hal-hal saq solah.