Read KITAB SUCI ZABUR INJIL TITUS 2 Bible Online

TITUS 2 - KITAB SUCI ZABUR INJIL bible

TITUS 2

¹Laguq side, Titus, side harus ngajahang pengajahan saq kenaq.

²Béng naséhat dengan-dengan mame saq lingsir, adéq ie pade tao nahen diriqne, bijaksane, idup jari dengan saq patut tehormatin, idup dalem iman, kasih dait dalem ketekunan.

³Maraq nike éndah dengan-dengan nine saq lingsir, ie pade harus idup jari dengan-dengan saq beribadah, ndéqne kanggo pitnah dengan lain, ndéqne kanggo ketagihan ineman keras, laguq ie pade harus tao ngajahang hal-hal saq solah,

⁴adéq siq care nike ie pade bau didik dengan-dengan nine saq masih bajang jari ngasihin semame dait bije-bijene,

⁵jari bijaksane, idup suci dait jari senine saq solah saq taat léq semamene. Siq care nike ndéq araq dengan saq bau ngewade Manik Allah.

⁶Maraq nike éndah, béng naséhat dengan-dengan bajang adéq ie pade nguasein diriqne dalem selapuq hal,

⁷dait side mésaq harus jari teladan kelakuan saq solah. Side harus jujur dait pacu-pacu ngajahang.

⁸Kadu base saq bijaksane, saq ndéq bau tecele siq dengan, adéq musuh-musuhde jari ilaq, séngaq ndéq araq hal-hal saq lengé saq bau ie pade raosang mengenai ite.

⁹Hambe-hambe harus taat léq majikanne, dait nyenengang majikanne léq dalem selapuq hal. Ie pade ndéq kanggo ngelawan,

¹⁰atao memaling. Ie pade harus nyatayang bahwe ie pade tetep tulus ihlas dait setie, adéq dengan gen muji pengajahan mengenai Allah, Juruselamet ite.

¹¹Séngaq rahmat Allah saq nyelametang selapuq manusie sampun nyate.

¹²Rahmat Allah nike didik ite adéq ndéq malik idup betentangan kance pekayunan Allah dait ndéq turut keméléq duniawi. Ite tedidik jari idup bijaksane, adil dait beribadah léq dalem dunie niki.

¹³Mangkin niki ite ngantih pengharepan saq miaq bahagie serte berembé Allah dait Juruselamette Deside Isa Almasih nyatayang kemuliean-Ne saq Maheagung.

¹⁴ Ie sampun ngurbanang diriq-Ne umaq ite jari bébasang ite léman selapuq kejahatan, dait nyuciang dengan-dengan saq jari dowé-Ne mésaq, dait saq rajin ngelaksaneang saq solah.

¹⁵Ajahang selapuqne nike, dait béng naséhat dait yakinang dengan-dengan saq dengahang side siq wibawe. Ndaq alurang sopoq dengan juaq ngeréméhang side.