Read KITAB SUCI ZABUR INJIL TITUS 3 Bible Online

TITUS 3 - KITAB SUCI ZABUR INJIL bible

TITUS 3

¹Pade ingetang anggote jemaahde adéq ie pade tunduk léq pemréntah dait dengan-dengan saq bekuase, dait mélé ngelaksaneang sebilang pegawéan saq solah.

²Badaq ie pade adéqne ndaq pitnah dengan atao betungkasan kance sai juaq, laguq adéqne gerasaq dait harus tetep lemah lembut tipaq selapuq dengan.

³Séngaq laéq ite mésaq éndah bodo, sesat dait ndéq taat. Ite tejariang hambe siq macem-macem napsu dait keméléq; ite idup siq niat-niat saq jahat dait talon até, dait ite saling meriq.

⁴Laguq Allah, Juruselamette nyatayang kasih dait kesolahan-Ne tipaq ite.

⁵Léq waktu nike Ie sampun nyelametang ite, ndéqne lantaran perbuatan solah saq sampun ite laksaneang, laguq lantaran rahmat-Ne. Allah nyelametang ite langan Roh-Ne saq ngicanin ite kelahiran baru dait idup baru, siq care persiq ite.

⁶Allah ngicanin ite Roh-Ne siq perantarean Deside Isa Almasih, Juruselamette,

⁷adéq ite sebagé dengan saq tejariang kenaq léq arepan Allah sehingge hubungante kance Allah jari solah malik siq rahmat-Ne, berhak nerimaq idup saq kekel menurut pengharepante.

⁸Ucapan niki tetu-tetu kenaq. Dait tiang mélé adéq side tegesang hal-hal niki, adéq dengan-dengan saq percaye léq Allah tetu-tetu berusahe ngelaksaneang pegawéan-pegawéan saq solah dait bemanpaat tipaq selapuq dengan.

⁹Jaoqang diriqde léman pegejuhan saq ndéq araq manpaatne, cerite-cerite silsilah, betungkasan dait besiaq mengenai Hukum Taurat. Selapuqne nike ndéq araq manpaatne dait sie-sie.

¹⁰Dengan saq jari penyebap perpecahan léq dalem jemaah, harus side peringet sekali due; sesampun nike ndaq malik bebatur kance ie.

¹¹Side nenaoq bahwe dengan saq maraq nike tetu-tetu sesat dait dose-dosene ngukum diriqne mésaq.

¹² Tiang gen becat ngutus Artemas atao Titikus ojok side, pade berusahe dateng ojok tiang léq Nikopolis, séngaq tiang sampun mutusang jari ndot léq derike sengonéq musim telih.

¹³ Pade berusahe pacu-pacu jari nulung Zenas, ahli Taurat nike, dait Apolos, adéq ie pade bau berangkat dait ndéqne kekurangan napi-napi.

¹⁴Dengan-dengante harus berajah ngelaksaneang hal-hal saq solah, adéqne bau nyukupang keperluan-keperluan saq mule tetu-tetu teperluang; ndaq jangke ie pade idup ndéq araq manpaatne.

¹⁵Selapuq semeton saq araq bareng tiang, ngirim salam tipaq side. Sampéang salam tiang tipaq ie pade saq ngasihin tiang pade léq dalem iman. Rahmat Tuhan araq bareng kance side pade.