Read KITAB SUCI ZABUR INJIL PILEMON 1 Bible Online

PILEMON 1 - KITAB SUCI ZABUR INJIL bible

PILEMON 1

¹Pilemon, batur dait dengan saq bareng begawéan kance tiang pade! Tiang, Paulus, sopoq tahenan lantaran Deside Isa Almasih, bareng kance semetonte Timotius, nulis surat niki tipaq side,

² dait tipaq jemaah saq bekumpul léq balénde; dait éndah tipaq semetonte saq nine Apia, dait tipaq Arkipus, batur saq pade-pade bejuang kance ite.

³Rahmat dait damé sejahtere léman Allah, Bapante dait léman Junjungan Saq Mulie Deside Isa Almasih araq bareng kance side.

⁴Tiang ngucap syukur tipaq Allah tiang, sebilang tiang inget side léq dalem do'e tiang.

⁵Séngaq tiang dengah mengenai kasihde tipaq selapuq dengan suci dait mengenai imande léq Deside Isa Almasih Junjungan Saq Mulie.

⁶Tiang bedo'e semoge hubungante besemeton léq dalem iman gen ngasilang pengertian saq sayan luwéq mengenai sebilang hal saq solah léq antare ite bagi Almasih.

⁷Pilemon, lantaran kasihde, tiang mauq penghiburan dait kekuatan séngaq até dengan-dengan suci sampun side hibur.

⁸Keranaq nike, timaq léq dalem Almasih tiang bedowé kebébasan jari mréntah side napi saq harus side laksaneang,

⁹laguq lantaran kasihde nike, tiang cume tunas doang. Tiang, Paulus, saq sampun toaq dait mangkin tiang kenyeke tetahen léq dalem bui lantaran Deside Isa Almasih,

¹⁰ngajuang sopoq petunasan léq side mengenai bije tiang léq dalem Almasih saq sampun tiang mauq sewaktu tiang araq léq dalem bui niki, aranne Onesimus.

¹¹Laéq ie ndéq araq manpaatne léq side, laguq mangkin ie bemanpaat, ndéqne cume léq side doang, laguq léq tiang éndah.

¹²Mangkin ie saq tiang kasihin nike tiang suruq tulak malik tipaq side.

¹³Setetune tiang melét suruq ie ndot kance tiang jari penggentiq side, adéq ie bau nulung tiang, sengonéq tiang araq léq dalem bui niki lantaran beriteang Kabar Solah léman Allah.

¹⁴Laguq tiang ndéq mélé ngelaksaneang napi-napi lamun side ndéqman setuju, adéq saq solah nike ndaq side laksaneang secare terpakse, laguq secare ihlas.

¹⁵Sang Onesimus bekelin léman side cume sementare waktu, adéq side bau miaq ie tulak malik selaéq-laéqne.

¹⁶Mangkin Onesimus nike ndéqne sekedar hambe doang, ie lebihan léman nike. Ie jari semeton saq pade-pade ite kasihin, secare manusie dait léq dalem Tuhan. Ie bemanpaat gati umaq tiang, lebih-lebih léq side! Pasti ie bemanpaat gati jari pelayan atao jari semeton léq dalem Tuhan!

¹⁷Lamun side anggep tiang baturde saq seiman, side harus terimaq malik Onesimus maraq side nerimaq tiang.

¹⁸Lamun ie salaq atao berutang léq side, alurang tiang saq nanggung selapuqne nike.

¹⁹Tiang, Paulus, nulis kadu ime tiang mésaq: Tiang gen lunasang selapuqne. Tiang ndéqne perlu ingetang bahwe side mésaq berutang léq tiang, nike diriqde mésaq.

²⁰Semeton tiang Pilemon, semoge léq dalem Tuhan side bemanpaat umaq tiang, adéq angen tiang jari gembire léq dalem Almasih.

²¹Tiang tulis surat niki lantaran yakin bahwe side gen ngelaksaneang napi saq tiang tunas. Malahan tiang nenaoq side gen ngelaksaneang saq lebihan léman nike.

²²Selain nike, tulung sedieang tiang taoq jari madéq léq balénde, séngaq tiang beharep adéq langan do'e-do'ende tiang gen tetulakang tipaq side.

²³ Epapras, saq araq bareng kance tiang léq dalem bui lantaran Almasih, ngirim salam tipaq side.

²⁴ Terimaq éndah salam batur-batur tiang: Markus, Aristarkus, Demas dait Lukas.

²⁵Rahmat Junjungan Saq Mulie Deside Isa Almasih araq bareng roh side.