Read KITAB SUCI ZABUR INJIL IBRANI 10 Bible Online

IBRANI 10 - KITAB SUCI ZABUR INJIL bible

IBRANI 10

¹Hukum Taurat cume ngebéng gambaran saq saru-saru mengenai hal-hal saq solah saq gen dateng, dait ndéqne gambaran saq setetune léman hal-hal nike. Keranaq nike, hukum nike ndéq mungkin nyempurneang ie pade saq parek tipaq Allah siq kurban saq pade, saq sebilang taun tetep teaturang.

²Séngaq lamun mule bau, pasti dengan-dengan ndéqne malik ngaturang kurban, lantaran ie pade saq beribadah nike ndéq sadar malik léq dose sesampun sekali tesuciang jari selaéq-laéqne.

³Laguq nyatene kurban-kurban saq teaturang sebilang taun nike malahan miaq dengan jari inget léq dose-dose ie pade,

⁴séngaq daraq sampi dait daraq bémbéq mame mule ndéqne bau ngapus dose.

⁵ Keranaq nike sewaktu Almasih tame ojok dunie, Ie matur léq Allah, “Deside nénten suke kurban dait persembahan; sebalikne Deside sampun nyedieang rage umaq Tiang.

⁶Deside nénten nerimaq kurban saq tetunuq atao kurban jari pengapus dose.

⁷Beterus Tiang matur, ‘Niki Tiang, ya Allah! Tiang parek jari ngelaksaneang pekayunan Deside, maraq saq tetulis léq dalem Kitab Suci mengenai Tiang!’ ”

⁸Léq penembéqne Almasih matur, “Deside nénten suke kurban dait persembahan; Deside nénten nerimaq kurban binatang saq tetunuq jari persembahan dait léq kurban jari pengampunan dose.” Timaq selapuq kurban nike teaturang menurut Hukum Taurat.

⁹Sesampun nike Almasih matur, “Niki Tiang, ya Allah! Tiang parek jari ngelaksaneang pekayunan Deside.” Siq care nike Allah ngapus selapuq kurban saq laéq nike, dait gentiqne siq kurban saq kedue, nike Almasih.

¹⁰Dait lantaran pekayunan Allah nike, ite sampun tesuciang langan persembahan rage Almasih, sekali jari selaéq-laéqne.

¹¹ Sebilang imam ngelaksaneang tugasne jari imam sebilang jelo, dait beulang-ulang ie ngaturang kurban-kurban saq pade. Laguq kurban-kurban nike tetu-tetu ndéq bau ngapus dose.

¹² Sebalikne, Almasih cume ngaturang sopoq kurban jari pengampunan dose, dait kurban nike berlaku selaéq-laéqne. Sesampun ngaturang kurban nike, Almasih melinggih léq sedi kanan Allah, dait mréntah bareng kance Allah.

¹³Dait mangkin Almasih ngantos jangke Allah miaq musuh-musuh-Ne takluk léq Ie.

¹⁴Jari siq sopoq kurban, Almasih nyempurneang dengan-dengan saq sampun tepersiq léman dose.

¹⁵Mengenai hal nike Roh Allah éndah besaksi tipaq ite,

¹⁶ “ ‘Niki perjanjian saq gen Tiang piaq kance ie pade, léq jelo-jelo saq gen dateng.’ Ie bemanik éndah, ‘Gen Tiang toloq hukum-hukum Tiang léq dalem até ie pade, dait gen Tiang tulis hal nike léq dalem pikiran ie pade.’ ”

¹⁷ “Tiang gen lupaqang dose-dose dait kejahatan-kejahatan ie pade.”

¹⁸Jari, dose-dose dait kejahatan-kejahatan nike sampun teampunin, make ndéqne perlu malik teaturang kurban lantaran dose.

¹⁹Jari, semeton-semeton senamian, siq ninggalne Deside Isa nike, mangkin ite bani tame ojok dalem Ruang Mahesuci.

²⁰Deside Isa sampun bukaqang ite sopoq langan saq baru, dait saq jauq ite tipaq kehidupan langan kelambu, nike rage Deside Isa mésaq.

²¹Dait mangkin ite bedowé sopoq imam saq agung saq betanggung jawab léq Gedéng Allah.

²² Keranaq nike silaq ite ngadep Allah siq angen saq tulus dait iman saq teguq; siq até saq sampun tesuciang léman perasaan salaq, dait siq awak saq sampun tepersiq kadu aiq saq murni.

²³Ite harus tetu-tetu percaye léq pengharepan saq sampun ite akuq, séngaq Allah nike setie dait Ie gen nepatin janji-Ne.

²⁴Dait silaq ite saling perhatiang, adéq ite saling ngebéng semanget léq dalem kasih dait léq dalem pegawéan saq solah.

²⁵Ndaq ite jaoqang diriq léman acare-acare ibadahte, maraq saq tebiaseang siq pire dengan, laguq silaq ite saling naséhat, dait sayan pacu ngelaksaneang lantaran jelo Tuhan sayan rapet.

²⁶Séngaq lamun penenaoq mengenai kebenaran léman Allah sampun tesampéang tipaq ite, laguq ite masih doang sediah gawéq dose, make ndéqne araq malik kurban jari ngapus dosente.

²⁷ Laguq sopoq-sopoqne saq araq umaq ite, penghakiman saq nakutang dait api murke-Ne saq gen nunuq jangke bis dengan-dengan durhake!

²⁸ Dengan saq ndéq taat léq hukum saq teicanin siq Musa tehukum maté ndéq araq ampun, lamun araq saksi due atao telu dengan, saq buktiang bahwe ie salaq.

²⁹ Berembé beratne hukuman saq gen teterimaq siq dengan saq ngicaq-icaq Bije saq asalne léman Allah. Dengan nike nganggep hine daraq perjanjian Allah, nike ninggalne Almasih saq persiq ie léman dose. Ie menghine Roh saq ngicanin rahmat.

³⁰ Ite nenaoq sai Ie saq bemanik, “Tiang gen bales! Tiang gen ngukum!” dait saq bemanik, “Tuhan gen hakimin umat-Ne.”

³¹Berembé kenjeringne lamun geriq ojok gading Allah Saq Idup!

³²Pade inget berembé keadaan semeton senamian léq waktu saq julu. Sesampun side pade nerimaq cahaye Allah, side pade luwéq menderite; laguq side pade tetep tahen léq dalem perjuangan saq berat.

³³Araq waktune side pade tehine dait teperlakuang secare ndéq bagus léq julun dengan luwéq. Araq waktune éndah side pade milu éndah menderite kance ie pade saq teperlakuang maraq nike,

³⁴dait side pade milu ngeraseang kesedihan dengan saq tebui. Dait sewaktu selapuq dowén side pade terampas, side pade seneng nerimaq hal nike, séngaq side pade nenaoq bahwe side pade masih bedowé hal saq solahan, saq gen bau tahen selaéq-laéqne.

³⁵Keranaq nike, ndaq putus ase, séngaq lamun side pade tetep percaye, make araq upaq saq beléq léq hal nike.

³⁶Side pade perlu ketekunan, adéq side pade bau ngelaksaneang pekayunan Allah dait siq care nike bau nerimaq napi saq tejanjiqang siq Allah.

³⁷ Séngaq léq dalem Kitab Suci tetulis, “Cume karing seberaq doang, make Ie saq gen rauh nike, gen gelis rauh; Ie nénten gen tunde-tunde kerauhan-Ne.

³⁸Dait dengan-dengan Tiang saq soléh gen idup siq iman; laguq lamun araq léq antare ie pade saq mundur, make Tiang ndéq suke léq ie.”

³⁹Ite niki ndéqne umat saq ngundurang diriq dait binase. Sebalikne, ite niki umat saq percaye léq Allah dait saq mauq idup.