Read KITAB SUCI ZABUR INJIL IBRANI 12 Bible Online

IBRANI 12 - KITAB SUCI ZABUR INJIL bible

IBRANI 12

¹Nah, mengenai diriqte mésaq, léq sekiterte araq luwéq gati saksi! Keranaq nike, silaq ite tetéh selapuq saq nyusahang ite dait dose saq halangin ite. Dait tekun pelai léq dalem perlombaan saq tewajibang umaq ite.

²Silaq ite laksaneang nike siq perhatiante cume tetujuang tipaq Deside Isa Almasih, séngaq Ie saq mimpin ite léq dalem iman, dait saq jauq imante nike tipaq kesempurnean. Deside Isa tahen menderite léq kayuq salib! Ie nénten peduli bahwe ninggal léq kayuq salib nike sopoq hal saq merilaq. Deside Isa cume iling léq sukecite saq gen Ie terimaq éraq. Mangkin Ie melinggih léq sedi kanan tahte Allah.

³Pade inget léq Ie saq tekun nanggung penganiayean saq luar biase tipaq diriq-Ne léman pihak dengan-dengan bedose, adéq side ndaq jari lemah dait putus ase.

⁴Séngaq léq dalem perjuangande ngelawan dose, side pade ndéq uwah bejuang jangke harus numpahang daraq.

⁵ Dait ndaq side lupaqang naséhat Allah niki, saq teicanin léq side jari bije-bije dowén Allah: “Bije-bije dowén Tiang, perhatiang solah-solah didikan Tuhan, dait ndaq putus ase lamun Ie peringet side.

⁶Séngaq Tuhan ngempuk sebilang dengan saq Ie kasihin, dait Ie gen didik sebilang dengan saq teakuq jari bije-bije dowé-Ne.”

⁷Side pade harus nerimaq didikan léman Allah jari sopoq perajahan léman sopoq amaq. Séngaq napi araq sopoq kanak saq ndéq uwah tempuk siq amaqne?

⁸Lamun side pade ndéq milu tehukum maraq selapuq bijene saq lain niki artine side pade ndéqne bije saq sah, laguq bije saq ndéq sah.

⁹Ite bedowé amaq léq dunie. Ie ngajah ite, dait ite hormat léq ie. Lamun maraq nike, lebih-lebih Bapa selapuq roh, pasti ite harus lebihan malik taat léq Ie adéq ite bedowé idup.

¹⁰Dengan toaqte saq léq dunie didik ite cume léq waktu saq araq batesne, menurut napi saq ie pade anggep solah. Laguq Allah didik ite jari kesolahante mésaq, adéq ite mauq bagian léq dalem kesucian-Ne.

¹¹Mule léq waktu ite tedidik ndéqne miaq angente seneng, laguq cume miaq ite sedih doang. Laguq sesampun nike ngasilang kebenaran saq ngicanin damé léq ie pade saq tedidik.

¹² Keranaq nike, kuatang imende saq lemah dait jengkunde saq ngijik nike!

¹³ Side harus tetep lampaq léq langan saq rate, adéq naénde saq démpang ndéqne kedesor, laguq malahan jari selah.

¹⁴Pade berusahe idup rukun kance selapuq dengan. Pade berusahe éndah jari idup suci. Séngaq ndéq araq sopoq dengan juaq bau serioq Tuhan lamun ie ndéq idup maraq nike.

¹⁵ Jagaq adéq ndaq araq sopoq dengan juaq saq jaoqang diriqne léman rahmat Allah, adéq ndaq jangke araq saq jari maraq taletan beracun léq tengaq-tengaq side pade sehingge nimbulang kesulitan dait nyédaq luwéq dengan siq racunne.

¹⁶ Jagaq adéq ndaq jangke araq dengan saq gawéq perbuatan saq cabul atao bedowé napsu saq rendah maraq Esau, saq jual hakne sebagé bije saq sengake, cume jari sepiring keloran.

¹⁷ Séngaq side pade nenaoq, bahwe sesampun nike, sewaktu ie gen nerimaq berkah nike ie tetolaq, séngaq ie ndéq mauq kesempatan jari pesolah kesalaqanne, timaq ie boyaq jangke nangis.

¹⁸ Séngaq side pade ndéq dateng tipaq gunung saq bau tekintur dait api saq begelaur, tipaq taoq saq peteng dedet, dait angin pusut;

¹⁹tipaq suare terompét, dait tipaq suare saq miaq ie pade saq dengah suare nike nunas, adéq ndaq malik ngeraos kance ie pade.

²⁰ Séngaq ie pade ndéq tahen dengah préntah saq tesampéang siq suare nike. Séngaq suare nike bebase, “Selapuq saq kintur gunung niki, ndéqne peduli binatang atao sai juaq, harus tepeléwas kadu batu jangke maté.”

²¹ Luar biase gati napi saq teserioq siq dengan-dengan Israel nike jangke Musa bebase, “Tiang takut gati dait ngijik!”

²²Sebalikne, side pade sampun dateng ojok bukit Sion dait kote Allah saq idup, nike Yerusalem saq léq sorge kance beiyu-iyu malaékatne.

²³Side pade turut sopoq kumpulan saq meriah -- dait tipaq bije-bije saq sengake, saq aran-aranne tecatet léq sorge. Side pade parek tipaq Allah, Hakim selapuq umat manusie. Side pade hadepin roh-roh dengan saq kenaq, saq sampun tejariang sempurne.

²⁴ Side pade parek tipaq Deside Isa, Perantare léq perjanjian saq baru nike; side pade ngadepin ketisan daraq saq besuare kuatan léman daraq Habil.

²⁵ Keranaq nike, onyaq-onyaq ndaq jangke side ndéq mélé dengahang Ie saq bemanik nike. Ie pade saq ndéq mélé dengah Ie saq rauh ojok gumi dait nyampéang Manik Allah, ndéqne bau pelai. Lebih-lebih ite niki saq dengahang Ie saq bemanik léman sorge! Lamun ite ndéq mélé dengahang Ie, ndéq mungkin ite bau selamet!

²⁶ Léq waktu nike suare-Ne miaq gumi jari inggur. Laguq mangkin Ie bejanji, “Karing sekali, Tiang gen piaq inggur ndéqne cume gumi, laguq langit éndah.”

²⁷Manik-Ne “karing sekali” nyatayang bahwe seantéro dunie saq sampun tecipteang gen tepiaq inggur dait tesingkirang, adéq saq masih cume saq ndéq bau tepiaq inggur.

²⁸Keranaq nike, ite harus ngucap syukur léq Allah, séngaq ite nerimaq léman Ie sopoq kerajaan saq ndéq bau teguncang. Ite patut besyukur dait beribadah tipaq Allah siq rase hormat dait takut, maraq care saq tekayunang siq Allah.

²⁹ Séngaq Allahte maraq api saq ngotongang.