Read KITAB SUCI ZABUR INJIL IBRANI 13 Bible Online

IBRANI 13 - KITAB SUCI ZABUR INJIL bible

IBRANI 13

¹Side pade harus tetep idup dalem kasih sopoq kance saq lain maraq semeton.

² Ndaq berat angende béng nyodoq dengan-dengan pendateng. Séngaq siq ngelaksaneang hal nike, ndéqne sadar araq pire dengan saq sampun nerimaq malaékat léq baléne.

³Pade inget léq dengan-dengan saq araq léq dalem bui, anggep diriqde éndah araq léq dalem bui bareng kance ie pade. Dait dengan-dengan saq semélé-mélé teperlakuang, side pade harus inget léq ie pade maraq side pade éndah teperlakuang maraq nike.

⁴Selapuq dengan harus nyatayang rase hormat léq janji nikahne, nike lantaranne senine-semame harus setie sopoq kance saq lainne. Dengan saq gawéq perbuatan saq cabul dait dengan saq bezinah gen teadilin siq Allah.

⁵ Ndaq idupde tejariang panjak siq képéng, laguq side pade harus merase puas siq napi saq araq léq side. Séngaq Allah sampun bemanik, “Tiang tetu-tetu ndéq gen ngalurang side dait Tiang tetu-tetu ndéq gen bilin side.”

⁶ Keranaq nike ite bani matur, “Tuhan nike Penulung tiang, tiang ndéq takut. Napi saq bau tepiaq siq manusie léq tiang?”

⁷Ndaq lupaq léq pemimpin-pemimpinde saq nyampéang Manik Allah tipaq side. Perhatiang berembé léq penutuq idup ie pade dait turut teladan ie pade.

⁸Deside Isa Almasih tetep pade, timaq laéq, mangkin dait jangke selaéq-laéqne.

⁹Ndaq alurang diriqde tepiaq sesat siq pengajahan-pengajahan saq ndéq keruan. Aténte harus teteguqang siq rahmat Allah, nike saq solah; ndaq lantaran aturan-aturan mengenai keloran. Dengan-dengan saq laéq taat léq aturan-aturan nike, ndéq mauq manpaatne.

¹⁰Ite bedowé sopoq méje taoq kurban jari ngaturang kurban tipaq Allah. Dait dengan-dengan saq ngelayanin léq dalem Kémah Tuhan, ndéqne berhak ngelorang kurban saq araq léq atas méje taoq kurban nike.

¹¹ Daraq binatang saq teaturang jari kurban pengampunan dose, tejauq siq imam agung ojok Ruang Mahesuci, laguq bangké binatang nike tetunuq léq luah kémah.

¹²Nike lantaranne Deside Isa éndah ninggal léq luah jebak beléq kote jari persiq umat-Ne léman dose siq daraq-Ne mésaq.

¹³Keranaq nike, silaq ite parek tipaq Ie léq luah perkémahan dait milu tehine bareng kance Ie.

¹⁴Séngaq léq gumi ndéq araq taoq ndot saq kekel umaq ite; ite boyaq kote saq gen dateng.

¹⁵Keranaq nike, siq perantare Deside Isa, ite harus tetep memuji-muji Allah; nike jari kurban syukurte tipaq Ie, saq ite aturang langan ucapan jari mulieang peséngan-Ne.

¹⁶Ndaq lupaq piaq hal saq solah dait saling tulung, séngaq niki kurban-kurban saq nyenengang Allah.

¹⁷Pade taat léq préntah pemimpin-pemimpinde, dait pade tunduk léq ie pade. Séngaq ie pade tetep merhatiang jiwende, dait ie pade harus betanggung jawab tipaq Allah. Lamun side pade taat léq ie pade, ie pade bau begawéan siq angen saq seneng; lamun ndéq, make ie pade gen begawéan siq angen saq sedih, dait hal nike ndéq gen miaq side pade untung.

¹⁸Pade terus do'eang tiang pade. Tiang pade yakin até nurani tiang pade bersi. Séngaq léq dalem selapuq hal tiang pade tetep mélé ngelaksaneang napi saq kenaq.

¹⁹Terutame sanget siq tiang tunas, adéq side pade do'eang tiang adéq Allah gelis gadingang tiang tulak ojok side.

²⁰Allah sumber damé sejahtere, langan daraq perjanjian saq kekel, sampun jauq tulak léman tengaq-tengaq dengan ninggal Pengarat Agung selapuq dombe, nike Deside Isa Almasih, Junjungante Saq Mulie.

²¹Semoge Allah sumber damé sejahtere nike nyempurneang side pade siq selapuq saq solah saq side pade perluang jari ngelaksaneang pekayunan-Ne. Semoge siq perantarean Deside Isa Almasih, Allah ngelaksaneang napi saq Ie kayunang léq dalem ite. Bagi Ie kemuliean selaéq-laéqne! Amin.

²²Tiang tunas adéq side pade réde perhatiang selapuq naséhat-naséhat tiang niki, séngaq surat tiang niki ndéqne bélo.

²³Side pade harus nenaoq bahwe semetonte Timotius sampun lumbar. Lamun ie sampun dateng ojok tiang, laun tiang kance ie jangoq side pade.

²⁴Sampéang salam tiang pade tipaq selapuq pemimpinde dait tipaq selapuq dengan-dengan saq tehususang bagi Allah. Terimaq éndah salam léman semeton-semeton léq Italia.

²⁵Rahmat Allah araq bareng kance side pade.