Read KITAB SUCI ZABUR INJIL IBRANI 4 Bible Online

IBRANI 4 - KITAB SUCI ZABUR INJIL bible

IBRANI 4

¹Keranaq nike sengonéq janji jari tame ojok dalem taoq-Ne mentelah masih berlaku, ite harus tetep merase takut ndaq-ndaq araq sopoq dengan léq antare side teanggep gagal tame ojok dalemne.

²Séngaq Kabar Solah nike sampun teberiteang léq ite, pade maraq tipaq ie pade. Laguq léq ie pade, manik nike ndéq araq manpaatne. Séngaq sewaktu ie pade dengah, ie pade ndéq percaye.

³ Laguq ite saq beriman gen tame ojok taoq-Ne mentelah. Hal nike kenaq kance napi saq temanikang siq Allah, maraq niki, “Léq dalem murke Tiang, Tiang besumpah, ‘Ie pade ndéq gen tame jari mauq mentelah bareng kance Tiang.’ ” Allah bemanik maraq nike timaq karye-Ne sampun tutuq mulai léman dunie niki Ie cipteang.

⁴ Séngaq mengenai jelo kepituq, araq tetulis maraq niki, “Léq jelo saq kepituq Allah mentelah léman selapuq karye-Ne.”

⁵ Mengenai hal nike araq éndah tetulis maraq niki, “Ie pade ndéq gen tame ojok negeri nike jari mauq mentelah bareng kance Tiang.”

⁶Jari ie pade saq penembéq dengah berite mengenai Kabar Solah nike, ndéqne tame ojok taoq-Ne mentelah séngaq ie pade ndéq percaye. Lamun maraq nike sampun jelas bahwe araq dengan-dengan saq gen tame ojok taoq-Ne mentelah nike.

⁷ Séngaq Allah sampun nentuang sopoq jelo, saq tesebut “Jelo Niki”. Betaun-taun sesampun nike Allah bemanik mengenai hal nike langan Daud, léq dalem ayat saq onéq sampun tesebut, “Lamun léq jelo niki side dengahang Manik Allah, ndaq side pagah.”

⁸ Séngaq lamun Yusak sampun jauq dengan-dengan nike tame ojok taoq-Ne mentelah, make Allah nénten gen bemanik malik mengenai sopoq jelo saq lain.

⁹Jari, umaq dengan-dengan saq tehususang bagi Allah masih araq janji jari mentelah maraq Allah mentelah léq jelo saq kepituq nike.

¹⁰ Séngaq dengan-dengan saq sampun tame ojok taoq-Ne mentelah, ie pade gen mentelah éndah léman selapuq pegawéanne, pade maraq Allah.

¹¹Keranaq nike, silaq ite berusahe pacu-pacu jari tame ojok taoq-Ne mentelah nike, adéq ndaq jangke sopoq dengan juaq léman ite saq gagal maraq ie pade laéq, lantaran ndéqne percaye léq Allah.

¹²Manik Allah nike idup dait kuat; merangan léman selapuq kléwang saq bemangan due. Manik nike nusuk dalem gati jangke misahang jiwe dait roh; sendi-sendi dait sumsum, malahan bau bédeang pikiran dait niat até manusie.

¹³Ndéq araq sopoq mahluk juaq saq bau seboq diriqne léman arepan Allah. Selapuqne pedas penggitan dait kebukaq léq arepan-Ne. Dait ite harus betanggung jawab tipaq Allah.

¹⁴Keranaq nike ite harus tetu-tetu percaye léq pengakuan imante. Séngaq ite bedowé Imam Agung saq beléq saq sampun liwatin selapuq langit, Ie Deside Isa, Bije saq asalne léman Allah.

¹⁵Imam Agungte nike ndéqne imam saq ndéq bau ngeraseang kelemahan-kelemahante. Sebalikne, Ie sampun tecobe léq dalem selapuq hal, pade maraq ite mésaq; cume Ie nénten piaq dose!

¹⁶Keranaq nike, silaq ite baniang diriq parek ojok tahte paice-Ne adéq mauq rahmat dait paice, sehingge ite mauq pertulungan léq waktune.