Read KITAB SUCI ZABUR INJIL IBRANI 5 Bible Online

IBRANI 5 - KITAB SUCI ZABUR INJIL bible

IBRANI 5

¹Sebilang Imam Agung tepiléq léq antare manusie, dait tetetepang jari ngewakilin manusie léq urusan ie pade kance Allah. Tugasne jari ngaturang persembahan dait kurban lantaran dose.

²Imam Agung nike bau paham ie pade saq jahat dait sesat, lantaran ie mésaq luwéq kelemahan.

³ Dait, lantaran ie mésaq lemah, make ie harus ngaturang kurban, ndéqne cume lantaran dose-dose umat, laguq lantaran dose-dosene mésaq éndah.

⁴ Dait ndéq araq sopoq dengan juaq saq bait kehormatan nike umaq diriqne mésaq, laguq ie temanikang siq Allah pade maraq Harun.

⁵ Maraq nike éndah Almasih. Ie nénten mulieang diriq-Ne mésaq jari Imam Agung. Allah mésaq saq ngangkat Ie. Manik Allah tipaq Ie, “Deside Bije saq asalne léman Tiang, léq jelo niki Tiang sampun jariang Deside Bije Tiang.”

⁶ Pade maraq léq ayat saq lain Allah bemanik éndah, “Deside Imam selaéq-laéqne, menurut aturan Imam Melkisedek.”

⁷ Sewaktu Almasih idup léq dunie niki, Ie bedo'e dait sanget siq-Ne tunas léq Allah, saq sanggup nyelametang Ie léman ninggal. Dait lantaran kesoléhan-Ne Allah mirengang Ie.

⁸Deside Isa nike Bije saq asalne léman Allah, laguq timaqne maraq nike, Ie berajah jari taat langan penderitean-Ne.

⁹Make sesampun Ie tesempurneang, Ie jari sumber keselametan saq kekel tipaq selapuq dengan saq taat léq Ie,

¹⁰dait Allah éndah nyatayang Ie jari Imam Agung, menurut aturan Imam Melkisedek.

¹¹Mengenai kedudukan Deside Isa jari Imam Agung, masih luwéq saq perlu tiang pade sampéang léq side, laguq sengke jari jelasang hal nike, séngaq side pade ndéq iniq becat ngerti.

¹² Setetune sampun waktune side jari guru, laguq nyatene side pade masih perlu berajah léman dengan lain mengenai hal-hal saq paling dasar léman pengajahan Allah. Side pade ndéqman mampu nerimaq keloran saq tegéng; side pade masih harus nginem susu doang.

¹³Dengan saq masih nginem susu, artine ie masih bebéaq; ie ndéqman bedowé pengalaman mengenai napi saq kenaq dait napi saq salaq.

¹⁴Keloran saq tegéng nike umaq dengan déwase saq sampun bedowé pengalaman, tao béde-bédeang mbé saq solah dait mbé saq jahat.