Read KITAB SUCI ZABUR INJIL IBRANI 7 Bible Online

IBRANI 7 - KITAB SUCI ZABUR INJIL bible

IBRANI 7

¹ Melkisedek niki raje léman Salem dait imam Allah Saq Maheagung. Sewaktu Ibrahim tulak léman perang ngalahang raje-raje, Melkisedek rauh nyambut ie dait ngicanin ie berkah.

²Beterus Ibrahim ngaturin Melkisedek sepersepulu léman napi saq ie rebut. (Peséngan Melkisedek artine, saq penembéq, “Raje Keadilan” dait lantaran Ie raje léman Salem, make artine éndah “Raje Damé”.)

³Mengenai Melkisedek niki ndéq araq keterangan bahwe ie bedowé amaq atao inaq atao leluhur; ndéq araq éndah keterangan mengenai kelahiranne, atao ninggalne. Ie pade maraq Bije saq asalne léman Allah; Ie Imam saq kekel.

⁴Jari, ite bau serioq léq deriki berembé agungne Melkisedek niki; Ie agung sehingge Ibrahim, bapaq leluhur bangsente, ngicanin ie sepersepulu léman selapuq harte saq ie mauq léman perang nike.

⁵ Léq dalem Hukum Taurat, tetentuang bahwe imam-imam keturunan Lewi saq betugas bait sepersepulu léman dowé bande dait penghasilan umat Israel, nike semeton-semetonne mésaq timaq ie pade bareng-bareng keturunan Ibrahim.

⁶Melkisedek ndéqne keturunan Lewi, laguq ie éndah nerimaq sepersepulu léman selapuq saq terebut siq Ibrahim, Melkisedek éndah ngicanin berkah tipaq Ibrahim saq setetune sampun bedowé janji-janji léman Allah.

⁷Mule ndéqne bau tetilas bahwe dengan saq teberkahin nike bawaqan léman dengan saq ngicanin berkah.

⁸Imam-imam saq nerimaq bagian sepersepulu, nike manusie saq iniq ninggal. Laguq mengenai Melkisedek saq nerimaq bagian sepersepulu nike, menurut Kitab Suci tetep idup.

⁹Jari bau teparan, bahwe Lewi -- saq keturunanne bait bagian sepersepulu léman umat Israel -- bebayah éndah bagian nike langan Ibrahim.

¹⁰Timaqne Lewi ndéqman tebijeang, laguq bau teparan ie sampun araq léq dalem awak Ibrahim leluhurne, sewaktu Melkisedek bedait kance Ibrahim.

¹¹Siq pimpinan imam-imam Lewi, Hukum Taurat teicanin tipaq umat Israel. Séngaq imam-imam Lewi nike ndéqne bau ngelaksaneang secare sempurne napi saq harus ie laksaneang, make harus araq imam lain, saq maraq Imam Melkisedek, dait ndéqne léman golongan Imam Harun malik!

¹²Jari, lamun kedudukan imam-imam berobah, Hukum Taurat éndah harus berobah.

¹³Saq temaksut léq deriki mengenai sopoq dengan saq asalne léman suku lain, padahal léman suku niki ndéqne uwah sopoq dengan juaq saq betugas jari imam.

¹⁴Selapuq dengan nenaoq bahwe Junjungante Saq Mulie asalne léman suku Yehuda; dait Musa ndéq uwah nyebut suku nike sewaktu ie bebaos mengenai imam-imam.

¹⁵Hal saq teraosang niki jari sayan jelas malik, waktu araq sopoq imam lain saq maraq Melkisedek.

¹⁶Ie teangkat jari imam, ndéqne atas dasar aturan-aturan manusie, laguq atas dasar idup saq ndéqne iniq binase.

¹⁷ Séngaq mengenai Ie araq kesaksian, “Deside imam selaéq-laéqne, menurut aturan Melkisedek.”

¹⁸Jari, mangkin aturan saq laéq sampun tebatalang, séngaq ndéq kuat dait ndéq araq manpaatne.

¹⁹Hukum Taurat ndéqne bau jariang napi juaq jari sempurne. Keranaq nike mangkin ite teicanin sopoq pengharepan saq solahan; siq hal nike ite bau parek tipaq Allah.

²⁰Dait éndah, selapuqne nike tebarengin siq sumpah léman Allah. Ndéq araq sumpah maraq nike sewaktu imam-imam saq lain nike teangkat.

²¹ Laguq Deside Isa teangkat jari imam kadu sumpah, sewaktu Allah bemanik léq Ie, “Tuhan sampun besumpah, dait Ie nénten gen ngerobah keputusan-Ne, ‘Deside niki Imam selaéq-laéqne.’ ”

²²Siq care éndah Deside Isa jari jaminan léman sopoq perjanjian saq solahan.

²³Selain nike, luwéq imam-imam saq lain, séngaq ie pade sopoq-sopoq ninggal sehingge ndéq bau ngelanjutang jabatanne.

²⁴Laguq Deside Isa idup selaéq-laéqne, dait jabatanne jari imam ndéqne tegentiq siq dengan lain.

²⁵Keranaq nike jari selaéq-laéqne Deside Isa bau nyelametang dengan-dengan saq parek ojok Allah langan Ie, séngaq Ie idup selaéq-laéqne jari Perantare ie pade.

²⁶Jari, Deside Isa nike Imam Agung saq ite perluang. Ie suci; léq Ie nénten araq kesalaqan atao dose napi juaq. Deside Isa tekelin léman dengan-dengan bedose, dait tetaékang jangke ojok taoq saq atasan léman selapuq langit.

²⁷ Deside Isa nénten maraq imam-imam agung saq lain, saq sebilang jelo harus ngaturang kurban persembahan lantaran dose-dosene mésaq juluq, baruq lantaran dose-dose umat. Deside Isa ngaturang kurban cume sekali doang jari selaéq-laéqne, sewaktu Ie ngaturang diriq-Ne mésaq jari kurban.

²⁸Hukum Taurat netepang dengan saq ndéq sempurne jari imam agung. Laguq sesampun nike, léman hukum nike, Allah miaq janji kadu sumpah bahwe Allah ngangkat jari Imam Agung, Bije saq asalne léman Allah saq sampun sempurne selaéq-laéqne.