Read KITAB SUCI ZABUR INJIL IBRANI 8 Bible Online

IBRANI 8 - KITAB SUCI ZABUR INJIL bible

IBRANI 8

¹ Saq jari inti selapuqne niki bahwe: Ite bedowé Imam Agung saq maraq nike, saq melinggih léq sedi kanan Saq Maheagung léq sorge.

²Ie ngelaksaneang tugas sebagé Imam Agung léq Ruang Mahesuci, léq dalem Kémah Tuhan saq sejati, saq tepiaq siq Tuhan, ndéqne siq manusie.

³Sebilang imam agung teangkat jari ngaturang kurban atao persembahan tipaq Allah. Maraq nike éndah Imam Agungte; harus araq saq Ie aturang.

⁴Seandéne Ie araq léq dunie niki, Ie nénten gen jari imam, séngaq sampun araq imam saq ngaturang kurban saq tetuntut léq dalem Hukum Taurat.

⁵ Pegawéan saq ie pade laksaneang jari imam nike setetune cume sopoq gambaran dait bayangan léman napi saq araq léq sorge. Hal nike laéq sampun tesampéang siq Allah tipaq Musa, sewaktu Musa gen piaq Kémah Tuhan. Maraq niki Manik Allah tipaq Musa, “Inget! selapuqne nike harus side piaq menurut conto gambar saq tepetitoqang tipaq side léq atas gunung.”

⁶Laguq mangkin Deside Isa nerimaq tugas jari imam saq jaoq muliean léman napi saq telaksaneang siq imam-imam nike. Séngaq Ie sampun jari Perantare sopoq perjanjian saq muliean, séngaq tedasarang siq janji-janji saq solahan.

⁷Lamun ndéq araq kekurangan léq perjanjian saq penembéq, make ndéqne perlu malik tepiaq perjanjian saq kedue.

⁸ Laguq Allah sampun ngewade umat-Ne, sehingge Allah bemanik, “Inget! gen dateng waktune, Tiang gen miaq perjanjian saq baru kance bangse Israel, dait kance bangse Yehuda.

⁹Ndéqne maraq perjanjian saq Tiang piaq kance leluhur ie pade sewaktu Tiang pimpin ie pade sugul léman negeri Mesir. Ie pade ndéq setie léq perjanjian saq Tiang piaq kance ie pade, keranaq nike Tiang nolaq ie pade.”

¹⁰Laguq mangkin, niki perjanjian saq gen Tiang piaq kance umat Israel léq jelo-jelo saq gen dateng, manik Tuhan: “Tiang gen noloq hukum Tiang léq dalem pikiran ie pade, dait gen Tiang tulis léq até ie pade. Tiang gen jari Allah ie pade, dait ie pade gen jari umat Tiang.”

¹¹Ie pade ndéq perlu ngajah sepade wargene, atao bebadaq tipaq semetonne, “Side harus kenal kance Tuhan.” Séngaq ie pade selapuq, beléq atao kodéq, gen kenal kance Tiang.

¹²Tiang gen ngampunin kesalaqan-kesalaqan ie pade, dait Tiang ndéq gen inget malik dose-dose ie pade.

¹³Siq nyugulang perjanjian saq baru, Allah nyatayang bahwe perjanjian saq penembéq nike jari batal, dait napi saq sampun tebatalang gen becat telang.