Read KITAB SUCI ZABUR INJIL IBRANI 9 Bible Online

IBRANI 9 - KITAB SUCI ZABUR INJIL bible

IBRANI 9

¹Perjanjian saq penembéq bedowé aturan-aturan ibadah, dait éndah bedowé taoq ibadah saq tepiaq siq manusie.

² Sopoq kémah tepiaq saq bagian julune tesebut Ruang Suci. Léq derike araq tetoloq tangkaq dilah dait araq éndah méje kance ruti saq teaturang tipaq Allah.

³ Léq bagian dalemne, léq bagian mudi kelambu saq kedue, araq ruangan saq tesebut Ruang Mahesuci.

⁴ Léq dalem ruangan nike araq méje taoq kurban saq tepiaq léman emas jari tunuq dupe, dait araq éndah Peti Perjanjian saq selapuqne telapis siq emas. Léq dalem peti nike araq guci emas saq berisi manna, tunjangne Harun saq sampun besuli, dait due lémpéngan batu tulis saq léq atasne tetulis sepulu préntah léman Allah.

⁵ Léq atas Peti nike araq due Kerub kemuliean saq ngudung taoq pendaméan. Laguq mangkin selapuqne nike ndéqne bau tejelasang sopoq-sopoq.

⁶ Maraq nike selapuqne teatur. Sebilang jelo imam-imam tame ojok dalem bagian julu kémah nike jari ngelaksaneang ibadah ie pade.

⁷ Saq tame ojok bagian paling dalem léman kémah nike cume imam agung doang. Ie ngelaksaneang hal nike cume sekali setaun. Ie ngelaksaneang nike jauq daraq jari teaturang tipaq Allah lantaran diriqne mésaq dait lantaran dose-dose saq ndéq sediah tepiaq siq umat-Ne.

⁸Siq care nike, Roh Allah nyatayang secare jelas, bahwe sengonéq kémah léq bagian julu nike masih araq, langan tame ojok dalem Ruang Mahesuci nike ndéqman tebukaq.

⁹Niki jari lambang jaman saq mangkin; artine bahwe persembahan-persembahan dait kurban-kurban binatang saq teaturang tipaq Allah, ndéqne bau nyempurneang até nurani dengan saq jauq persembahan.

¹⁰Séngaq upacare-upacare nike cume berubungan kance keloran, ineman, dait macem-macem upacare penyucian. Selapuqne cume aturan-aturan lahiriah saq berlaku cume jangke selapuq hal tejariang baru.

¹¹Laguq Almasih sampun rauh jari Imam Agung bagi hal-hal saq solah saq gen dateng, séngaq Ie sampun tame ojok dalem kémah saq beléqan dait lebih sempurne, saq ndéq tepiaq siq ime manusie, artine ndéq berasal léman dunie saq tecipteang niki.

¹²Almasih tame léq Ruang Mahesuci léq dalem kémah nike cume sekali doang jari selaéq-laéqne. Léq waktu nike Ie nénten gadingang daraq bémbéq mame atao daraq anak sampi jari teaturang; Ie gadingang daraqne mésaq, dait siq care nike Ie bébasang ite selaéq-laéqne.

¹³ Daraq léman bémbéq dait sampi mame dait awu-awu léman kurban anak sampi, tekadu jari ketis dengan-dengan saq najis adéq ie pade jari bersi secare lahiriah.

¹⁴Jari, lamun daraq dait awu-awu nike bau persiq kenajisan dengan-dengan nike, lebih-lebih daraq Almasih! Siq Roh saq kekel, Almasih ngaturang diriq-Ne mésaq tipaq Allah jari kurban saq sempurne. Daraq-Ne persiq até nuraninte léman perbuatan saq ndéq araq manpaatne, adéq ite bau beribadah tipaq Allah saq idup.

¹⁵Keranaq nike Almasih jari Perantare sopoq perjanjian saq baru, adéq dengan saq sampun temanikang siq Allah bau nerimaq berkah-berkah saq kekel saq sampun tejanjiqang siq Allah, lantaran ninggal-Ne nike sampun nebus pelanggaran-pelanggaran saq tepiaq léq perjanjian saq penembéq.

¹⁶Lamun araq surat warisan, harus éndah araq buktine bahwe dengan saq miaq surat nike sampun ninggal.

¹⁷Séngaq surat warisan ndéqne berlaku lamun dengan saq miaq surat nike masih idup. Surat nike berlaku cume sesampun dengan nike ninggal.

¹⁸Keranaq nike perjanjian saq penembéq éndah harus tesahang siq daraq.

¹⁹ Léq penembéqne Musa nyampéang selapuq préntah saq tetulis léq Hukum Taurat tipaq bangse Israel. Sesampun nike Musa bait daraq anak sampi dait daraq bémbéq mame, terus campurne kance aiq, beterus teketisang léq Kitab Hukum Taurat nike dait léq selapuq bangse Israel kadu hisop dait bulu dombe bewarne béaq toaq.

²⁰Sambil ngelaksaneang hal nike Musa bebase, “Niki daraq saq ngesahang perjanjian léman Allah saq harus side pade taatin.”

²¹ Beterus siq care saq pade, Musa éndah ketis daraq nike léq kémah ibadah dait léq selapuq pekakas saq tekadu ibadah.

²² Mule menurut Hukum Taurat, jangke-jangke selapuq hal tesuciang siq daraq; dait dose cume bau teampunin lamun araq penumpahan daraq.

²³Siq care nike barang-barang saq jari lambang hal-hal saq léq sorge perlu tesuciang. Laguq léq hal-hal saq léq sorge nike teperluang kurban saq jaoq solahan malik.

²⁴Séngaq Almasih nénten tame ojok Ruang Suci saq tepiaq siq manusie, saq cume jari lambang léman saq setetune. Almasih mésaq tame ojok sorge; mangkin léq derike Ie ngadep Allah jari kepentingan ite.

²⁵Imam Agung sebilang taun tame ojok Ruang Mahesuci jauq daraq sopoq binatang. Laguq Almasih nénten ngulang-ulang tame jari ngaturang diriq-Ne.

²⁶Séngaq lamun maraq nike, artine Ie sampun beulang-ulang menderite mulai léman dunie niki tecipteang. Laguq nyatene, mangkin léq jaman penutuq niki, Ie rauh cume sekali doang jari ngapus dose siq ngurbanang diriq-Ne mésaq.

²⁷Pade maraq manusie sampun tetetepang jari ninggal cume sekali dait sesampun nike teadilin siq Allah.

²⁸ Maraq nike éndah Almasih, cume sekali doang teaturang jari kurban saq ngapus dose luwéq dengan. Sesampun nike Ie gen rauh malik saq kedue kaline, ndéqne jari nyeleséang persoalan dose, laguq jari ngicanin keselametan tipaq dengan-dengan saq ngantos kerauhan-Ne.