Read KITAB SUCI ZABUR INJIL YAKUB 1 Bible Online

YAKUB 1 - KITAB SUCI ZABUR INJIL bible

YAKUB 1

¹ Semeton senamian, dengan-dengan saq tehususang bagi Allah saq nyebar léq seantéro dunie! Salam léman tiang, Yakub, hambe Allah dait hambe Junjungan Saq Mulie Deside Isa Almasih.

²Semeton senamian! Lamun side pade ngalamin macem-macem cobe, side pade harus anggep hal nike jari kebahagiean.

³Séngaq side pade nenaoq, bahwe ujian tipaq imande nike ngasilang ketekunan.

⁴Jagaq adéq ketekunande nike ngasilang kesempurnean, adéq side pade jari sempurne dait lengkap, ndéq kekurangan léq hal napi juaq.

⁵Lamun araq sopoq dengan léq antare side saq kekurangan hikmat, ie harus tunas léman Allah, make Allah gen ngicanin ie; séngaq léq sebilang dengan, Allah ngicanin secare murah até dait nénten ngungkit-ngungkit kesalaqanne.

⁶Laguq dengan saq nunas dalem iman, ie ndéq kanggo bimbang. Séngaq dengan saq bimbang angenne maraq umbak léq segare dait lito laté tetiup siq angin.

⁷Dengan saq maraq nike ndéqne tetep pikiranne; ie ndéqne bau bait keputusan napi-napi léq selapuq saq ie laksaneang. Keranaq nike ndaq ie harepang éndah gen mauq napi-napi léman Tuhan.

⁹Alurang semeton saq idupne sederhane merase bangge lantaran kedudukanne saq atas.

¹⁰ Maraq nike éndah halne léq dengan sugih lantaran kedudukanne saq rendah, séngaq ie gen musnah maraq kembang pupaq.

¹¹Sewaktu tiwoq jelo siq panasne saq keras, make pupaq nike gen jari layu sehingge roroq kembangne dait telang éndah kesolahanne. Maraq nike éndah dengan saq sugih; ie gen ancur léq waktu ie kenyeke berusahe.

¹²Bahagie dengan saq tahen sewaktu ie tecobe. Séngaq sesampun ie bau tahen léq cobe nike, ie gen nerimaq upaqne, nike mahkote kehidupan saq tejanjiqang siq Allah tipaq dengan-dengan saq ngasihin Ie.

¹³Lamun sopoq dengan mauq cobe, ndaq ie bebase, “Cobe niki datengne léman Allah!” Séngaq Allah ndéqne bau tecobe siq kejahatan, dait Ie éndah ndéq cobe sai juaq.

¹⁴Laguq dengan tecobe siq keméléqne mésaq, teoros dait tetipu siq keméléqne.

¹⁵Beterus, lamun keméléq saq jahat nike teturut, make gen datengang dose; dait lamun dose sampun masak, make kematéan saq jari akibatne.

¹⁶Semeton senamian saq tiang kasihin; ndaq side pade jari sesat.

¹⁷Selapuq hal saq solah saq teicanin dait paice saq sempurne datengne léman sorge, teturunang siq Bapa, sumber selapuq cahaye dait saq ndéq iniq berobah atao bekurang lantaran perobahan.

¹⁸Siq pekayunan-Ne mésaq Ie sampun jariang ite ciptean baru siq manik kebenaran, Ie ngelaksaneang nike adéq ite jari bije saq sengake léq antare selapuq mahluk ciptean-Ne.

¹⁹Pade perhatiang niki solah-solah, semeton senamian saq tiang kasihin! Sebilang dengan harus becat dedengah, laguq ndéqne becat bebase dait ndéqne becat gedek.

²⁰Dengan saq gedek ndéqne bau ngelaksaneang saq kenaq léq arepan Allah.

²¹Keranaq nike, tetéh selapuq kebiasean saq lengé dait saq jahat. Terimaq Manik Allah setulusne léq dalem aténde, séngaq Manik nike bedowé kekuatan jari nyelametang side pade.

²²Side pade harus jari dengan-dengan saq ngelaksaneang Manik Tuhan, ndaq cume dengah doang, sehingge siq care nike side nipu diriqde mésaq.

²³Dengan saq dengahang Manik Allah, laguq ndéqne ngelaksaneang, nike maraq dengan saq kenyeke merhatiang ruene mésaq léq julu kesene.

²⁴Sesampunne perhatiang solah-solah, ie lumbar dait langsung ngelupaqang berembé rue muene nike.

²⁵Hukum Allah sempurne dait bedowé kekuatan jari merdékeang manusie. Dait dengan saq nyelidik dait pacu-pacu merhatiang dait ngelaksaneang hukum-hukum nike, dait ndéqne cume dengah doang beterus lupaq, dengan nike gen bahagie léq napi juaq saq ie laksaneang.

²⁶Lamun araq sopoq dengan saq merase diriqne ngelaksaneang ibadah, laguq ie ndéq jagaq ucapanne, ie nipu diriqne mésaq; ibadahne ndéq araq manpaatne.

²⁷Ibadah saq murni dait sejati menurut Allah Bapante: Nulung anak-anak iwoq dait bebalu-bebalu saq menderite, dait jagaq diriq mésaq adéq ndaq tesédaq siq dunie niki.