Read KITAB SUCI ZABUR INJIL YAKUB 3 Bible Online

YAKUB 3 - KITAB SUCI ZABUR INJIL bible

YAKUB 3

¹Semeton senamian! Ndaq léq antare side luwéq saq mélé jari guru. Side pade nenaoq bahwe ite saq jari guru gen teadilin beratan tebanding dengan lain.

²Ite selapuq kereng miaq kesalaqan. Laguq dengan saq ndéq uwah miaq kesalaqan siq ucapan-ucapanne, ie dengan saq sempurne, saq bau nguasein selapuq awakne.

³Ite masang plébék léq biwih jaran adéq ie mélé turut keméléqte, make ite bau ngatur selapuq awak jaran nike.

⁴Bait éndah conto sopoq kapal. Timaq kapal nike beléq gati dait tedorong siq angin saq keras, laguq ie teatur siq kemudi saq kodéq gati, menurut keméléq jurumudi.

⁵Maraq nike éndah élaqte, timaq élaq nike bagian awak saq kodéq, laguq ie bau nyombongang diriq mengenai hal-hal saq beléq-beléq. Cobaq serioq, gawah saq beléq bau tesedut siq api saq kodéq!

⁶Élaq éndah pade maraq api. Léq antare bagian-bagian awakte, élaq nike sumber kejahatan saq bau piaq najis selapuq awak dait ngidupang rode kehidupan, élaq nike mésaq tenyalaqang siq api nerake.

⁷Segale macem binatang buas, kedit, binatang saq ngumang dait empaq, bau tepiaq isah, dait sampun éndah tepiaq isah siq manusie.

⁸Laguq élaq manusie ndéqne bau tepiaq isah siq sai juaq. Élaq nike jahat dait ndéqne bau tekuasein; penoq siq racun saq nyematéq.

⁹ Ite kadu élaq nike jari ngucapang syukur léq Tuhan dait Bapante, laguq éndah jari ngutuk sepade manusie, saq sampun tecipteang menurut gambar Allah.

¹⁰Léman biwih saq pade sugul ucapan-ucapan berkah dait éndah ucapan-ucapan kutukan. Sepatutne ndéqne maraq nike.

¹¹Napi araq pengembulan nyugulang aiq due macem, aiq tawah kance aiq pait léman pengembulan saq pade?

¹²Semeton tiang senamian! Lolo are ndéqne bau ngasilang buaq Zaitun, dait lolo anggur ndéqne bau éndah ngasilang buaq are. Pengembulan saq aiqne paéq ndéqne bau éndah nyugulang aiq saq tawah.

¹³Sai léq antare side pade saq bijaksane dait bebudi? Ie harus nyatayang hal nike langan perbuatanne saq solah saq tebarengin siq kebijaksanean saq dateng léman até saq lemah lembut.

¹⁴Laguq lamun side pade talon até dait mentingang diriqde mésaq, ndaq side pade banggeang diriq dait ndaq beduste ngelawan kebenaran.

¹⁵Kebijaksanean maraq nike ndéqne berasal léman sorge. Ie berasal léman dunie, dait napsu manusie, dait léman sétan.

¹⁶Léq mbé araq talon até dait mentingang diriq mésaq, léq derike éndah araq keributan dait segale macem perbuatan saq jahat.

¹⁷Laguq kebijaksanean saq asalne léman atas, pertame-tame murni, beterus demen bedamé, gerasaq, penurut, penoq belas kasihan dait ngasilang perbuatan-perbuatan saq solah, ndéq bepihak dait ndéq munapik.

¹⁸Buaq-buaq léman kebenaran nike tesawur léq dalem damé umaq dengan saq demen bedamé.